အားလုံးပဲမင်္ဂလာပါ။ ကမ္ဘာကျော် 2NE1 အဖွဲ့ကိုတော့ Kpop သီချင်းနားထောင်သူတိုင်း ရင်းနှီးပြီးသား ဖြစ်မှာပါနော်။ ၂၀၁၆ ခုနှစ်ကတည်းက အဖွဲ့ဖျက်သိမ်းခဲ့ပြီဖြစ်ပေမယ့် လက်ရှိအချိန်ထိ ပရိသတ်တွေရဲ့ အားပေးမှုအပြည့်ရထားဆဲဖြစ်တဲ့အပြင် အဖွဲ့ဝင်လေးဦးလုံးဟာလည်း အသက် ၃၀ လို့ မထင်ရလောက်အောင် နုပျိုနေဆဲအလှတွေကို ပိုင်ဆိုင်ထားကြသူတွေပါ။ အဖွဲ့ရဲ့ Visual တစ်ဦးဖြစ်ခဲ့တဲ့ Sandara ဟာဆိုရင် အသက် ၃၇ နှစ်ထဲဝင်နေပြီဖြစ်ပေမယ့် ဆယ်ကျော်သက်တစ်ယောက်လို Baby Face လေး ပိုင်ဆိုင်ထားဆဲဖြစ်တာကြောင့် သူမရဲ့ အမြဲနုပျိုနေတဲ့အလှကို ပရိသတ်တွေက သတိထားမိကြပါတယ်။
သူမဟာ လက်ရှိမှာ အဆိုတော်အပြင် သရုပ်ဆောင်နဲ့ အစီအစဉ် တင်ဆက်သူ အဖြစ်ပါ အောင်မြင်မှုရထားသူတစ်ဦးဆိုရင်လည်းမမှားပါဘူး။ ကိုယ့်ကိုယ်ကိုယ်အမြဲဂရုစိုက်ကာ အသားအရေ ထိန်းသိမ်းတတ်သူဖြစ်ပြီး “Get It Beauty” ဆိုတဲ့ အလှအပအစီအစဉ်မှာလည်း Host တစ်ဦးအဖြစ် ပါဝင်ခဲ့ဖူးသူဖြစ်ပါတယ်။ ဒါကြောင့် ဒီတစ်ခေါက်မှာ အမြဲနုပျိုနေဖို့ ညနေပိုင်းမအိပ်ခင်မှာ Dara ပုံမှန်လုပ်လေ့ရှိတဲ့ Skincare အဆင့်လေးတွေအကြောင်းကို ဖော်ပြပေးလိုက်ပါတယ်။
အဆင့် ၁ – Toner
ပထမဆုံး Toner အဆင့်အတွက် Rose Water Toner လေးလိမ်းပါတယ်။ ညပိုင်း Toner လိမ်းပေးတာက အရေပြားပေါ်က မလိုအပ်တဲ့ အဆီတွေ သန့်စင်ပေးပြီး အသားအရေနီမြန်းခြင်းကိုပါ သက်သာစေပါတယ်။
အဆင့် ၂ – Serum
ဒုတိယအဆင့်အနေနဲ့ ရေဓာတ်များတဲ့ Whitening Serum လေးလိမ်းပေးပါတယ်။ Serum ပုံမှန်သုံးပေးတာက နေလောင်ထားတဲ့ အသားအရောင်ကို ပြန်ညှိပေးပြီး အသားအရေကြည်လင်ကာ အမဲစက်တွေမဖြစ်စေဖို့ ကာကွယ်ပေးနိုင်ပါတယ်။
အဆင့် ၃ – Eye Cream
မျက်လုံးထောင့်အရေးအကြောင်းမဖြစ်စေဖို့ အသက် ၂၅ လောက်ကစပြီး Eye Cream ပုံမှန်သုံးပေးဖို့ လိုလာပါပြီ။ Dara ကိုယ်တိုင်ကလည်း သူမဟာ Eye Cream ကောင်းကောင်းတစ်ခုကို အခြား Skincare တွထက် သတိထားရွေးချယ်ပြီး ဝယ်လေ့ရှိတယ်လို့ပြောပြခဲ့ပါတယ်။ Eye Cream လိမ်းတဲ့အခါ မျက်လုံးကိုလုံးဝမပွတ်ဘဲ အရေးအကြောင်းဖြစ်တတ်တဲ့နေရာတွေမှာ ခပ်ဖွဖွပုတ်လိမ်းပေးဖို့လည်း သူမက အကြံပေးထားပါတယ်။
အဆင့် ၄ – Moisturizing Cream
သင်ဟာ Dara လို Dry Skin ရှိသူတစ်ယောက်ဆိုရင်တော့ ညပိုင်းတွေမှာ Moisturizing Cream တွေသုံးဖို့ အကြံပြုချင်ပါတယ်။ သူမဟာ စေးကပ်ကပ်မဖြစ်ဘဲ အစိုဓာတ်ဖြည့်ပေးနိုင်မယ့် Moisturizing Cream တွေကို မအိပ်ခင်နဲ့ မိတ်ကပ်မလိမ်းခင်အချိန်တွေမှာ လိမ်းလေ့ရှိတယ်လို့ ပြောပြခဲ့ပါတယ်။
အဆင့် ၅ – Facial Oil
Moisturizer လိမ်းပြီးနောက်မှာ သဘာဝပါဝင်ပစ္စည်းတွေနဲ့ ပြုလုပ်ထားတဲ့ Facial Oil တစ်မျိုးလိမ်းကာ အိပ်ရာဝင်လိုက်ပါ။ နောက်တစ်နေ့မနက်မှန်ကြည့်လိုက်တာနဲ့ စိတ်ချမ်းသာစရာကောင်းပြီး Glow နေတဲ့ မျက်နှာလေးကို မြင်ရလိမ့်မယ်လို့လည်း သူမက အကြံပေးထားပါတယ်။
အဆင့် ၆ – Lip Balm
သူမဟာ နှုတ်ခမ်းခြောက်တတ်တာမို့ ညတိုင်း Vaseline Lip Therapy လိမ်းလေ့ရှိသူဖြစ်ပါတယ်။ သင်ကိုယ်တိုင်လည်း နှုတ်ခမ်းခြောက်ခြင်းကို ကာကွယ်နိုင်ဖို့ မအိပ်ခင် Lip Balm တစ်မျိုး လိမ်းပေးသင့်ပါတယ်နော်။
အဆင့် ၇ – Essential Oils
နောက်ဆုံးအဆင့်အနေနဲ့ Dara ဟာ မအိပ်ခင် Lavender Oil လို ပန်းအနံ့ရှိတဲ့ Essential Oil တွေ သူမရဲ့နားရွက်နောက်ဘက်မှာ လိမ်းလေ့ရှိသူတစ်ဦးဖြစ်ပါတယ်။ ဒီလို Essential Oil တွေ လိမ်းပြီးအိပ်တာက Stress ပြေလျှော့စေပြီး အိပ်ပျော်ဖို့အတွက်လည်း ကူညီပေးနိုင်တယ်လို့ သူမက ရှင်းပြခဲ့ပါတယ်။
Source: previewph.com, VOGUE KOREA Youtube
