ကိုယ့်ရဲ့ နေထိုင်မှုပုံစံကြောင့် မျက်နှာပေါ်မှာ ဝက်ခြံတွေ အမည်းစက်တွေ အရေးကြောင်းတွေ ဖြစ်ပေါ်စေပါတယ်။

ဝက်ခြံထွက်တာလည်းမပြောနဲ့လေ အစားအသောက်ဂရုမစိုက် ကိုယ့်ကိုကိုယ်လည်းဂရုမစိုက်ဖြစ်နေတာကိုး လို့ တခြားသူကိုယ့်အပေါ် မှတ်ချက်ပေးနေပြီလား။ ဒါမှမဟုတ် ကိုယ့်ရဲ့ နေပုံထိုင်ပုံတွေက ဝက်ခြံဖြစ်နေသလား။

ဒီတော့ အသားအရေ ကျန်းမာစိုပြေနေဖို့ မလုပ်သင့်တဲ့အရာတွေကို မျှဝေပေးချင်ပါတယ်။

မိတ်ကပ်အဖွေးသားနဲ့ အိပ်ယာဝင်ခြင်း

အိပ်ယာမဝင်ခင်မှာအနည်းဆုံးတော့ မိတ်ကပ်ဖျက် မျက်နှာသစ်ပေးသင့်ပါတယ်။ ဒါပေမယ့် လူတွေအများအားဖြင့်တော့ အိပ်ယာဝင်ခါနီးမှာ မျက်နှာသစ်ဖို့ မေ့လျှော့တတ်ကြပါတယ်။

နေရောင်ကာတဲ့ ခရင်မ်မလိမ်းခြင်း

UV ကာကွယ်ပေးတဲ့ ခရင်မ်တွေ မလိမ်းတာဟာ အသားအရေကို ဆိုးဆိုးရွားရွားပျက်ဆီးစေပါတယ်။ UV ကာကွယ်ပေးတဲ့ ခရင်မ်မပါဘဲ နေရောင်ထိတွေ့တာများရင် အရေပြားကင်ဆာထိဖြစ်နိုင်ပါတယ်။

ညည့်နက်မှအိပ်ယာဝင်ခြင်း

ညည့်နက်မှအိပ်ယာဝင်မယ်ဆိုရင် အသားအရခြောက်သွေ့ပြီး ပင်ပန်းနွမ်းနယ်တဲ့ပုံဖြစ်စေပါတယ်။ အိပ်ရေးမဝတာက အသားအရေကို ဆိုးဆိုးရွားရွားပျက်ဆီးစေပြီး ဝက်ခြံဖြစ်စေပါတယ်။

ဝက်ခြံညှစ်ခြင်း

ဝက်ခြံထွက်ပြီဆိုရင် မနေနိုင်မထိုင်နိုင် ဝက်ခြံညှစ်တတ်ပါတယ်။ ဒါဟာ သိပ်ကိုဆိုးရွားတဲ့ လုပ်ရပ်တစ်ခုပါပဲ။ လက်မှာ ဘက်တီးရီးယားတွေကပ်ပါလာနိုင်တာကြောင့် ဝက်ခြံကို ပိုကြီးစေသလို ပျံ့စေပါတယ်။ ဒါ့အပြင် ဝက်ခြံပျောက်သွားရင်လည်း အမာရွတ်တွေ ကျန်ရစ်နိုင်ပါတယ်။

ရေနွေးနဲ့ခေါင်းလျှော်ရေချိုးခြင်း

ရေနွေးနဲ့ ခေါင်းလျှော်ရေချိုးတာဟာ အပန်းပြေစေသလို ပင်ပန်းနွမ်းနယ်မှု ပျောက်စေတာမှန်ပါတယ်။ ဒါပေမယ့် အဲလိုရေချိုးပြီးရင်တော့ အသားအရေကို စိုပြေစေတဲ့ ခရင်မ်တွေ လိမ်းပေးသင့်ပါတယ်။ မဟုတ်ရင်တော့ အသားအရေ ခြောက်သွေ့နိုင်ပါတယ်။

ဆေးလိပ်သောက်ခြင်း

ဆေးလိပ်သောက်တာဟာ နှုတ်ခမ်းကိုခြောက်သွေ့ မည်းညစ်စေရုံသာမကဘဲ အသားအရေကိုလည်း ပျက်ဆီးစေပါတယ်။

ကော်ဖီအစား ရေများများသောက်ပါ

ကော်ဖီကို လုံးဝမသောက်ရဘူးလို့တော့ ဆိုချင်တာမဟုတ်ပါဘူး။ ဒါပေမယ့် ကော်ဖီအလွန်အကျွံသောက်တာဟာ အသားအရေကို အိုမင်းရင့်ရော်စေပါတယ်။ အဲဒီအစား ရေများများသောက်ပေးပါ။

မျက်နှာအလွန်အကျွံသစ်ခြင်း

တချို့တွေဆိုရှိပါတယ်။ မျက်နှာကို တစ်နေ့ ခဏခဏသစ်တာပါ။ အဲလိုမျက်နှာကို ခဏခဏသစ်တာဟာ အရေးကြောင်းတွေဖြစ်ပေါ်စေပါတယ်။ တကယ်တော့ မျက်နှာကို မနက် ၁ ခါ ည ၁ ခါသာသစ်ပေးပါ။

မျက်နှာကို မကြာခဏထိတွေ့ကိုင်တွယ်ခြင်း

ခဏခဏပဲ လက်နဲ့ မျက်နှာကို ထိထိနေတာဟာ ဝက်ခြံဖြစ်စေပါတယ်။

ညဖက်မှာ ကိတ်စားခြင်း

ကိတ်မုန့်ကို ညဖက်မှာ စားပေးတာဟာ သကြားဓါတ်ပါဝင်မှုများလို့ အသားအရေကို ပျက်ဆီးစေပါတယ်။ အိုမင်းရင့်ရော်စေသလို အရေးကြောင်းတွေဖြစ်စေပါတယ်။