ဘယ်သူပဲဖြစ်ဖြစ် ဖြူစင်ပြီးတော့ချောမွေ့တဲ့ မျက်နှာအသားအရေကိုပိုင်ဆိုင်ချင်ကြတာပဲလေ။ မိန်းကလေးတွေပဲ မျက်နှာအသားအရေကို ထိန်းသိမ်းစောင့်ရှောက်ရမှာမဟုတ်ပဲ ယောက်ျားလေးတွေကလည်း သူတို့ရဲ့မျက်နှာလေးတွေ ဖြူစင်ဝင်းပနေဖို့အတွက် ပြုပြင်ရမယ့်နည်းလမ်းလေးတွေကို လိုက်နာလာကြပါပြီ။ ဖြူစင်လှပတဲ့မျက်နှာအသားအရေကို ပိုင်ဆိုင်ရဖို့အကျိုးရှိပြီး ထိရောက်တဲ့အိမ်တွင်းနည်းလမ်းကောင်းတွေကို ပြောပြပေးချင်ပါတယ်။

ဒိန်ချဉ်

ဒိန်ချဉ်ကတော့ အသားအရေကိုကောင်းမွန်လာစေဖို့ ပြီးပြည့်စုံတဲ့အာဟာရဓာတ်တွေကို ပေးစွမ်းနိုင်တာကြောင့် လှပပြီးဖြူစင်တဲ့ အသားအရေကိုပိုင်ဆိုင်ချင်သူတွေအတွက် အကျိုးရှိစေမှာပါ။ ဘာမှမထည့်ထားတဲ့ဒိန်ချဉ်ကို မျက်နှာအသားအရေပေါ်မှာတင်ပြီး ပွတ်လိမ်းပေးရမှာပါ။ အသားအရေထဲကိုစိမ့်ဝင်အောင် သေချာပွတ်လိမ်းပေးရမှာဖြစ်ပြီး လိမ်းပြီးသွားတဲ့အခါမှာလည်း နာရီဝက်လောက်ထားထားပေးရမှာပါ။ ပြီးမှ ရေနွေးနွေးလေးနဲ့ ပြန်ပြီးသန့်စင်ပေးရမှာဆိုတော့ အရမ်းလည်းမခက်ခဲလွန်းပါဘူးနော်။

လိမ္မော်သီး

လိမ္မော်သီးမှာပါဝင်နေတဲ့ ဗီတာမင်စီဓာတ်တွေက အသားအရေကိုစိုပြေစေပြီး ဖြူဝင်းလာစေဖို့အထောက်အကူပြုနေပါတယ်။ နည်းလမ်းကတော့ လိမ္မော်သီးကိုအရည်ညစ်ပြီး ရလာတဲ့အရည်ထဲကို ဆနွင်းမှုန့်အနည်းငယ်ထည့်ပြီး မျက်နှာပေါ်မှာ လိမ်းထားပေးရမှာပဲဖြစ်ပါတယ်။ အသင့်တော်ဆုံးအချိန်ကတော့ အိပ်ယာဝင်ခါနီးအချိန်ပေါ့။ မိနစ် ၂၀ လောက်ထားထားပြီးရင်တော့ ရေနဲ့ပြန်လည်းဆေးကြောပြီး သန့်စင်ပေးလိုက်ရုံပါပဲ။ တစ်ပတ်ကို နှစ်ကြိမ်လောက်ပုံမှန်လုပ်ပေးမယ်ဆိုရင်တော့ ဖြူစင်ပြီးလှပတဲ့အသားအရေကို ပိုင်ဆိုင်လာရမှာပဲဖြစ်ပါတယ်။

ပျားရည်

ကျန်းမာရေးအတွက်ရော၊ အသားအရေအတွက်အရမ်းကို အထောက်အကူဖြစ်စေတဲ့ အိမ်တွင်းပစ္စည်းတစ်မျိုးလို့ဆိုလို့ရပါတယ်။ မျက်နှာအသားအရေကို ကြည်ကြည်လင်လင်နဲ့ ဖြူဝင်းနေစေချင်တယ်ဆိုရင်တော့ ပျားရည်စစ်စစ်ကို သန့်စင်ထားတဲ့မျက်နှာပြင်ပေါ်မှာ စိမ့်ဝင်နေအောင်ပွတ်လိမ်းပေးပြီး ၁၅ မိနစ်လောက်ထားထားလိုက်ပါ။ အချိန်ပြည့်သွားပြီဆိုမှ မျက်နှာကိုသန့်စင်ပေးလိုက်ရုံပဲလေ။ ဒီနည်းလမ်းလေးက မျက်နှာအသားအရေကို ကောင်းမွန်လာစေဖို့အားဖြည့်ပေးပြီး အသားအရေကိုလည်း ဖြူဝင်းစေတာကြောင့် ထိရောက်တဲ့နည်းလမ်းကောင်းလို့ ဆိုလို့ရပါတယ်။