အဝတ်အစားဝတ်တဲ့အခါမှာ ကိုယ့်အသားအရောင်နဲ့ လိုက်ဖက်တဲ့အရောင်လေးတွေကို သေချာရွေးဝတ်တတ်ရင်တော့ အမြဲတမ်းဖက်ရှင်ကျပြီး လှနေမှာပါ။ ဘယ်လိုအသားအရောင်မျိုးပဲဖြစ်ဖြစ် သူ့အလှနဲ့သူ တစ်မျိုးစီဆွဲဆောင်မှုရှိပြီး လှပါတယ်။ ဒါကြောင့် အသားဖြူတဲ့သူ၊ အသားလတ်တဲ့သူ၊ အသားညိုတဲ့သူ အားလုံးအတွက် ကိုယ့်အသားအရောင်နဲ့ လိုက်ဖက်မှုရှိပြီး လှနေစေမယ့် အဝတ်အစားကာလာလေးတွေကို ပြောပြပေးလိုက်ပါတယ်။
Lighter skin tones (အသားဖြူတဲ့သူ)
အသားဖြူတဲ့သူကတော့ ကာလာမရွေးပါဘူး။ အကုန်လုံးနဲ့လိုက်ဖက်တာပါပဲ။ ဒါပေမယ့် မှောင်တဲ့အရောင်တွေနဲ့ဆိုရင်တော့ မျက်နှာပိုလင်းသွားပြီး အသားဖြူတာ ပိုပေါ်လွင်စေပါတယ်။ အထူးသဖြင့် မြစိမ်းရောင်၊ ကြက်သွေးရင့်ရောင်၊ အပြာရင့်ရောင်၊ ခရမ်းရင့်ရောင်တွေနဲ့ ပိုပြီးလိုက်ဖက်ပါတယ်။ အဲ့ဒီကာလာတွေဝတ်ရင် ပိုပြီးဆွဲဆောင်မှုရှိစေပါတယ်။
Medium skin tones (အသားလတ်တဲ့သူ)
အသားလတ်တဲ့သူတွေကလည်း ကာလာတော်တော်များများနဲ့ လိုက်ဖက်ပါတယ်။ ဒါပေမယ့် တချို့အရောင်တွေကျတော့ ဝတ်လိုက်ရင် အသားမွဲသလို ဖြစ်သွားစေပါတယ်။ တချို့အရောင်တွေကျတော့လည်း ဝတ်လိုက်ရင် အသားဆောင်ပြီး ပိုလှသွားစေပါတယ်။ အသားလတ်တဲ့သူတွေက အထူးသဖြင့် အဝါနဲ့လိမ္မော်များတဲ့ အရောင်တွေနဲ့ဆို ပိုလိုက်ပါတယ်။ အသားဆောင်ပြီး အသားအရောင် ပိုလင်းသွားစေပါတယ်။ ဒါ့အပြင် အပြာရောင်၊ ခရမ်းရောင်နဲ့လည်း အရမ်းလိုက်ဖက်ပါတယ်။
Darker skin tones (အသားညိုတဲ့သူ)
အသားညိုတဲ့သူတော်တော်များများက အဖြူရောင်တွေကို ရှောင်တတ်ကြပါတယ်။ တကယ်တော့ အသားညိုတဲ့သူတွေက တည်ငြိမ်တဲ့ကာလာတွေ၊ အဖြူရောင်၊ အမဲရောင်တွေနဲ့ ပိုပြီးလိုက်ဖက်တာပါ။ ကိုယ့်အသားအရောင်နဲ့ဆို အဲ့ကာလာလေးတွေနဲ့က ပိုပြီးဆွဲဆောင်မှုရှိစေတာပါ။ ဒါ့အပြင် အသားညိုတဲ့သူတွေ အညိုရောင်ဝတ်ရင် အရမ်းမိုက်ပြီး ဆွဲဆောင်မှုအပြည့်ရှိစေပါတယ်။
