Dry Shampoo သုံးတာက ခေါင်းလျှော်ဖို့ အဆင်မပြေတဲ့အချိန်၊ တစ်ခါတစ်လေမှသုံးတာ ကောင်းပါတယ်။ ခဏခဏ နေ့တိုင်းလိုလိုသုံးမယ်ဆိုရင် ဆံသားပျက်စီးမှုတွေ ရှိလာနိုင်ပါတယ်။ အထူးသဖြင့် ဒီအရာတွေ ဖြစ်လာနိုင်ပါတယ်။
ဦးရေပြားယားယံခြင်းနဲ့ဓာတ်မတည့်မှုများ
Dry Shampoo ကို နေ့တိုင်းလိုလိုသုံးတဲ့အခါ ဦးရေပြားယားယံပြီး ဓာတ်မတည့်တာတွေဖြစ်လာပြီး ဦးရေပြားနီမြန်းတာ၊ အနာပေါက်တာ၊ ဗောက်ထတာတွေ ဖြစ်လာနိုင်ပါတယ်။ ဒါကြောင့် တစ်ပတ်တစ်ကြိမ်ထက်ပိုပြီး မသုံးတာတော့ ပိုကောင်းပါတယ်။
ဦးရေပြားနဲ့ဆံသားခြောက်သွေ့ခြင်း
Dry Shampoo က ဦးရေပြားနဲ့ဆံသားကို အစိုဓာတ်ထိန်းပေးတဲ့ သဘာဝအဆီတွေကို ဖယ်ရှားပစ်တဲ့အတွက် ခဏခဏ အလွန်အကျွံသုံးရင် ဦးရေပြားနဲ့ဆံသား ခြောက်သွေ့ပြီး ပျက်စီးလာပါလိမ့်မယ်။
မွှေးညှင်းပေါက်များပိတ်ခြင်း
ခေါင်းမလျှော်ပဲ Dry Shampoo ကိုပဲ ရက်အကြာကြီး နေ့တိုင်းသုံးနေမယ်ဆိုရင် အညစ်အကြေးတွေနဲ့ Dry Shampoo က ပါဝင်ပစ္စည်းတွေနဲ့ ထိတွေ့ပြီး မွှေးညှင်းပေါက်တွေ ပိတ်ဆို့ကာ ဆံပင်ကျွတ်တာ၊ ယားယံတာ၊ ဗောက်ထတာတွေ ဖြစ်စေပါတယ်။
ဦးရေပြားနဲ့ဆံသားသန့်ရှင်းမှုမရှိခြင်း
ခေါင်းလျှော်မှ ဦးရေပြားနဲ့ဆံသားက သန့်ရှင်းမှုရှိမှာပါ။ Dry Shampoo က သန့်ရှင်းအောင် မလုပ်ပေးနိုင်ပါဘူး။ အဆီတွေကိုပဲ စုပ်ယူပေးနိုင်တာပါ။ ဒါကြောင့် ခေါင်းမလျှော်ပဲ နေ့တိုင်း ရက်အကြာကြီး Dry Shampoo ကိုပဲ သုံးနေမယ်ဆိုရင် ဦးရေပြားနဲ့ဆံသားက သန့်ရှင်းမှုမရှိတဲ့အတွက် အနာပေါက်တာ၊ ဗောက်ထတာ၊ ဆံပင်ကျွတ်တာတွေ ဖြစ်လာပါလိမ့်မယ်။
အသက်ရှူလမ်းကြောင်းဆိုင်ရာရောဂါနဲ့ကင်ဆာများ
Dry Shampoo တွေမှာက အမှုန့်ပုံစံနဲ့ ကျောက်ဂွမ်းအမျှင်တွေ၊ မဂ္ဂနီဆီယမ်ဆီလီကိတ်တွေ ပါဝင်တာမျိုး ရှိတဲ့အတွက် အလွန်အကျွံသုံးစွဲတဲ့အခါ အသက်ရှုလမ်းကြောင်းဆိုင်ရာ ရောဂါတွေနဲ့ ကင်ဆာရောဂါတွေအတွက် အန္တရာယ်ဖြစ်စေနိုင်ပါတယ်။
