ပွဲဦးထွက်ပြီး ၅ ရက်နဲ့ အဖွဲ့ဖျက်သိမ်းခံရတာကြောင့် အမြန်ဆုံး Disband စာရင်းဝင်သွားတဲ့ Kpop အဖွဲ့

Kpop လောကမှာ ပွဲဦးထွက်နိုင်ဖို့အတွက်ဆိုရင် ဝါသနာရှင်လူငယ်တွေဟာ Entertainment ကုမ္ပဏီတစ်ခု လက်အောက်မှာ အချိန်အတော်ကြာရင်းနှီးပြီး သူတို့ရဲ့အိပ်မက်အတွက် အရည်အချင်းတွေမြှင့်တင်နိုင်ဖို့ လေ့ကျင့်ကြရပါတယ်။ ဒါကြောင့်ပွဲဦးထွက်နိုင်ပြီဆိုရင်တော့ သူတို့ရဲ့အောင်မြင်မှုလမ်းစကိုရောက်ပြီလို့ ဆိုနိုင်ပါတယ်။ ဒါပေမယ့် စိတ်မကောင်းစွာပဲ “SOLIA” လို့ခေါ်တဲ့ အမျိုးသမီး Idol အဖွဲ့ဟာ ပွဲဦးထွက်ပြီး ၅ ရက်အကြာမှာပဲ ဖျက်သိမ်းခံလိုက်ရပါတယ်။

Photo Source: Korea-JoongAng-Daily

SOLIA အဖွဲ့ကိုတော့ “About Me” လို့ခေါ်ရာကတစ်ဆင့် “Special Our Light Influence Artist” လို့အဓိပ္ပာယ်ရတဲ့ “SOLIA” အဖြစ်ပြောင်းလဲခဲ့ကြပြီး Soree, Hayeon, Suna, Soyeon နဲ့ Eunbi ဆိုတဲ့ အဖွဲ့ဝင်ငါးဦးနဲ့ ဖွဲ့စည်းထားတာဖြစ်ပါတယ်။ SOLIA အဖွဲ့ဟာ အခုနှစ် သြဂုတ်လ (၁၇) ရက်နေ့မှာ Space Music Entertainment လက်အောက်ကနေ “Dream” ဆိုတဲ့သီချင်းနဲ့ပွဲဦးထွက်ခဲ့ကြပါတယ်။ သီချင်းထွက်ပြီး ၅ရက်အကြာမှာတော့ သူတို့အဖွဲ့ရဲ့ တရားဝင် Instagram ကနေတစ်ဆင့် အဖွဲ့ဖျက်သိမ်းလိုက်တဲ့သတင်းကို ကြေညာခဲ့ကြတဲ့အတွက် မမျှော်လင့်ဘဲ Kpop သမိုင်းမှာ ပွဲဦးထွက်ပြီးနောက် အမြန်ဆုံးဖျက်သိမ်းခံရတဲ့ အဖွဲ့တစ်ဖွဲ့ဖြစ်လာခဲ့တာပါ။

Photo Source: Kpop-Wiki-Fandom

အဖွဲ့ဖျက်သိမ်းခြင်းနဲ့ပက်သက်ပြီး ကြေညာချက်မှာတော့ ကုမ္ပဏီရဲ့အမျိုးမျိုးသောအဆင်မပြေမှုတွေကြောင့် အဖွဲ့ကိုတာဝန်ယူနိုင်ခြင်းမရှိတော့ကြောင်းနဲ့ Solia အဖွဲ့ရဲ့ပရိသတ်တွေအနေနဲ့ အဖွဲ့ဝင်တွေရဲ့ ရှေ့ဆက် အနုပညာလုပ်ငန်းတွေကိုသိနိုင်ဖို့အတွက် အဖွဲ့ဝင်တစ်ဦးချင်းရဲ့ Instagram အကောင့်တွေကို Follow လုပ်နိုင်ကြောင်းပြောထားပါတယ်။

Source: Allkpop

အဖွဲ့ဝင်ဖြစ်ခဲ့ကြတဲ့ Suna, Hayeon နဲ့ Eunbi တို့သုံးဦးဟာ Solia အနေနဲ့ပွဲဦးမထွက်ခင်က Sio.Sijak လို့ခေါ်တဲ့အကအဖွဲ့မှာလည်းပါဝင်ခဲ့ကြပြီး ၂၀၂၀နှစ်ကုန်မှာ Disband ခဲ့ကြပါတယ်။ အခုဆိုရင်တော့ သူတို့သုံးဦးလက်ရှိပါဝင်နေတဲ့ SOLIA အဖွဲ့ဟာလည်း Disband သွားခဲ့ပြီပဲ ဖြစ်ပါတယ်။