တောင်းမှာအကွပ် လူမှာအဝတ် ရယ်လို့ အဝတ်အစားရဲ့ တန်ဖိုးနဲ့ နေရာကျမှုကို ဆိုထုံးပြုကြပါတယ်။ ဒီလိုအရေးပါတဲ့ လူတွေရဲ့ လိုအပ်ချက်ကို ဖြည့်ဆည်းသူတွေထဲမှာ ဖက်ရှင်ဒီဇိုင်းပညာရှင်တွေရဲ့ အခန်းကဏ္ဍကိုလည်း မေ့ထားလို့ မရပါဘူး။ ဖက်ရှင်ဒီဇိုင်နာတွေအကြောင်း ပြောရာမှာ သိထားသင့်တဲ့နာမည်ကြီးပုဂ္ဂိုလ်တစ်ချို့ကိုလည်း မိတ်ဆက်ပေးချင်ပါတယ်။

(၁) Tom Ford

Photo: WWD.com

ခေတ်သစ်အမျိုးသားဝတ်ဖက်ရှင်ဒီဇိုင်းလောကမှာ ဩဇာကြီးသူတစ်ဦးက တွမ်ဖို့ဒ်ဖြစ်ပါတယ်။ ပါရီမှာ ဗိသုကာပညာရှင်အဖြစ် လေ့လာခဲ့ရာကနေ ဖက်ရှင်လောကထဲ ဝင်ရောက်လာသူ ဖြစ်ပါတယ်။ Gucci မှာလည်း Creative Director လုပ်ခဲ့ဖူးပြီး နောက်ပိုင်းမှာ ကိုယ်ပိုင် အမှတ်တံဆိပ်နဲ့ နာမည်ကျော်ဖက်ရှင်တွေ ၊ မျက်မှန်နဲ့ ရေမွှေးတွေပါ ထုတ်ပါတယ်။

(၂) Alessandro Michele

Photo: W Magazine

အီတလီဖက်ရှင်ဒီဇိုင်နာ အလက်ဆန်ဒရို မစ်ချီလီလည်း Gucci မှာ Creative Director အဖြစ် တာဝန်နေသူ ဖြစ်ပါတယ်။ ရောမမှာ ရှိတဲ့ Accademia di Costume e di Moda မှာ ဖက်ရှင်ဒီဇိုင်းဘာသာရပ်နဲ့ ကျောင်းပြီးခဲ့တာပါ။ ဒီနေ့မှာ သူဟာ ဖက်ရှင်နယ်ပယ်မှာ လူသိအများဆုံးပုဂ္ဂိုလ်တစ်ဦးအဖြစ် ရပ်တည်နေသလို နိုင်ငံတကာဖက်ရှင်ဆုတံဆိပ်တွေလည်း အများအပြား ရထားသူ ဖြစ်ပါတယ်။

(၃) Virgil Abloh

Photo: The Business of Fashion

ဗာဂီးလ်အက်ဘ်လို့သ်ကတော့ ဖက်ရှင်ဒီဇိုင်နာလည်း ဖြစ် ၊ စွန့်ဦးတီထွင်သူလည်း ဖြစ်ပါတယ်။ Louis Vuitton အမျိုးသားဝတ်ဖက်ရှင်မှာ အနုပညာဒါရိုက်တာအဖြစ် လုပ်ခဲ့ပါတယ်။ အခုတော့ ကိုယ်တိုင်တည်ထောင်ထားတဲ့ မီလန်အခြေစိုက် Off-White ဖက်ရှင်ကုမ္ပဏီရဲ့ အမှုဆောင်အရာရှိချုပ် ဖြစ်ပါတယ်။

(၄) Ricardo Tisci

Photo: T Singapore

အီတလီဖက်ရှင်ဒီဇိုင်နာ ရီကာဒိုတစ္စီဟာ အရှုံပေါ်နေတဲ့ Givenchy ကို ဦးမော့လာစေသူအဖြစ် နာမည်ကြီးပါတယ်။ ၂၀၁၈ မှာ Burberry မှာ Creative Director အဖြစ် အလုပ်ဝင်ခဲ့ပြီး သူ့လက်ထက်မှာ Burberry brand ကို ဆန်းသစ်တီထွင်မှုတွေ လုပ်ခဲ့ပါတယ်။ Luxury streetwear လောကထဲကို Burberry ကို ပေါက်အောင် ဖောက်ခဲ့ပါတယ်။

(၅) Christopher Raeburn

Photo: SoccerBible

ခရစ္စတိုဖာရေးဘန်ကတော့ ဗြိတိန်ဖက်ရှင်ဒီဇိုင်နာတစ်ဦးဖြစ်ပြီး အမျိုးသားဝတ်ဖက်ရှင်တွေအပြင် အမျိုးသမီးဝတ်တွေနဲ့ တခြား အသုံးအဆောင်တွေလည်း ဒီဇိုင်းထုတ်ခဲ့သူ ဖြစ်ပါတယ်။ ပညာရေးအနေနဲ့ တော်ဝင်အနုပညာကောလိပ်နဲ့ Middlesex လန်ဒန်တက္ကသိုလ်တို့မှာ တက်ရောက်ခဲ့ပါတယ်။ Timberland အမှတ်တံဆိပ်ရဲ့ ပထမဆုံး Creative Director လည်း ဖြစ်ပြီး GQ က ပေးတဲ့ အတော်ဆုံး လက်သစ် ဒီဇိုင်နာဆု ရထားပါတယ်။