မနက်ခင်းတိုင်းမှာ ခေါင်းကြည်လင်ပြီးစိတ်ပျော်ရွှင်စွာနဲ့နိုးထနိုင်ဖို့ ကူညီပေးနိုင်တဲ့အချက်များ

မနက်အိပ်ယာနိုးတာနဲ့ ခေါင်းကြည်လင်ပြီး စိတ်ပျော်ရွှင်နေမှ တစ်နေကုန်လန်းဆန်းပြီး စိတ်ကြည်လင်မယ်၊ ပျော်ရွှင်မယ်။ ဒါမှလည်း ဘာလုပ်လုပ် အဆင်ပြေမှာပေါ့။ အိပ်ယာနိုးတာနဲ့ ခေါင်းမကြည်မလင်ဖြစ်နေရင် နေရတာလည်း နုံးပြီး စိတ်တိုမယ်၊ ဘာလုပ်လုပ်လည်း စိတ်မရှည် အဆင်မပြေတွေ ဖြစ်တတ်ပါတယ်။ ဒါကြောင့် မနက်ခင်းတိုင်းမှာခေါင်းကြည်လင်ပြီး စိတ်ပျော်ရွှင်စွာနဲ့နိုးထနိုင်ဖို့ ဒီအချက်လေးတွေက ကူညီပေးပါလိမ့်မယ်။

အိပ်ရေးဝဖို့ စောစောအိပ်ပါ

အိပ်ရေးဝဖို့အတွက် ညဘက်စောစောအိပ်ဖို့လိုပါတယ်။ ဒါမှ မနက်ခင်းတိုင်းမှာ ခေါင်းကြည်လင်ပြီး စိတ်ပျော်ရွှင်စွာနဲ့ နိုးထနိုင်မှာပါ။ အိပ်ရေးမဝရင် ခေါင်းလည်းမကြည်သလို၊ စိတ်လည်းကြည်မှာ မဟုတ်ပါဘူး။

စိတ်ညစ်စရာတွေ သိပ်မတွေးပါနဲ့

စိတ်ညစ်စရာ၊ စိုးရိမ်ပူပန်စရာတွေကို တွေးနေရင် တော်ရုံနဲပအိပ်မပျော်ပါဘူး။ အိပ်ပျော်သွားရင်လည်း ခဏခဏ လန့်နိုးတတ်ပါတယ်။ ဒီလိုဆို ကောင်းကောင်းမအိပ်ရတော့ အိပ်ရေးပျက်ပြီး စိတ်မကြည်လင်၊ ခေါင်းမကြည်လင်ဖြစ်သွားပါလိမ့်မယ်။

ညဘက်မှာအရက်ကိုအလွန်အကျွံမသောက်ပါနဲ့

ညဘက်မှာ အရက်ကို အလွန်အကျွံသောက်ရင် မနက်မိုးလင်းလို့ အိပ်ယာနိုးတာနဲ့ လုံးဝခေါင်းမကြည်ပါဘူး။ တစ်နေကုန်ထိုင်းမှိုင်းနေတာမျိုး ဖြစ်တတ်ပါတယ်။

အိပ်ရတာသက်တောင့်သက်သာရှိဖို့

အိပ်ယာက သန့်ရှင်းမှုရှိဖို့လိုသလို၊ အိပ်ရတာလည်း သက်တောင့်သက်သာရှိဖို့လိုပါတယ်။ ဒါမှ နှစ်နှစ်ခြိုက်ခြိုက် အိပ်ပျော်နိုင်မှာပါ။ အိပ်ယာမသန့်ရင် ယားတာမျိုး၊ စိတ်ရှုပ်တာမျိုးဖြစ်ပြီး အိပ်ရေးပျက်ပါလိမ့်မယ်။ အိပ်ယာက သက်တောင့်သက်သာမဖြစ်ရင်လည်း မိုးလင်းလို့ အိပ်ယာနိုးတာနဲ့ ကိုယ်လက်မအီမသာဖြစ်တာမျိုး၊ နုံးချိနေတာမျိုး ဖြစ်တတ်ပါတယ်။

Photo Source: www.freepik.com