ခြေဖဝါးအနံ့ဆိုးထွက်တာက အရမ်းဆိုးပါတယ်။ ကိုယ်ရှိတဲ့နေရာတိုင်းမှာ အဲ့အနံ့က ရနေတာပါ။ ကိုယ့်ရဲ့ဖိနပ်တွေ၊ ခြေအိတ်တွေမှာလည်း စွဲနေစေပါတယ်။ ဒါကြောင့် ခြေဖဝါးအနံ့ဆိုးထွက်ရင် ဒီတိုင်းမထားပါနဲ့။ သက်သာပျောက်ကင်းအောင် လုပ်လို့ရတဲ့ နည်းလမ်းတွေလည်း အများကြီးရှိတာကြောင့် လုပ်ကြည့်သင့်ပါတယ်။ လူတိုင်းလုပ်ရတာအဆင်ပြေအောင် ခြေဖဝါးအနံ့ဆိုးထွက်တာ ပျောက်စေမယ့် သဘာဝနည်းလမ်းကောင်း ၅ ခုကို မျှဝေပေးလိုက်ပါတယ်။
Scrub တိုက်ပါ
Body Scrub လုပ်ရင် ခြေဖဝါးကို ချန်ခဲ့တာမျိုး မလုပ်ပါနဲ့။ ခြေဖဝါးကိုလည်း Scrub တိုက်ပေးပါ။ ဒါဆိုရင် ခြေဖဝါးအနံ့ဆိုးထွက်တာ သက်သာစေပါတယ်။ တစ်ပတ်မှာ ၂ ကြိမ် ပုံမှန်ရေနွေးစိမ်ပြီး Scrub တိုက်တာမျိုး လုပ်ပေးပါ။
Essential Oils
Lavender Oil, Thyme Oil, Tea Tree Oil စတဲ့ Essential Oils တွေက ခြေဖဝါးအနံ့ဆိုးထွက်တာကို ပျောက်စေပါတယ်။ လုပ်ရမယ့် နည်းလမ်းကတော့ ခြေထောက်စိမ်ဖို့အတွက် ဇလုံထဲကို ရေနွေးထည့်ပြီး Essential Oil အစက် ၂၀ လောက်ထည့်ပြီး ခြေထောက်စိမ်ပေးပါ။ အနည်းဆုံး မိနစ် ၃၀ လောက် စိမ်ပေးရင် ပိုကောင်းပါတယ်။ တစ်ပတ်မှာ ၃ ကြိမ် (သို့) နေ့တိုင်းလုပ်ပေးနိုင်ပါတယ်။
ကျောက်ချဉ်
ဂျိုင်းနံ့နံရင် ကျောက်ချဉ်ပွတ်ဆိုသလိုပဲ ခြေဖဝါးအနံ့ဆိုးထွက်ရင်လည်း ကျောက်ချဉ်သုံးပေးရင် သက်သာပျောက်ကင်းစေပါတယ်။ လုပ်ရမယ့် နည်းလမ်းကတော့ ကျောက်ချဉ်ကို ထုချေပြီး စားပွဲတင်ဇွန်း ၄ ဇွန်းစာယူပြီး ရေနွေးထည့်ထားတဲ့ ဇလုံထဲကို ထည့်မွှေလိုက်ပါ။ ပြီးရင် အဲ့ဇလုံထဲကို ခုနကလိုပဲ အနည်းဆုံး မိနစ် ၃၀ လောက် ခြေထောက်ထည့်စိမ်ထားရမှာ ဖြစ်ပါတယ်။ တစ်ပတ်မှာ ၃ ကြိမ် (သို့) နေ့တိုင်းလုပ်ပေးနိုင်ပါတယ်။
သံပယိုရည်နဲ့မုန့်ဖုတ်ဆိုဒါ
သံပယိုရည် – စားပွဲတင်ဇွန်း ၂ ဇွန်းနဲ့ မုန့်ဖုတ်ဆိုဒါ – ခွက်ရဲ့ ၄ ပုံ ပုံ ၁ ပုံစာကို ရေနွေးထည့်ထားတဲ့ ဇလုံထဲ ရောထည့်ပြီး မွှေလိုက်ပါ။ ပြီးရင်တော့ မိနစ် ၂၀၊ ၃၀ လောက် ခြေထောက်ထည့်စိမ်ထားရမှာပါ။ တစ်ပတ်မှာ ၃ ကြိမ် (သို့) ၂ ကြိမ်လောက် လုပ်ပေးရင် ရပါပြီ။
ရှာလကာရည်
ခြေထောက်စိမ်ဖို့ ရေနွေးထည့်ထားတဲ့ ဇလုံထဲကို ရှာလကာရည် – စားပွဲတင်ဇွန်း ၂ ဇွန်းထည့်ပြီး အဲ့ဇလုံထဲကို ခြေထောက်ထည့်စိမ်ထားပါ။ မိနစ် ၃၀ စိမ်ပေးရင် ရပါပြီ။ တစ်ပတ်မှာ ၂ ကြိမ်လောက် ပုံမှန်လုပ်ပေးရမှာပါ။
