နဂိုကထက် အသားအရေပိုကောင်းလာဖို့ ပုံမှန်ပြုလုပ်ပေးရမယ့် အဆင့် (၅) ဆင့်

မိန်းကလေးတိုင်း လိုချင်တဲ့ အလှတစ်ခုကတော့ မိတ်ကပ်မလိမ်းဘဲ လှတဲ့ အလှပါ။ မိတ်ကပ်လိမ်းရင်တောင် ပေါ့ပေါ့ပါးပါးလေးနဲ့ လိမ်းထားမှန်း မထင်ရတဲ့ ပုံစံမျိုးကို လိုချင်တတ်ကြပါတယ်။ ဒီလို မျက်နှာလေး ပိုင်ဆိုင်ဖို့က အသားအရေကို အဆင့်ဆင့်နဲ့ သေချာ ဂရုစိုက်ပေးမှ အဆင်ပြေမှာပါ။ ကိုယ့်အသားအရေကို လက်ရှိထက် ပိုကောင်းချင်တယ်ဆိုရင်တော့ ဒီအဆင့် (၅) ဆင့်ကို သေချာလိုက်နာဖို့ လိုပါတယ်။

အဆင့် ၁- မနက်ပိုင်း

ပထမဆုံး အဆင့်ကတော့ နိုးနိုးချင်း မနက်ခင်းပါ။ မနက်ခင်းမှာ ပြုလုပ်ရမယ့် အသားအရေထိန်းသိမ်းနည်းအဆင့်တွေကတော့-

ကိုယ့်အသားအရေနဲ့ သင့်တော်တဲ့ Cleanser နဲ့ မျက်နှာသစ်ပေးရပါမယ်။
မျက်နှာသစ်ပြီးနောက် Toner သုံးပေးရပါမယ်။ Toner က ကိုယ့်အသားအရေ pH ကို ထိန်းညှိပေးပါတယ်။
တိုနာလိမ်းပြီးနောက် Moisturizer လိမ်းပေးရပါမယ်။ ဒီကြားထဲ Serum, Emulsion, Essence စတဲ့ အဆင့်တွေရှိပေမယ့် သင်က Budget ကိုက်ပြီး Skincare ချင်ရင်တော့ Moisturizer နဲ့တင်လုံလောက်ပါတယ်။
မနက်ပိုင်းမှာ အရေးကြီးဆုံး အဆင့်ကတော့ Sunscreen လိမ်းပေးရမှာပါ။ အသက်ကြီးတဲ့ အချိန်ထိ မဖြစ်မနေ လုပ်သွားဖို့ လိုတာက နေလောင်ကာ ခရင်လိမ်းခြင်းပါပဲ။

အဆင့် ၂- ညဘက်

သင်က မိတ်ကပ်လိမ်းထားတယ်ဆိုရင်တော့ မအိပ်ခင် မိတ်ကပ်ဖျက်ပေးရပါမယ်။ မျက်နှာကြည်လင်သန့်ရှင်းဖို့က Cleansing Step ကို သေချာလေးလုပ်ပေးမှ အဆင်ပြေမှာပါ။
မိတ်ကပ်ဖျက်ပြီးရင်တော့ Cleansing မျက်နှာသစ်ပေးရပါမယ်။ သင်က မိတ်ကပ်ခဏခဏ လိမ်းတတ်သူ ဆိုရင်တော့ Double Cleansing လုပ်ပေးသင့်ပါတယ်။
ပြီးနောက် Retinol ပါဝင်တဲ့ Eye Cream ကို လိမ်းပေးရပါမယ်။ အသက် ၂၅ နှစ်က စပြီး Retinol ကို လိမ်းပေးဖို့ လိုပါပြီ။ အရွယ်တင် နုပျိုစေတဲ့ အလှကုန်တွေထဲမှာ Retinol ပါဝင်ပါတယ်။
ညဘက်သီးသန့်ထုတ်ထားတဲ့ Moisturizer မျိုးကို လိမ်းအိပ်ပေးရပါမယ်။ Night Time အတွက် သီးသန့်ထုတ်ထားတဲ့ အစိုဓာတ်ခရင်တွေက ညအိပ်တဲ့အချိန် ပိုအလုပ်လုပ်ပါတယ်။

အဆင့် ၃- အပတ်တိုင်း

နေ့တိုင်းမဟုတ်ဘဲ သုံးရက်ခြား တစ်ခါလောက် ခန္ဓာကိုယ်နဲ့ မျက်နှာကို Exfoliate လုပ်ပေးရပါမယ်။ Exfoliation လုပ်ပေးမှ ခန္ဓာကိုယ်ပေါ်က ဆဲလ်သေတွေ ကွာကျပြီး အသားအရေ ပိုကောင်းလာမှာပါ။
တစ်ပတ်မှာ တစ်ခါလောက် Face Mask ကပ်ပေးနိုင်ရင်တော့ အကောင်းဆုံးပါပဲ။
မျက်နှာ ထိန်းသိမ်းမှုသာမက တစ်ပတ်ပြည့်တိုင်းမှာ ကိုယ်အိပ်တဲ့ ခေါင်းအုံးစွပ်ကို လျှော်ပေးရပါမယ်။

အဆင့် ၄- လတိုင်း

သင့်မျက်နှာလေး ကြည်ကြည်လင်လင် ဖြစ်နေဖို့ လတိုင်း မျက်ခုံးရိတ်ပေးသင့်ပါတယ်။
ကိုယ့်ရဲ့ အလှကုန် Makeup ပစ္စည်းတွေကို တစ်လတစ်ခါလောက် သန့်ရှင်းပေးရပါမယ်။

အဆင့် ၅- အသားအရေ ကောင်းဖို့ အလေ့အကျင့်များ

အသားအရေ ပိုကောင်းလာဖို့ ရေများများသောက်တဲ့ အကျင့်ကို မွေးမြူရပါမယ်။
အသားအရေအတွက် လိုအပ်တဲ့ ဗီတာမင်တွေကို မှီဝဲရပါမယ်။
နှုတ်ခမ်းကျန်းမာရေးအတွက် Lip Balm သုံးပေးရပါမယ်။
အိပ်ရေးဝဝ အိပ်ဖို့ကို ဦးစားပေး အကျင့်အဖြစ် သတ်မှတ်ပြီး ရေနွေးနဲ့ ရေချိုးတာကို ရှောင်ပေးရပါမယ်။