မင်္ဂလာပါနော်။ ကမ္ဘာကျော် ကိုးရီးယား Idol အဖွဲ့ Wonder Girls ရဲ့အဖွဲ့ဝင်ဟောင်းတစ်ဖြစ်လည်း လက်ရှိမှာ တစ်ကိုယ်တော်အနုပညာရှင်တစ်ယောက်အနေနဲ့ပါ အောင်မြင်နေတဲ့ အဆိုတော် Sunmi ကိုတော့ Kpop ပရိသတ်တိုင်း ရင်းနှီးပြီးသားဖြစ်မှာပါ။ သူမဟာ ထွက်သမျှသီချင်းတိုင်းအတွက် အဆိုရော အကပါ ပြည့်စုံအောင် ဆွဲဆောင်မှုရှိရှိ ဖျော်ဖြေနိုင်တဲ့စွမ်းရည်ကြောင့် ပရိသတ်ကြား လူကြိုက်များပါတယ်။


အသက် ၃၀ ရှိပြီဖြစ်တဲ့ Sunmi ဟာ အရွယ်နဲ့မလိုက်အောင် ညို့အားပြင်းတဲ့မျက်နှာထား၊ ပိန်ပိန်သွယ်သွယ်နဲ့ အဆီပိုမရှိတဲ့ ကိုယ်လုံးကိုယ်ပေါက်ကို ပိုင်ဆိုင်ထားသူပါ။ သူမဟာ Idol တစ်ယောက်အနေနဲ့ ကျန်းမာကျစ်လျစ်တဲ့ ခန္ဓာကိုယ်ကို အမြဲထိန်းထားနိုင်ဖို့ လေ့ကျင့်ခန်းပုံမှန်လုပ်တတ်တဲ့သူလည်းဖြစ်ပါတယ်။ အရပ် ၅ ပေ ၄ ဝန်းကျင်သာရှိပေမယ့် သုံးပေကျော်အထိရှိတဲ့ ခြေတံတွေကြောင့် မော်ဒယ်တွေလို ခြေတံရှည်ရှည်တွေရှိသူတစ်ယောက်လို့ ပြောလို့ရပါတယ်။

ဒီတစ်ခေါက်မှာ အဆီပိုမရှိတဲ့ ခြေတံသွယ်သွယ်လေးပိုင်ဆိုင်ချင်သူတို့အတွက် Sunmi ကိုယ်တိုင်လုပ်လေ့ရှိတဲ့ ခန္ဓာကိုယ်အောက်ပိုင်းလေ့ကျင့်ခန်းတွေအကြောင်းကို ဖော်ပြပေးချင်ပါတယ်။ ၁၀ မိနစ်လောက်အချိန်ပေးရုံနဲ့ လုပ်လို့ရမယ့် လေ့ကျင့်ခန်းတွေဖြစ်တာမို့ လိုက်လုပ်ကြည့်ဖို့ တိုက်တွန်းလိုက်ပါတယ်နော်-

၁။ Side Lunges


ပထမဆုံးလေ့ကျင့်ခန်းကတော့ ခြေထောက်တစ်ဖက်စီ ဘေးကားပြီး ဒူးကွေးလိုက် ပြန်ထလိုက်လုပ်ပေးရမှာဖြစ်ပါတယ်။ ခြေထောက်တစ်ဖက်ချင်းအတွက် စက္ကန့် ၂၀ စီလုပ်ပေးဖို့လိုပါတယ်။

၂။ Plie Squat


ခန္ဓာကိုယ်အောက်ပိုင်းအဆီချဖို့အတွက် Squat လေ့ကျင့်ခန်းက အရမ်းထိရောက်ပါတယ်။ ရိုးရိုး Squat ထိုင်တာမျိုးလုပ်နိုင်သလို Pile Squat လို့ခေါ်တဲ့ ခြေထောက်ဘေးကျယ်ကျယ်ကားပြီး Squat လုပ်ရတဲ့လေ့ကျင့်ခန်းမျိုးလည်း ပြုလုပ်ပေးနိုင်ပါတယ်။ ခန္ဓာကိုယ်ဟန်ချက်ထိန်းထားပြီး စက္ကန့် ၃၀ ပြည့်အောင်လုပ်ပေးပါ။

၃။ Single Leg Step Up


ဒီလေ့ကျင့်ခန်းအတွက် ခုံအမြင့်လေးတစ်ခုံလိုပါတယ်။ ခုံကိုအားပြုကာ ခြေထောက်တစ်ဖက်တင်ထားပြီး ကျန်တစ်ဖက်ကို ခုံပေါ်တင်လိုက်ပြန်ချလိုက်လုပ်ပေးရမှာပါ။ ကျောရိုးမတ်ထားကာ ခန္ဓာကိုယ်မယိုင်ရအောင်ထိန်းထားပြီး သူ့ကိုလည်း ခြေထောက်တစ်ဖက်ချင်းအတွက် စက္ကန့် ၃၀ ပြည့်အောင် လုပ်ပေးရပါမယ်။

၄။ Leg Extension


ခါးမတ်ကာ ခုံပေါ်မှာထိုင်ပြီး ခြေထောက်တွေကိုလေပေါ်မြှောက်ထားပါ။ ပြီးရင်တော့ ခြေထောက်နှစ်ဖက်လုံးကို တတ်နိုင်သလောက် ခပ်မြှင့်မြှင့်မြှောက်လိုက် ပြန်ချလိုက်လုပ်ပေးရမှာဖြစ်ပါတယ်။ စက္ကန့် ၃၀ လောက် ဖြေးဖြေးချင်း ပြုလုပ်ပေးပါ။

၅။ Single Leg Glute Bridge


ပုံမှာပြထားသလို ကြမ်းပြင်မှာလှဲပြီး ဒူးတစ်ဖက်ထောက်ကာ ကျန်ခြေထောက်ကို လေပေါ်မြှောက်ပြီး ခန္ဓာကိုယ်ကိုပါ ပင့်တင်ပေးရမှာဖြစ်ပါတယ်။ ခြေထောက်တစ်ဖက်ချင်း အလှည့်ကျပြောင်းပြီး စက္ကန့် ၃၀ စီပြုလုပ်ပေးပါ။

၆။ Inner Thigh Pause


ခန္ဓာကိုယ်တစ်ဖက်စောင်းကာ တံတောင်ထောက်ထားပြီး အပေါ်ခြေထောက်ကို ဒူးကွေးပေးပါ။ ပြီးရင်တော့ အောက်မှာဖိထားတဲ့ ခြေထောက်ကို အပေါ်မြှောက်ပေးပါ။ ဒီပုံစံအတိုင်းတောင့်ထားပြီး စက္ကန့် ၃၀ လောက် ဘက်ပြောင်းကာ ပြုလုပ်ပေးပါ။ ပေါင်အတွင်းခြမ်းတွေ ကျစ်လျစ်လာစေပါလိမ့်မယ်။

၇။ Fire Hydrant


ပုံမှာပြထားတဲ့ Fire Hydrant လေ့ကျင့်ခန်းကိုလည်း ခန္ဓာကိုယ်အပေါ်ပိုင်း အရမ်းမလှုပ်အောင်ထိန်းထားပြီး ခြေထောက်မ ကာ တစ်ဖက်ချင်းပြောင်းပြီး စက္ကန့် ၃၀ စီလုပ်ပေးလိုက်ပါ။

Photo Source: Pinterest

By MyStyle Myanmar