အဆီပြန်တဲ့အသားအရေတွေက ထိန်းသိမ်းစောင့်ရှောက်မှုတွေ ကောင်းကောင်းလုပ်ပေးနိုင်မှ ကောင်းမွန်တဲ့အသားအရေကို ရရှိနိုင်မှာပဲဖြစ်ပါတယ်။ ဝက်ခြံတွေဖြစ်လွယ်တဲ့အသားအရေကလည်း အဆီပြန်တဲ့အသားအရေမျိုးပဲဖြစ်တာကြောင့် သေချာထိန်းသိမ်းမှုတွေလုပ်ပေးမှ ရမှာပေါ့။ အဆီပြန်တဲ့အသားအရေပိုင်ရှင်တွေအတွက် ပျားရည်ကိုအသုံးပြုပြီး ပြင်ဆင်လို့ရမယ့် နည်းလမ်းကောင်းလေးတွေကို ဖော်ပြပေးချင်ပါတယ်။

မျက်နှာသစ်တဲ့အခါမှာ

မျက်နှာသစ်တဲ့အခါမှာ အဆီပြန်တဲ့အသားအရေပိုင်ရှင်တွေအတွက် ပျားရည်နဲ့ရောစပ်အသုံးပြုနိုင်တဲ့ နည်းလမ်းကောင်းလေးတွေကို ဖော်ပြပေးလိုက်ပါတယ်။ ပျားရည်ကို နွားနို့နဲ့ရောပြီး မျက်နှာအသားအရေပေါ်မှာ သုတ်လိမ်းထားပေးလိုက်ပါ။ ၁၅ မိနစ်လောက်ထားထားပြီး ရေနဲ့ပဲပြန်ပြီးတော့ သန့်စင်ပေးလိုက်ရင်ရပါပြီ။ တစ်နေ့ကိုတစ်ကြိမ်ပြုလုပ်ပေးမယ်ဆိုရင်တော့ အဆီပြန်တာတွေကို သက်သာစေပြီး မျက်နှာပေါ်မှာဝက်ခြံဖြစ်တာတွေကိုလည်း လျော့နည်းသွားစေမှာပဲဖြစ်ပါတယ်။

ဝက်ခြံတွေကိုပျောက်ကင်းစေဖို့အတွက်ဆိုရင်

အဆီပြန်တဲ့မျက်နှာအသားအရေကို ပေါင်းတင်တာတွေပြုလုပ်ဖို့အတွက်ဆိုရင်တော့ ငှက်ပျောသီးနဲ့ ပျားရည်ကိုရောပြီးလုပ်တာက အသားအရေအတွက်အကောင်းဆုံးဖြစ်မှာပါ။ ငှက်ပျောသီးတစ်လုံးကို ပျားရည်နဲ့ရောပြီး သေချာကျေညက်အောင် ချေမွပေးလိုက်ပါ။ ရလာတဲ့အနှစ်တွေကို မျက်နှာပေါ်မှာနှံ့စပ်အောင်တင်ပေးပြီး မိနစ် ၂၀ လောက်ထားထားပေးလိုက်ပါ။

အချိန်ပြည့်သွားရင်တော့ ရေနွေးနွေးလေးနဲ့ဆေးပေးတာမျိုးတွေ လုပ်ပေးလို့ရပါတယ်။ မျက်နှာပေါ်မှာဖြစ်လာနိုင်တဲ့ ဘက်တီးရီးယားတွေကို ဖယ်ရှားပေးနိုင်ပြီး မျက်နှာပေါ်မှာဝက်ခြံဖြစ်တာတွေကိုလည်း လျော့နည်းသွားစေမှာပါ။

မျက်နှာအသားအရေတောက်ပစေဖို့အတွက်ဆိုရင်

မျက်နှာအသားအရေကိုကြည်လင်ပြီး တောက်ပလာစေဖို့အတွက်ဆိုရင် ရှောက်သီးအရည်နဲ့ ပျားရည်ကိုရောပြီး ပေါင်းတင်ပေးလို့ရပါတယ်။ ပျားရည်စားပွဲတင်ဇွန်း ၁ ဇွန်းကို၊ ရှောက်သီးအရည် လက်ဖက်ရည်ဇွန်း တစ်ဝက်နဲ့ရောပြီး မျက်နှာပေါ်မှာ နှံ့အောင်လိမ်းပေးလိုက်ပါ။ ၁၅ မိနစ်လောက်ထားပြီး ရေဆေးချပေးလိုက်မယ်ဆိုရင်တော့ အသားအရေကိုကြည်လင်ပြီး တောက်ပလာစေမှာပဲဖြစ်ပါတယ်။

ဒီနည်းလမ်းလေးတွေကတော့ အဆီပြန်တဲ့အသားအရေပိုင်ရှင်တွေနဲ့ သင့်တော်တဲ့အသားအရေ ထိန်းသိမ်းတဲ့အခါမှာ အသုံးပြုသင့်တဲ့ နည်းလမ်းကောင်းလေးတွေပဲဖြစ်ပါတယ်။

Photo Source: Pexels