ကိုယ့်ရည်းစားစိတ်ညစ်နေချိန်မှာမလုပ်သင့်တဲ့အရာများ

ကိုယ့်ရည်းစားက စိတ်ညစ်နေချိန်၊ stress တွေများပြီး ပူပင်သောကရောက်နေချိန်မှာ အားပေးနှစ်သိမ့်တာမျိုးတွေ လုပ်ပေးရမှာပါ။ အဲ့လိုမဟုတ်ပဲ မလုပ်သင့်တဲ့အရာတွေ လုပ်မိနေမယ်၊ ပြောဆိုမိနေမယ်ဆိုရင်တော့ မလိုလားအပ်တဲ့ပြဿနာတွေ ဖြစ်လာပြီး တစ်ဖက်လူကလည်း ကိုယ့်ကို စိတ်ပျက်သွားနိုင်ပါတယ်။ ဒါကြောင့် ကိုယ့်ရည်းစားစိတ်ညစ်နေချိန်မှာ ဆင်ခြင်လို့ရအောင် မလုပ်သင့်တဲ့အရာတွေကို ပြောပြပေးလိုက်ပါတယ်။

အပြစ်တင်ဝေဖန်တာ

ကိုယ့်ရည်းစားစိတ်ညစ်နေချိန်မှာ အားပေးစကားတွေပြောပြီး နှစ်သိမ့်ပေးရမယ့်အစား အပြစ်တင်စကားတွေပြောပြီး ဝေဖန်နေမယ်ဆိုရင် တစ်ဖက်လူကလည်း ပိုစိတ်တိုဒေါသထွက်ပြီး ရန်ဖြစ်စကားများကုန်ကြမှာပါ။ ဒါကြောင့် ဘယ်သူ့ပဲဖြစ်ဖြစ် စိတ်ညစ်နေချိန်မှာ အပြစ်တင်ဝေဖန်တာမျိုးတွေမလုပ်ပဲ စကားအပြောအဆို ဆင်ခြင်သင့်ပါတယ်။

စိတ်ဆိုးစိတ်ကောက်တာ

သူများစိတ်ညစ်နေချိန်မှာ ကိုယ့်အလိုမကျမှုတွေကြောင့် စိတ်ဆိုးစိတ်ကောက်တာမျိုး မလုပ်သင့်ပါဘူး။ တစ်ဖက်မှာလည်း သူ့အပူနဲ့သူမို့ ချော့နိုင်မှာမဟုတ်ပါဘူး။ ပိုပြီးစိတ်အနှောင့်အယှက်ဖြစ်စရာ ဖြစ်သွားပါလိမ့်မယ်။

ပြဿနာရှာတာ

ကိုယ့်ရည်းစားစိတ်ညစ်နေချိန်မှာ ပြဿနာရှာတာဟာ နားလည်မှုမရှိရာကျပါတယ်။ ပြဿနာရှာလို့လည်း တစ်ဖက်လူက ဖြေရှင်းနိုင်မှာမဟုတ်ပါဘူး။ နားလည်မရှိတဲ့သူတစ်ယောက်လို့မြင်ပြီး စိတ်ပျက်သွားနိုင်ပါတယ်။ ကိုယ့်ကြောင့် ပိုပြီးစိတ်ညစ်သွားပါလိမ့်မယ်။ ဒေါသထွက်တတ်တဲ့သူဆိုရင် ပိုစိတ်တိုပြီး ရန်ဖြစ်စကားများတာမျိုး၊ မပြောသင့်တဲ့စကားတွေပါ ထွက်လာတာမျိုး ဖြစ်တတ်ပါတယ်။

လုံးဝဂရုမစိုက်ပဲပစ်ထားတာ

ကိုယ့်ရည်းစားစိတ်ညစ်နေချိန်၊ စိတ်ဓာတ်ကျပြီး စိတ်ဖိစီးမှုတွေများနေချိန်မှာ အားပေးနှစ်သိမ့်ပြီး အနားမှာရှိနေပေးရမှာပါ။ အနားမှာမနေပေးနိုင်တောင် စကားနဲ့ပဲဖြစ်ဖြစ် အဝေးကနေ ကြင်နာပေးရမှာ၊ ဂရုစိုက်ပေးရမှာပါ။ အဲ့လိုမဟုတ်ပဲ လုံးဂရုမစိုက်ပဲ ပစ်ထားတာမျိုးကတော့ မလုပ်သင့်ပါဘူး။