မင်္ဂလာပါနော်။ မျက်နှာသစ်တာဟာ အသားအရေ ထိန်းသိမ်းတဲ့ နည်းလမ်းထဲမှာ တစ်ခုအပါအဝင်ဖြစ်ပါတယ်။ အသားအရေထိန်းသိမ်းဖို့အတွက် ကျွန်မတို့တွေအားလုံး ပထမဆုံး လုပ်ကြတာကတော့ မျက်နှာသစ်တာပါပဲ။ မျက်နှာသစ်တဲ့အခါ မျက်နှာပေါ်က အဆီပိုတွေ၊ အညစ်အကြေးတွေ အားလုံးကို စင်အောင်သစ်ဖို့အရေးကြီးပါတယ်။ ဒါပေမယ့် သင်သတိမထားမိဘဲ အခုဖော်ပြမယ့် အမှားတွေကို ပြုလုပ်မိနေရင် အခုပဲရှောင်ရှားလို့ရအောင် မျှဝေပေးလိုက်မယ်နော်။

လက်မဆေးဘဲ မျက်နှာသစ်ခြင်း

လက်မဆေးဘဲ မျက်နှာသစ်တာဟာ သင့်အသားအရေကို ပိုလို့ပျက်စီးစေပါတယ်။ အရင်ဆုံး လက်မှာပေနေတဲ့ ဘက်တီးရီးယားတွေ စင်အောင်လက်ကိုသေချာဆေးပေးဖို့လိုပါတယ်။

ရေပူပူနဲ့ မျက်နှာသစ်ခြင်း

ရေနွေးပူပူနဲ့ မျက်နှာသစ်တာဟာလည်း သင့်အသားအရေကို ခြောက်သွေ့စေပါတယ်။ ဒါ့အပြင် နောက်ပိုင်းမှာအဆီပြန်လွယ်စေပါတယ်။ ဒါ့ကြောင့် ရေကို အရမ်းလည်းမပူ အရမ်းလည်းမအေးတာနဲ့ သစ်ပေးလိုက်ပါ။

Cleansing နှစ်ကြိမ် မလုပ်ခြင်း

သင့်မျက်နှာပေါ်မှာ လိမ်းထားတဲ့ မိတ်ကပ်တွေ အားလုံးစင်သွားအောင် Cleanser (သို့) တိုနာနဲ့ အရင်ဆုံး ဖယ်ရှားပေးလိုက်ပါ။ ပြီးတော့မှ မျက်နှာသစ်ဆပ်ပြာနဲ့ မျက်နှာသစ်ပေးရမှာဖြစ်ပါတယ်။ မဟုတ်ဘဲ တစ်မျိုးပဲလုပ်ရင်တော့ အညစ်အကြေးတွေလည်း သေချာသန့်စင်သွားမှာ မဟုတ်ပါဘူး။

ညအိပ်ယာမဝင်ခင် မျက်နှာမသစ်ခြင်း

ညအိပ်ယာမဝင်ခင် မျက်နှာမသစ်တာဟာ သင့်အသားအရေကို များစွာထိခိုက်ပျက်စီးစေပါတယ်။ ဒါ့ကြောင့် မိတ်ကပ်ကိုသေချာဖျက်ပြီး၊ မျက်နှာသေချာသစ်ပြီးမှ အိပ်ယာဝင်ပါ။

မျက်နှာသစ်ဆပ်ပြာကို အချိန်အကြာကြီး မျက်နှာမှာ ထားခြင်း

မျက်နှာသစ်ဆပ်ပြာကို အချိန်အကြာကြီး ထားတာဟာ သင့်အသားအရေကို ပိုလို့ပျက်စီးစေပါတယ်။ စက္ကန့် ၂၀ ကနေ ၃၀ ထက်ပိုပြီးမထားသင့်ပါဘူး။ အသားအရေခြောက်သွေ့ပြီး နီလာတတ်ပါတယ်။