လေ့ကျင့်ခန်းလုပ်တဲ့အခါ မှားယွင်းပုံစံတွေကို တစိုက်မတ်မတ်လုပ်မိနေခြင်းက ဘော်ဒီတည်ဆောက်အပိုင်းမှာ ကြန့်ကြာစေပြီး ထူးခြားတဲ့ ရလဒ်ရဖို့ ခက်ခဲစေနိုင်ပါတယ်။ ဒါကြောင့် Gym ကစားတဲ့အခါ သတိထားဖို့လိုမယ့် မှားတတ်တဲ့အမှားတွေကို မျှဝေပေးချင်ပါတယ်။
(၁) Plan မရှိခြင်း
Gym ကစားတဲ့အခါ Plan ကအရမ်း အရေးကြီးပါတယ်။ Plan မရှိပဲ ကစားမယ်ဆိုရင် အချိန်ကုန် လူပင်ပန်းရုံကလွဲရင် ဘာမှသိသာပြောင်းလဲလာမှာ မဟုတ်ပါဘူး။ သေချာအစီအစဉ်တကျ ရေးဆွဲထားတဲ့ Workout Plan တစ်ခုနဲ့ စည်းစနစ်တကျ ကစားမှသာ ရည်မှန်းထားတဲ့ ဘော်ဒီတည်ဆောက်မှုပန်းတိုင်ကို ရောက်ရှိနိုင်မှာ ဖြစ်ပါတယ်။
(၂) ဝိတ်မ မခင် Cardio ကစားခြင်း
ပြင်းထန်တဲ့ ဝိတ်မလေ့ကျင့်ခန်းတွေ မလုပ်ခင်မှာ နာရီဝက်လောက် ပြေးစက်ပေါ်မှာ ပြေးလိုက်သလို Cardio ကစားတာက သာမာန် Gym ကစားသူတွေအတွက် အဆင်ပြေပေမယ့် bodybuilding လုပ်သူတွေအတွက်တော့ ဝိတ်တုံးတွေနဲ့ကစားတဲ့အခါ ပင်ပန်းနွယ်နယ်စေပြီး ထိထိရောက်ရောက် ကစားနိုင်မှာမဟုတ်သလို ထိခိုက်ဒဏ်ရာရနိုင်ခြေလည်း ပိုများစေပါတယ်။
(၃) ကစားနည်း အပြောင်းအလဲ မလုပ်ခြင်း
နေ့တိုင်းမှာ တူညီတဲ့ ကစားနည်းတွေ ၊ စက်တွေနဲ့ အကြိမ်ရေတွေကို ထပ်ခါတလဲလဲ ကစားနေမယ်ဆိုရင် အချိန်တိုအတွင်း ငြီးငွေ့လာနိုင်သလို ဘော်ဒီတည်ဆောက်မှုအပိုင်းမှာလည်း ကြန့် ကြာစေမှာပါ။
ဒါကြောင့် workout routine ကို ရက်သတ္တပတ်အနည်းငယ်ရောက်တိုင်းမှာ အပြောင်းအလဲ လုပ်ကစားသင့်ပြီး မတူညီတဲ့ ကစားနည်းတွေ ၊ စက်တွေနဲ့ အကြိမ်ရေ တိုးကစားတာမျိုး စသည့်ဖြင့် အပြောင်းအလဲ လုပ်ပေးဖို့လိုပါတယ်။
(၄) နားချိန် အကန့်အသတ် မထားခြင်း
လေ့ကျင့်ခန်းတစ်ခုနဲ့ တစ်ခုအကြားက အနားယူတဲ့အချိန်တွေဟာ Gym ကစားတဲ့သူတိုင်းအတွက် တန်ဖိုးရှိတဲ့အချိန်တွေဆိုတာ နားလည်ထားဖို့လိုပါတယ်။ နားချိန်ကို အကန့်အသတ် မထားပဲ ဖုန်းသုံးတာ ၊ တခြားသူတွေနဲ့ တော်ကီဖုတ်နေတာမျိုးဟာ တန်ဖိုးရှိတဲ့ ကစားချိန်တွေကို ဖြုန်းတီးပစ်ရာ ရောက်ပါတယ်။
လေ့ကျင့်ခန်း တစ်ခုပြီးတိုင်းမှာ နားချိန်ယူပါ။ ဒါပေမယ့် တစ်မိနစ်အောက်သာ အနားယူဖို့ ပရော်ဖက်ရှင်နယ် ကြံ့ခိုင်ရေးနည်းပြတွေက အကြံပြုထားပါတယ်။
