သဘာဝအတိုင်း ဆံသားနူးညံ့ပျော့ပြောင်းလာစေမယ့် နည်းလမ်းများ

ကိုယ့်ဆံသားက ကြမ်းလို့ဆိုပြီး စိတ်ညစ်နေတဲ့သူတွေအတွက် သဘာဝအတိုင်း ဆံသားနူးညံ့ ပျော့ပြောင်းလာစေမယ့် နည်းလမ်းတွေကို မျှဝေပေးလိုက်ပါတယ်။ ငွေအကုန်အကျသက်သာစေမယ့် နည်းလမ်းကောင်းတွေဖြစ်တာကြောင့် လူတိုင်းအလွယ်တကူ လုပ်လို့ရပါတယ်။

ပျားရည်နဲ့နွားနို့

နွားနို့ – ခွက်တစ်ဝက်စာနဲ့ ပျားရည် – ၂ ဇွန်းကို ရောမွှေပြီး ဆံသားအနှံ့ လိမ်းပေးပါ။ တစ်နာရီကြာအောင်ထားပြီးမှ ပုံမှန်အတိုင်း ခေါင်းလျှော်လိုက်ရုံပါပဲ။ ဒီနည်းလမ်းကို တစ်ပတ်တစ်ကြိမ် ပုံမှန်လုပ်ပေးမယ်ဆိုရင် ဆံသားနူးညံ့ပျော့ပြောင်းပြီး ဆံသားတောက်ပြောင်လာစေပါတယ်။

သင်္ဘောသီးနဲ့ဒိန်ချဉ်

သင်္ဘောသီးကို အခွံခွာ၊ အစေ့တွေဖယ်ပြီး ကိုယ့်ဆံသားနဲ့ အဆင်ပြေမယ့် ပမာဏလောက်ယူပြီး ပန်းကန်ထဲထည့်ချေပေးပါ။ ပြီးရင် ဒိန်ချဉ်နဲ့ရောပြီး ပျစ်ပျစ်လေးဖြစ်အောင် မွှေပေးပါ။ မွှေပြီးရင်တော့ ဆံသားအနှံ့ ဦးရေပြားကိုပါလိမ်းပြီး Massage လုပ်ပေးပါ။ တစ်နာရီခွဲလောက်ထားပြီးမှ ခေါင်းလျှော်ပေးပါ။ ဒီနည်းလမ်းကတော့ ဆံသားနူးညံ့ ပျော့ပြောင်းရုံတင်မဟုတ်ပဲ ဗောက်ပါပျောက်စေပါတယ်။

ကြက်ဥနဲ့ဒိန်ချဉ်

ကြက်ဥနဲ့ဒိန်ချဉ်ကို ရောခလောက်ကာမွှေပြီး ဆံသားအနှံ့လိမ်းပေးပါ။ တစ်နာရီလောက်ထားပြီးမှ ခေါင်းလျှော်ပါ။ ကြက်ဥအနံ့နံမှာစိုးရင် သံပယိုရည်ညှစ်ထည့်လို့ ရပါတယ်။ ဒီနည်းလမ်းကတော့ ဆံသားအတွက်လိုအပ်တဲ့ အာဟာရဓာတ်ကို ဖြည့်တင်းပေးပြီး ဆံသားနူးညံ့ ပျော့ပြောင်းစေပါတယ်။

Apple Cider Vinegar, Almond Oil နဲ့ ပျားရည်

Apple Cider Vinegar နဲ့ Almond Oil ကို ပန်းကန်ထဲ တစ်ဇွန်းစီ ထည့်ပေးပါ။ ပြီးရင် ပျားရည်ကို ၂ ဇွန်းထည့်ပြီး မွှေပေးပါ။ ပြီးရင်တော့ ဦးရေပြားနဲ့ ဆံသားကိုလိမ်းပေးပါ။ ဆံပင်ရှည်ရင် အဲ့ထက်များတဲ့ပမာဏ လုပ်ပေးပါ။ တစ်နာရီထားပြီးမှ ခေါင်းလျှော်ပေးပါ။ ဒီနည်းလမ်းကတော့ ဆံသားနူးညံ့ ပျော့ပြောင်းရုံတင်မဟုတ်ပဲ ဆံပင်ပျက်စီးနေတာတွေပါ သက်သာစေပါတယ်။

Almond Oil မရှိရင် သံလွင်ဆီသုံးလည်း ရပါတယ်။