လေ့ကျင့်ခန်း လုပ်တာက ပျိုမေတို့အားလုံးအတွက် ထိရောက်တဲ့ အလေ့အကျင့် တစ်ခုဆိုပေမယ့် တစ်နေ့မှာ ဘယ်နှစ်မိနစ် မလုပ်လိုက်ရလို့ မထိရောက်ဘူးလို့ မရှိပါဘူး။ တချို့ မိန်းကလေးတွေက လေ့ကျင့်ခန်းကို တစ်နေ့ ဘယ်လောက် လုပ်ရမှ ဝိတ်ကျမှာ ဆိုပြီး ဖိအားများတတ်ကြပါတယ်။ အမှန်တော့ ဒီလို မဖြစ်သင့်ဘဲ တစ်နေ့တာမှာ အားတဲ့ အချိန်လေး လှုပ်လှုပ်ရှားရှား နေလိုက်ရင် လုံလောက်ပါတယ် ဆိုပြီး စိတ်မျိုး ထားသင့်ပါတယ်။ ဒီလိုမှ လေ့ကျင့်ခန်း လုပ်ရတာ ပျော်ဖို့ကောင်းမှာပါ။
ဒီတစ်ခေါက်မှာတော့ လေ့ကျင့်ခန်း လုပ်ဖို့ အချိန် သိပ်မရှိတဲ့ ကောင်မလေးတွေ အကြိုက်တွေ့စေမယ့် လေ့ကျင့်ခန်းတွေကို ဖော်ပြပါရစေ။ ဒီလေ့ကျင့်ခန်းတွေက အချိန်တိုအတွင်းမှာပဲ ကယ်လိုရီများစွာ ကျစေမယ့် လေ့ကျင့်ခန်းတွေ ဖြစ်ပါတယ်။
၁။ Jumping Jack
Photo Source: Spotebi
မတ်တပ်ရပ် အနေအထားနဲ့ စတင်ကာ ခုန်လိုက်တာနဲ့ လက်ကိုပါ ကားပေးရပါမယ်။ ခုန်တာနဲ့ တစ်ပြိုင်နက် ခြေထောက်ကိုပါ ကားပေးရပါမယ်။ ဒီကနေ နဂိုအနေအထား ပြန်သွားရပါမယ်။ ဒါကို ပြန်စိတဲ့ လှုပ်ရှားမှုက တစ်ကြိမ် လို့ သတ်မှတ်ပြီး အခါ ၅၀ လုပ်ပေးရပါမယ်။
၂။ Pause High Knee
Photo Source: Pinterest
ဒူးကို တစ်လှည့် စီ ရင်ဘတ်နဲ့ နီးအောင် မ ပေးရပါမယ်။ ဒီလို မ လို့ ရင်ဘတ်နဲ့ နီးတဲ့အချိန် ခဏ Pause ရပ်ပေးရပါမယ်။ ဘယ်ဒူးပြီးရင် ညာဒူးကိုလည်း ဒီလိုပဲ လုပ်ပေးရပါမယ်။ အခါ ၅၀ လုပ်ရပါမယ်။
၃။ Skater
Photo Source: www.self.com
ဒူးကွေ့တဲ့အခါ ကွေးတဲ့ဒူး မဟုတ်ဘဲ ကျန်တစ်ဘက်ကို ဒီကွေးတဲ့ဒူးရဲ့ အနောက်မှာ ထားပေးရပါမယ်။ ပြီးနောက် တခြားဘက်ကိုလည်း ဒီလိုပဲ လုပ်ပေးရပါမယ်။ Skater လေ့ကျင့်ခန်းကိုလည်း အခါ ၅၀ လုပ်ရပါမယ်။
၄။ Jumping Squat
Photo Source: Gifs.com
ထိုင်ထလုပ်တာကို ခုန်တာနဲ့ ပေါင်းပေးရမှာပါ။ ဒီလေ့ကျင့်ခန်းက ခက်တာမို့ စစ လုပ်ချင်း အခါ ၅၀ မပြည့်လည်း ရပါတယ်။ ထိုင်ပြီးနောက် ပြန်ထတဲ့အခါ ခုန်ပေးရပါမယ်။ ပြီးနောက် ပြန်ထိုင် ပေးရပါမယ်။ အခါ ၅၀ ပါ။
၅။ Narrow and wide Jump Squat
Photo Source: The Lavender Lifestyle
အပေါ်က ထိုင်ထ လေ့ကျင့်ခန်းကိုမှ Modify လုပ်ပေးရမှာပါ။ ထိုင်တဲ့အခါ ခြေထောက်နှစ်ဘက်ကို ခွာထိုင်တာက Wide Squat ပါ။ ပြီးရင် ပြန်ထတဲ့အခါ ခုန်ပေးရပါမယ်။ နောက်တစ်ခါ ပြန်ထိုင်ရင်တော့ ခြေထောက် အကွာအဝေးကို ကျဉ်းပေးရပါမယ်။ ဒါကတော့ Narrow Squat ပါ။ ကျယ်လိုက် ကျဉ်းလိုက် အခါ ၅၀ လုပ်ပေးရပါမယ်။
By MyStyle Myanmar
