မနက်ပိုင်းမှာ လွယ်လွယ်ကူကူလုပ်နိုင်မယ့် ဝိတ်ကျစေတဲ့ ယောဂလေ့ကျင့်ခန်း (၆) မျိုး

သင်က မနက်ပိုင်းမှာ ညင်ညင်သာသာလေးနဲ့ အများကြီးမမောရတဲ့ လေ့ကျင့်ခန်းမျိုးကို လုပ်ချင်သူ ဆိုရင်တော့ ယောဂလေ့ကျင့်ခန်းကို ရွေးချယ်သင့်ပါတယ်။ ယောဂလေ့ကျင့်ခန်းက သင့်ကို တစ်နေ့တာလုံး ပေါ့ပါးလန်းဆန်းနေစေပြီး စိတ်ပျော်ရွှင်စေပါလိမ့်မယ်။ အခုဖော်ပြထားတဲ့ လေ့ကျင့်ခန်းတွေက သင့်ကို ချက်ချင်းကြီး ဝိတ်ကျစေတာမျိုး မဟုတ်ဘဲ ဖြည်းဖြည်း မှန်မှန်လုပ်ပေးရင်း သိသာစေမယ့်ယောဂလေ့ကျင့်ခန်းတွေပါ။ လေ့ကျင့်ခန်းတွေက ဘာတွေလဲဆိုတော့-

၁။ Cat Cow

Photo Source: Gfycat

ဒူးထောက်ကာ လေးဘက်ထောက်ပုံစံ နေပေးရပါမယ်။ အသက်ရှှုသွင်းကာ အပေါ်ကို မော့ပေးရပါမယ်။ ဒီလိုမော့တဲ့အချိန် သင့်ကျောရိုးက အဝိုက်ပုံစံ ဖြစ်သွားပြီး တင်ပါးက နောက်ပစ်ထားရပါမယ်။ ဒီကနေ နဂိုပုံစံ ပြန်သွားပေးရပါမယ်။ ဒီလေ့ကျင့်ခန်းက သင့်နောက်ကြောအတွက် ရည်ညွှန်းထားတဲ့ လေ့ကျင့်ခန်းဖြစ်ပါတယ်။ ဒါကိုတော့ ၁ မိနစ်ကနေ သုံးမိနစ်အထိ လုပ်ပေးရပါမယ်။

၂။ Down Dog

Photo Source: Tenor

မတ်တပ်ရပ်အနေအထားကနေ အောက်ဘက်ကို ကုန်းကာ လက်ထောက်ပေးရပါမယ်။ ခြေထောက်နဲ့ လက်ကို တစ်တည်းတည်းထားရပါမယ်။ ပြီးနောက် ညာခြေထောက်ကို ဒူးကွေးပေးရပါမယ်။ ပြီးနောက် ဘယ်ခြေကို ဒီလိုပဲ လုပ်ပေးရပါမယ်။ ဒါကို ဘယ်ညာ တစ်လှည့်စီ ၅ ခါ လုပ်ပေးရပါမယ်။ ဒီလေ့ကျင့်ခန်းက ခါးဘေးအဆီတွေအတွက် သင့်တော်ပါတယ်။

၃။ Side Plank

 

Photo Source: Healthline

ခန္ဓာကိုယ်ကို တစ်တန်းတည်းထားကာ ဘေးစောင်း Plank ထောက်ထားရပါမယ်။ အပေါ်ကလက်ကို အပေါ်မြှောက်ထားရပါမယ်။ တင်ပါးနဲ့ ဗိုက်သားကို အားပြုကာ ညှစ်ပေးရပါမယ်။ ဒီအတိုင်း အသက်ရှူကြိမ်နှုန်း နှစ်ခါစာ နေပေးရပါမယ်။ ပြီးရင်တော့ အပေါ်မြှောက်ထားတဲ့ လက်ကို အောက်ဘက်ပြန်ချကာ ကျန်တစ်ဘက်ကို မြှောက်ပေးရပါမယ်။

၄။ Boat Pose

Photo Source: YogaClicks

ခြေထောက်ကို မြေပြင်နဲ့ မထိအောင် 45 Degree လောက်ရောက်တဲ့အထိ ကွေးထားကာ လက်ကို ဆန့်ထားပေးရပါမယ်။ ဒီပုံစံအတိုင်း စက္ကန့် ၃၀ ကနေ ၁ မိနစ် အထိ နေနိုင်ပါတယ်။ ဒီလေ့ကျင့်ခန်းက သင့်ကျောရိုးကို သန်မာစေပြီး ခက်တာကြောင့် သင်လုပ်နိုင်သလောက်ပဲ လုပ်သင့်ပါတယ်။

၅။ Reclining Spinal Twist

Photo Source: Do You Yoga

အိပ်လျက်အနေအထားနဲ့ ဒူးကို ကွေးပေးရပါမယ်။ ပြီးနောက် ဒီကွေးထားတဲ့အတိုင်း ဘေးဘက်စောင်းပေးရပါမယ်။ ခန္ဓာကိုယ်က ဒီအနေအထားအတိုင်းနေကာ အောက်ဘက်ကိုပဲ စောင်းပေးရမှာပါ။ ဒီပုံစံအတိုင်း ၁ မိနစ် ကနေ ၃ မိနစ် နေပေးရပါမယ်။

၆။ Child Pose

Photo Source: Yoga-Practice

ဒီယောဂလေ့ကျင့်ခန်းကတော့ အလွယ်ဆုံးပါပဲ။ ဒူးထောက်ထားကာ ခန္ဓာကိုယ်ကို ရှေ့ဘက် ဆန့်ပေးရပါမယ်။ လက်နှစ်ဖက်ကို ဆန့်ထားကာ တင်ပါးကို ကော့ထားပေးရပါမယ်။ ဒီအနေအထားအတိုင်း ၁ မိနစ် နေပေးရပါမယ်။

By MyStyle Myanmar