အချစ်ခံရတဲ့ဘဝကြီးက အမြင်ကပ်ခံရတဲ့ဘဝထက်ဆိုင်ရင်တော့ အဆပေါင်းများစွာသာပါတယ်။ လူတိုင်းရဲ့ပါးစပ်ဖျားမှာ ကိုယ်ကဘယ်လိုပေါင်းလို့ကောင်းတာ၊ ဘယ်လိုလိုက်လျောညီထွေရှိတာစသဖြင့် ကောင်းသတင်းမွှေးလေလေ ဘဝတက်လမ်းအတွက် အထောက်အကူဖြစ်လေပါ။
ဒီလိုဆို လူအများအချစ်ခံရတဲ့မိန်းကလေးဖြစ်ဖို့ လိုက်နာသင့်တဲ့အချက်လေးတွေက ဘာတွေများဖြစ်နေမလဲလို့ ကြည့်လိုက်ကြရအောင်ပါ။
၁။ တူညီမှုကိုရှာပါ
Source: freepik.com
အလွယ်ကူဆုံးနည်းလမ်းပါပဲ။ ခွေးချစ်တတ်တဲ့သူနဲ့ခွေးအကြောင်းပြော၊ရုပ်ရှင်ချစ်တတ်သူနဲ့ရုပ်ရှင်အကြောင်းပြောပေါ့။ သင်ဘာမှမသိလည်း နားထောင်ပေးလို့ရပါတယ်။ ပြောနေတဲ့အကြောင်းအရာကို သင်စိတ်မဝင်စားဘူးဆိုရင်တောင် ခဏလောက်ပဲဖြစ်ဖြစ်ဟန်ဆောင်နားထောင်ပေးလိုက်ပါ။ ဒါမှသင်တို့နှစ်ယောက်ကြားက ရင်းနှီးတွေတိုးတက်လာမှာပါ။
၂။ အကောင်းဘက်ကတွေးပြောပါ
Source: yogajournal.com
စကားပြောနေတဲ့သူကို ကန့်လန့်တိုက်ပြီးလိုက်မပြောပါနဲ့။ သူကဒီအစားအစာ စားကောင်းတယ်လို့ပြောရင် သင်ကအဲဒီအစားအစာကို အပြစ်ပြောပြီး တခြားအစားအစာအကြောင်း ထပ်ပြောလိုက်မယ်ဆို တခြားသူရဲ့ရွေးချယ်မှုကို ရှုံု့ချရာကျသွားပါတယ်။ ဒီနေရာလေးကသာယာလိုက်တာလို့ပြောရင် တခြားနေရာကပိုကောင်းကြောင်းပြောတာတွေစသဖြင့် အမြဲဆန့်ကျင်ဘက်တွေကြီးလိုက်ပြောနေမယ်ဆို သင့်ကိုဆရာလုပ်တယ်လို့ထင်ပြီး လူအမြင်ကပ်သွားပါလိမ့်မယ်။ ဒါကြောင့်အကောင်းဘက်ကနေသာ ရေလိုက်ငါးလိုက်ပြောပေးပါ။
၃။ ကိုယ့်အကြောင်းသိပ်မပြောပါနဲ့
Source: taketheleadwomen.com
လူတွေက ကိုယ့်ကိုယ်ကိုယ်သာစိတ်အဝင်စားဆုံးပါ။ (၂၄) နာရီလုံးလုံး သင့်ဒရမ်မာတွေ၊ သင့်အတွေ့အကြုံတွေကြီးနားထောင်ပေးနေရအောင် ဘဝကရုပ်ရှင်မဟုတ်ပါဘူး။ တခြားသူပြောတာကိုလည်း နားထောင်ပေးပါ။ ကိုယ့်အကြောင်းတွေကြီး စွတ်ပြောတတ်တဲ့အကျင့်ကို ဖျောက်ပါ။ ကိုယ့်ဆန္ဒကိုလည်း အရမ်းရှေ့တန်းမတင်ပါနဲ့။
၄။ နာမည်ခေါ်ပေးပါ
Source: Shutterstock
ချစ်တို့၊ သည်းတို့အစား နာမည်အစားထိုးခေါ်ပေးပါ။ လူတွေက သူတို့နာမည်ကိုခေါ်တတ်တဲ့သူဆို ပိုပြီးစိတ်စွဲတတ်ကြပါတယ်။ ဟဲ့တို့၊ အစ်ကိုတို့၊ အစ်မတို့စသဖြင့်ခေါ်တာထက် နာမည်လေးပါတပ်ပြီးခေါ်ကြည့်ပါ။ တစ်ဖက်လူစိတ်ထဲသင်ဆိုတာကို ပိုနေရာယူသွားပါလိမ့်မယ်။
၅။ ဖုန်းကိုဝေးဝေးမှာထားပါ
Source: starmagazine.com
စကားပြောနေတုန်းဖုန်းသုံးတဲ့သူကို ဘယ်သူမှမကြိုက်ကြပါဘူး။ အမျိုးတူဆိုရင်တော့ မပြောတတ်ဘူးပေါ့။ ဟုတ်တယ်လေ … တစ်ဖက်ကလေးလေးနက်နက်ပြောနေတုန်းမှာ ကိုယ်ကဖုန်းလေးပွတ်လိုက်၊ Chatting လေးထိုင်လိုက်ဆို ဘယ်သူကကြိုက်မှာလဲနော်။ တစ်ဖက်လူကို မလေးစားရာသိပ်ရောက်ပါတယ်။
၆။ စိတ်သက်သာရာရအောင်ထားပါ
Source: Shutterstock
သင်နဲ့ပေါင်းနေတဲ့သူကို စိတ်သက်သာရာရအောင်ထားပါ။ ငါအဲဒီတစ်ယောက်နဲ့မသွားချင်ဘူးဆိုတာမျိုး ကိုယ့်နောက်ကွယ်မှာအတင်းတုတ်ရလောက်တဲ့ထိ မဖြစ်ပါစေနဲ့။ တစ်ဖက်လူကို သိပ်ဖိအားမပေးပါနဲ့။ သဘောကတော့ သင်ကအရမ်းကြီးအသန့်ကြိုက်နေတာမျိုး၊ ချောမှ၊ လှမှာပေါင်းချင်တာမျိုး၊ ပိုက်ဆံရှိမှ၊ သွားနေလာနေနိုင်မှပေါင်းချင်တာမျိုး အဲဒီလိုလူမဖြစ်စေနဲ့။ လူတိုင်းရဲ့အချစ်ခံချင်ရင်တော့ လူတိုင်းနဲ့လိုက်လျောညီထွေရှိဖို့လိုပါတယ်။
