ဆောင်းရာသီမှာဆိုရင် အသားအရေက ပိုပြီးတော့ ခြောက်သွေ့ပျက်စီးလွယ်တဲ့အတွက် Skincare ကို ပိုလုပ်ပေး၊ ပိုဂရုစိုက်ပေးရပါတယ်။ ဆောင်းရာသီမှာ Skincare သေချာမလုပ်မိရင်တော့ အသားအရေအတွက်ဖြစ်လာမယ့် ဆိုးကျိုးတွေ ရှိပါတယ်။
အဓိကကတော့ ဆောင်းရာသီမှာအသားခြောက်တဲ့အတွက် Skincare ကို ပုံမှန်ထက်ပိုလုပ်ရပါမယ်။ ပုံမှန်လိမ်းနေကျ Toner, Moisturizer လိမ်းရုံနဲ့ မရတော့ပါဘူး။ နောက်ကနေ Serum သေချာလိမ်းတာမျိုး လုပ်ပေးရပါမယ်။ မနက်ည သေချာလိမ်းပေးရပါမယ်။ မဟုတ်ရင်တော့ အသားအရေက ပုံမှန်ထက် ပိုခြောက်သွေ့ပြီး အသားပတ်တာမျိုး၊ အသားပတ်ပြီး အဖြူဖတ်လေးတွေလန်တာမျိုးပါ ဖြစ်လာပါလိမ့်မယ်။
ဆောင်းရာသီမှာ Skincare သေချာလိမ်းပြီး Exfoliate or Scrub ကို တစ်ပတ်တစ်ခါ လုပ်ပေးပါ။ ဒါပေမယ့် အသားခြောက်တဲ့သူတွေကတော့ ၁၀ ရက်တစ်ခါလောက်ပဲ လုပ်ပေးပါ။ ဒါမှ အသားအရေက ကြည်ကြည်လင်လင်ဖြစ်နေမှာပါ။ ဒီတိုင်း ဘာမှသေချာမလုပ်ပဲ ပစ်ထားမယ်ဆိုရင်တော့ မျက်နှာအသားအရေက အရင်ထက်ပိုပြီးတော့ မွဲခြောက်ခြောက်နဲ့ ညစ်ညစ်ကြီးဖြစ်လာပါမယ်။
ဆောင်းရာသီမှာ မျက်နှာအသားအရေကို သေချာဂရုမစိုက်ရင်၊ Skincare သေချာမလိမ်းပေးရင် အသားအရေက မွဲခြောက်ပြီး ညစ်ညစ်ကြီးဖြစ်နေတဲ့အတွက် မိတ်ကပ်လိမ်းရင်လည်း ကြည့်ရဆိုးစေပါတယ်။ မိတ်ကပ်ကွက်တာမျိုး၊ မိတ်ကပ်လိမ်းရင် မညီတာမျိုး၊ မိတ်ကပ်က ဖုံဖုံကြီးဖြစ်ပြီး သိပ်သိပ်ညက်ညက်လေး မဖြစ်တော့ပါဘူး။ အရမ်းအသားခြောက်တဲ့သူဆို အဖြူအကွက်တွေပါ ဖြစ်နေတတ်ပါတယ်။
Body ကိုလည်း Care ပေးဖို့ မမေ့ပါနဲ့။ ဆောင်းရာသီမှာ အသားအရမ်းပတ်တဲ့အတွက် မနက်တစ်ခါ၊ ညတစ်ခါ Lotion သေချာလိမ်းပေးမှ အသားလုံးဝမပတ်မှာပါ။ တစ်ပတ်တစ်ခါလည်း Body Scrub လုပ်ပေးဖို့ မမေ့ပါနဲ့။ ဆောင်းရာသီမှာ Lotion မလိမ်း၊ Scrub မလုပ်ရင် အသားအရေက ခြောက်သွေ့ပြီး ကြမ်းကြမ်းကြီး ဖြစ်နေမှာပါ။
