ပျိုမေတို့အတွက် ရုံးသွားရုံးတက် ပေါ့ပေါ့ပါးပါးနဲ့ စမတ်ကျစေမယ့် ဝမ်းဆက်ဖက်ရှင်

ပျိုမေတို့အတွက် ရုံးသွားရုံးတက် ပေါ့ပေါ့ပါးပါးနဲ့ စမတ်ကျစေမယ့် ဝမ်းဆက်ဖက်ရှင်များ

အားလုံးပဲ မင်္ဂလာပါနော်။ ရုံးတက်နေရတဲ့ပျိုမေတို့အတွက် မနက်တိုင်း အဝတ်အစားရွေးဖို့ အချိန်ကုန်ခံပြီး ခေါင်းစားစရာမလိုအောင် သက်တောင့်သက်သာရှိပြီး စမတ်လည်းကျမယ့် အပေါ်အောက် ဝမ်းဆက်ဖက်ရှင်လေးတွေကို ဖော်ပြပေးလိုက်ပါတယ်။ ဝမ်းဆက်တွေက အတွဲအစပ်စဉ်းစားဖို့မလိုဘဲ ကောက်စွပ်လိုက်ရုံပဲမို့ အပြင်အမြဲလိုလိုထွက်ရတဲ့သူတွေအတွက် ဝတ်ရလွယ်ကူပါတယ်။ အခုနောက်ပိုင်းမှာ ဝမ်းဆက် Ready Made ဖက်ရှင်လေးတွေခေတ်စားလာသလို ကိုယ်တိုင်ချုပ်ဝတ်မယ်ဆိုရင်လည်း ကိုယ်နဲ့ Fit ဖြစ်တဲ့ ဝတ်စုံမျိုးရစေမှာဖြစ်လို့ ဝမ်းဆက်လှလှလေးတွေ ချုပ်ဝတ်တာက မမှားပါဘူး။ အောက်မှာဖော်ပြထားတဲ့ ဝမ်းဆက်ဖက်ရှင်တွေက သင်အတွက်ချုပ်ဝတ်ဖို့အတွက်ပါ အိုင်ဒီယာရစေမှာပါ။ ဒီတော့ စိတ်ဝင်စားရင်ကြည့်လိုက်ရအောင်နော်-

ဝမ်းဆက်ကိုမှ ပုံစံမရိုးရအောင် အပေါ်အင်္ကျီခါးတိုနဲ့ အောက်က အရောင်တူ စတိုင် Pant အရှည်နဲ့တွဲဝတ်တဲ့ ပုံစံလေးဖြစ်ပါတယ်။ ပေါ့ပေါ့ပါးပါးလေးနဲ့ အထာကျစေမှာပါ။

ဘောင်းဘီမဝတ်ချင်သူတွေက ခါးတိုအင်္ကျီကို စကပ်ရှည်တွေနဲ့လည်း တွဲဝတ်နိုင်ပါတယ်။ မိန်းမဆန်ပြီး စမတ်ကျတဲ့ ရုံးတက်ဖက်ရှင်လေးရစေပါလိမ့်မယ်။

အပေါ်အောက်အတွဲလိုက် Jumpsuit တွေကလည်း ပေါ့ပေါ့ပါးပါးဝတ်နိုင်မယ့် ဝမ်းဆက်ဖက်ရှင်တစ်မျိုးပါပဲ။ အောက်ကပုံထဲကလို ခါးစည်းပါတဲ့ Jumpsuit ဒီဇိုင်းလေးတွေဝတ်ကြည့်ပါ။

နောက်ထပ်ဒီဇိုင်းက Blazer နဲ့ဘောင်းဘီရှည်ကို ဝမ်းဆက်ပုံစံဝတ်တာပါ။ Blazer တွေက အရှိန်အဝါတစ်ခုရစေပြီး ကိုယ့်ကိုယ့်ကိုယ်ယုံကြည်မှုလည်းတိုးတာမို့ ရုံးတက်ရတဲ့သူတိုင်း တစ်ထည်လောက်တော့ ရှိထားသင့်တဲ့ ဖက်ရှင်တစ်ခုလို့ပြောလို့ရပါတယ်။