အဖြူရောင် Canvas Shoes တွေကို အိမ်မှာအလွယ်တကူ သန့်စင်နိုင်မယ့်နည်းလမ်း ၃ မျိုး

အဖြူရောင် Canvas Shoes ကို အမြဲစီးတယ်ဆိုရင် နှစ်ပတ်တစ်ကြိမ် ပုံမှန်သန့်ရှင်းရေး လုပ်ပေးသင့်ပြီး စွန်းထင်းနေတယ်ဆိုရင်လည်း အညစ်အကြေးတွေကို သေချာသန့်စင်ပေးသင့်ပါတယ်။ တစ်ခါတစ်လေ စွန်းထင်းပေကျံနေတဲ့အခါ အဖြူရောင်ဆိုတော့ ပြောင်အောင်လုပ်ရတာ ခက်ခဲနိုင်ပါတယ်။ ဒါကြောင့် အဖြူရောင် Canvas Shoes တွေကို အိမ်မှာအလွယ်တကူ သန့်စင်နိုင်မယ့်နည်းလမ်း ၃ မျိုးကို မျှဝေပေးလိုက်ပါတယ်။

Baking Soda နဲ့ ရှာလကာရည်

ဒီနည်းလမ်းနဲ့လုပ်ဖို့အတွက် လိုအပ်တာကတော့ နူးညံ့တဲ့ Brush နဲ့ ရေနွေး၊ ဇလုံ၊ Baking Soda နဲ့ ရှာလကာရည်၊ အဝတ် (သို့) သွားတိုက်တံတို့ပဲ ဖြစ်ပါတယ်။

အရင်ဆုံး နူးညံ့တဲ့ Brush နဲ့ အညစ်အကြေးတွေကို တိုက်ထုတ်ပါမယ်။ ဒါမှ ပိုပြီး သန့်ရှင်းရေးလုပ်ရတာ လွယ်ကူစေမှာပါ။
ဇလုံထဲကို Baking Soda – စားပွဲတင်ဇွန်း ၁ ဇွန်း၊ ရှာလကာရည် – စားပွဲတင်ဇွန်း ၂ ဇွန်းနဲ့ ရေနွေး – ၁ ခွက် ထည့်ပြီး မွှေပါမယ်။ ပြီးရင် အဲ့ထဲကို အဝတ် (သို့) သွားတိုက်တံနှစ်ပြီး Shoes ကိုတိုက်ပါမယ်။ သေချာလေး နေရာအနှံ့တိုက်ပေးပါ။

တိုက်ပြီး ရေလောင်းချတာမျိုးမလုပ်ပဲ နေရနည်းနည်းစီယူပြီး သန့်စင်ပေးပါ။ ပြီးရင်တော့ အခြောက်ခံထားလိုက်ရုံပါပဲ။

ပန်းကန်ဆေးဆပ်ပြာ

ဒီနည်းလမ်းနဲ့လုပ်ဖို့အတွက် လိုအပ်တာတွေကတော့ နူးညံ့တဲ့ Brush နဲ့ ပန်းကန်ဆေးဆပ်ပြာရည်၊ ရေနွေးနဲ့ ဇလုံ၊ အဝတ် (သို့) သွားတိုက်တံ ဖြစ်ပါတယ်။

အရင်ဆုံး ခုနကလိုပဲနူးညံ့တဲ့ Brush နဲ့ အညစ်အကြေးတွေကို တိုက်ထုတ်ပါမယ်။

ဇလုံထဲကို ရေနဲ့ ပန်းကန်ဆေးဆပ်ပြာရည် ရောထည့်ပါမယ်။ ဆပ်ပြာတွေကို အများကြီးထည့်စရာမလိုပါဘူး။ အများကြီးထည့်လိုက်ရင် ဆပ်ပြာပြောင်အောင်လုပ်ရတာ ခက်သွားပါလိမ့်မယ်။ ပြီးရင် အဝတ် (သို့) သွားတိုက်တံနှစ်ပြီး Shoes ကိုတိုက်ပါမယ်။

ပြီးရင်တော့ ရေနဲ့ပြန်သန့်စင်ပြီး အခြောက်ခံထားပါ။ ဆပ်ပြာဖြစ်တာကြောင့် သေချာလေးသန့်စင်ပေးဖို့တော့ လိုပါမယ်။

သွားတိုက်ဆေး

ဒီနည်းလမ်းနဲ့လုပ်ဖို့အတွက် လိုအပ်တာတွေကတော့ နူးညံ့တဲ့ Brush နဲ့ သွားတိုက်ဆေး၊ သွားတိုက်တံ၊ အဝတ်တို့ပဲ ဖြစ်ပါတယ်။ ဒီနည်းလမ်းကတော့ အလွယ်ဆုံးဖြစ်မှာပါ။

အရင်ဆုံး နူးညံ့တဲ့ Brush နဲ့ အညစ်အကြေးတွေကို တိုက်ထုတ်ပါမယ်။

သွားတိုက်တံပေါ်ကို သွားတိုက်ဆေးထည့်ပြီး ညစ်ပေနေတဲ့နေရာတွေကို Circular Motion ပွတ်တိုက်ပေးပါ။ ပြီးရင် ၁၅ မိနစ်ထားပြီးတော့မှ ရေနဲ့ပြန်သန့်စင်လိုက်ပါ။ နောက်ဆုံးမှာတော့ အခြောက်ခံထားလိုက်ရင် ရပါပြီ။