Social Media သုံးစွဲခြင်းကိုလျော့ချလိုက်သင့်တဲ့အကြောင်းအရင်းတချို့

Social Media ကို အပျင်းပြေဖို့၊ စိတ်ပျော်ရွှင်ဖို့၊ စိတ်အပန်းဖြေဖို့အတွက် သုံးကြပေမယ့် တစ်ခါတစ်လေကျရင် Social Media ကြောင့်ပဲ စိတ်အနှောင့်အယှက်ဖြစ်ရတတ်ပါတယ်။ အမြဲတမ်းတစ်ချိန်လုံး ဒါပဲသုံးနေမိတယ်၊ ဒီ Social Media သုံးစွဲမှုကို အလွန်အကျွံဖြစ်နေတယ်ဆိုရင်တော့ Social Media သုံးစွဲခြင်းကို လျော့ချလိုက်သင့်ပါတယ်။ ဘယ်လိုအကြောင်းအရင်းတွေကြောင့် သုံးစွဲခြင်းကို လျော့ချလိုက်သင့်လဲဆိုရင်တော့……..

အချိန်တွေကုန်ဆုံးစေတယ်

တစ်ခါတစ်လေပျင်းလို့သုံးတာက ဘာမှမဖြစ်ပေမယ့် အမြဲတမ်း တစ်ချိန်လုံး ဒီ Social Media မှာပဲ အချိန်ကုန်နေမယ်၊ ဒါပဲ တစ်ချိန်လုံးသုံးနေမယ်ဆိုရင်တော့ အကျိုးရှိတဲ့အချိန်တွေ ပုပ်သွားစေပါတယ်။ ဒီ Social Media နဲ့ အလုပ်လုပ်နေရတာ၊ ပိုက်ဆံရှာနေရတာမဟုတ်ရင် လျော့သုံးတာ အကောင်းဆုံးပါပဲ။

အခြားသူတွေအပေါ်မှာပဲအာရုံရောက်နေမိတယ်

Social Media ကို အလွန်အကျွံသုံးမိတဲ့အခါ ကိုယ့်ကိုယ်ကို Focus ထားဖို့ထက် အခြားသူတွေအပေါ်မှာပဲ Focus ထားပြီး အာရုံရောက်နေပါလိမ့်မယ်။ သူများဘယ်လိုသုံးတယ်၊ ဘယ်လိုဝတ်တယ်၊ ဘယ်လိုလုပ်တယ်ဆိုတာတွေကို လိုက်ကြည့်နေမိပြီး ကိုယ်တိုင်လည်း အဲ့လိုတွေလုပ်ချင်လာမယ်၊ သူ့လိုလည်းမဖြစ်ဘူးဆိုတဲ့ အတွေးတွေ၊ အားငယ်စိတ်တွေစတဲ့ စိတ်ပိုင်းဆိုင်ရာ ပြဿနာတွေအထိ ဖြစ်လာနိုင်ပါတယ်။

ကိုယ့်ပန်းတိုင်ကိုအာရုံထွေပြားစေတယ်

တချို့ဆိုရင် ကိုယ့်ပန်းတိုင်ကိုမေ့ပြီး သူများယောင်တိုင်းလိုက်ယောင်မိတတ်ကြတယ်။ သူများက ဒါလုပ်လို့အောင်မြင်တယ်ဆိုရင် ဒါလုပ်ချင်သွားတယ်။ နောက်တစ်ယောက်က ဒါလုပ်လို့အောင်မြင်တယ်ဆိုရင်လည်း ဒီဟာကိုလုပ်ချင်သွားပြန်ရော၊ ကိုယ့်ပန်းတိုင်၊ ကိုယ်ဖြစ်ချင်တာတွေကို မေ့ပြီး အာရုံတွေ ထွေပြားသွားစေပါတယ်။

စိတ်ဖိစီးမှုရစေတယ်

အဆိုးဆုံးကတော့ အပေါ်မှာပြောခဲ့သလိုပဲ စိတ်ပိုင်းဆိုင်ရာပြဿနာတွေအထိ ဖြစ်လာနိုင်ပါတယ်။ အဓိကကတော့ စိတ်ဖိစီးမှုရစေတယ်။ အားငယ်စိတ်တွေဝင်စေတယ်။ ဒေါသဖြစ်စေပါတယ်။