ခြေထောက်ကြမ်းပြီး ခြေဖနောင့်အက်ကွဲတာမျိုးတွေ၊ ခြေထောက်အရေခွံလန်တာမျိုးတွေဖြစ်နေရင် ခြေထောက်အလှအပကို ထိခိုက်ပါတယ်။ ခြေသည်းဝါနေတာမျိုးဖြစ်ရင်လည်း မလှပါဘူး။ ဒါကြောင့် သန့်ရှင်းလှပတဲ့ခြေထောက်လေးတွေကို ပိုင်ဆိုင်နိုင်ဖို့ ကိုယ်တိုင်ဘယ်လိုကုသနိုင်မလဲ၊ ဘယ်လိုတွေလုပ်ပေးရမလဲဆိုတာကို မျှဝေပေးလိုက်ပါတယ်။

ခြေသည်းတွေဝါနေရင်

ခြေသည်းခွံတွေဝါနေရင် ခြေထောက်စိမ်မယ့် ရေဇလုံထဲကို သံပရိုရည် – စားပွဲတင်ဇွန်း တစ်ဇွန်းစာထည့်ပြီးမွှေလိုက်ပါ။ ပြီးတာနဲ့ ခြေထောက်စိမ်ထားလိုက်ပါ။ တော်တော်များများလုပ်နေကြတဲ့ သံပရိုသီးနဲ့ ခြေသည်းကို တိုက်ရိုက်ပွတ်တဲ့နည်းလမ်းထက် ဒီလိုလုပ်တာက ပိုပြီးထိရောက်သလို ပိုမှန်ကန်တဲ့ နည်းလမ်းလည်း ဖြစ်ပါတယ်။

ခြေဖနောင့်အက်ကွဲပြီး ကြမ်းနေရင်

ခြေဖနောင့်တွေအက်ကွဲပြီး ခြေဖဝါးကြမ်းနေတာမျိုးဖြစ်ရင် ခြေထောက်စိမ်မယ့် ရေဇလုံထဲကို ရေနွေးထည့်ပါ။ ပြီးရင် မုန့်ဖုတ်ဆိုဒါ (Baking Soda) – စားပွဲတင်ဇွန်း ၂ ဇွန်း (သို့) ၃ ဇွန်းထည့်ပြီး မွှေပါ။ ပြီးတာနဲ့ မိနစ် ၂၀ လောက် ခြေထောက်ကိုစိမ်ထားလိုက်ပါ။ အချိန်ပြည့်ရင် ရေဆေးချပြီး Lotion လိမ်းဖို့ မမေ့ပါနဲ့။ ဒီနည်းလမ်းက ခြေဖနောင့်အက်ကွဲပြီး ကြမ်းနေတာကို သက်သာစေပါတယ်။ ဒါပေမယ့် Sensitive ဖြစ်တဲ့သူတွေ Allergies ဖြစ်တတ်တဲ့သူတွေကတော့ ဒီနည်းလမ်းကို မသုံးသင့်ပါဘူး။

ခြေဖဝါးမှာ အရေခွံလန်တာမျိုးဖြစ်ရင်

ခြေဖဝါးမှာ အရေခွံတွေလန်တာမျိုးဖြစ်ရင်လည်း စိတ်မပူပါနဲ့။ Vinegar တစ်စကို ရေ နှစ်စနဲ့ရောပြီး ခြေထောက်ကိုစိမ်ထားလိုက်ပါ။ ၁၅ မိနစ်လောက်စိမ်ပြီးရင်တော့ ရေဆေးချပြီး Essential Oil လိမ်းပေးလို့ရပါတယ်။

Photo Source: www.brightside.me