အလှအပဆိုတာ လူတိုင်းနဲ့သက်ဆိုင်တဲ့ ကိစ္စတစ်ခုပါ။ မျက်နှာလေးကြည်လင်ပြီး အသားအရေလှပနေခြင်းကလည်း ဆွဲဆောင်မှုတစ်ခုဖြစ်ပါတယ်။
ဒါကြောင့် ဒီနေ့မှာတော့ ငွေကြေးအကုန်အကျသက်သာပြီး မျက်နှာအသားအရေအတွက် အသုံးတည့်စေမယ့် သဘာဝပစ္စည်းလေးတွေကို ပြောပြပေးချင်ပါတယ်။
(၁) အာလူး
မျက်နှာအသားအရေအတွက် အသုံးဝင်ဆုံး သဘာဝပစ္စည်းလေးတစ်ခုက အာလူးပါ။ အာလူးဟာ မျက်နှာပေါ်က အမဲစက်တွေ အသားအရေမညီမညာဖြစ်ခြင်းတွေကို အထိရောက်ဆုံး ကုသပေးနိုင်စွမ်းရှိပြီး ကုန်ကျစရိတ်လည်းအများကြီးမရှိပါဘူး။
အသုံးပြုနည်းကတော့ အာလူးကိုခပ်ပါးပါးလှီးပြီး မျက်နှာပေါ်မှာ ကပ်ပေးနိုင်ပါတယ်။ မျက်နှာပေါ်မှာ နာရီဝက်ခန့် ကပ်ထားပြီးရင် ရေအေးနဲ့ ရေဆေးလိုက်ပါ။
(၂) ခရမ်းချဉ်သီး
မျက်နှာပေါ်က ကြည့်ရဆိုးတဲ့ ဝက်ခြံတွေကြောင့် စိတ်ညစ်နေရပြီလား။ ခရမ်းချဉ်သီးဟာ မျက်နှာပေါ်ကဝက်ခြံတွေကိုအကောင်းဆုံး ဖယ်ရှားသန့်စင်ပေးနိုင်တဲ့ သဘာဝပစ္စည်းလေးတစ်ခုဖြစ်ပါတယ်။
အသုံးပြုနည်းကတော့ ခရမ်းချဉ်သီးကို ကျေညှက်အောင်ကြိတ်ပြီး သံပရာသီးအနည်းငယ် ပျားရည်အနည်းငယ်တို့နဲ့ ရောမွေကာ မျက်နှာပေါ်မှာ လိမ်းပေးရမှာဖြစ်ပါတယ်။ (၁၅) မိနစ်ခန့်ကြာရင်တော့ မျက်နှာသစ်လို့ရပါပြီ။
(၃) နနွင်းနဲ့ ဒိန်ချဉ်
နနွင်းဟာဆိုရင် ဆေးဖက်ဝင်ပစ္စည်းတစ်မျိုးလည်းဖြစ်သလို အသားအရေအတွက်လည်း လွန်စွာအသုံးဝင်တဲ့ မီးဖိုချောင်သုံးပစ္စည်းလေးတစ်ခုပါ။ နနွင်းကိုအသုံးပြုပြီး ကြည်လင်ဝင်းလက်တဲ့ မျက်နှာအသားအရေလေးကို ပိုင်ဆိုင်နိုင်မှာဖြစ်ပါတယ်။
အသုံးပြုနည်းကတော့ နနွင်းစားပွဲတင်ဇွန်း ၂ ဇွန်းခန့်ကို ဒိန်ချဉ်အနည်းငယ်နဲ့ ရောစပ်ပြီး သမအောင်မွေပေးပါ။ အရမ်းလည်းမပြစ်အရမ်းလည်း မကျဲပါစေနဲ့။ အဆိုပါ နနွင်းနဲ့ ဒိန်ချဉ် အရေကို မျက်နှာပေါ်အနှံ့လိမ်းပြီး နာရီဝက်ခန့်အကြာမှာ မျက်နှာသစ်လိုက်ပါ။
(၄) ရှားစောင်းလက်ပတ်
ရှားစောင်းလက်ပတ်မှာ အသားအရေအတွက် မရှိမဖြစ်လိုအပ်တဲ့ အာဟာရဓာတ်တွေ ကြွယ်ဝစွာပါဝင်တဲ့အပြင် ဗီတာမင်ဓာတ်များစွာလည်း စုံစုံလင်လင်ပါဝင်ပါတယ်။ဒါကြောင့် မျက်နှာပေါ်က ဝက်ခြံတွေ ရောင်ရမ်းမှုတွေ နေလောင်ဒဏ်တွေကိုလည်း အချိန်တိုအတွင်း သက်သာစေမှာဖြစ်ပါတယ်။
အသုံးပြုနည်းကတော့ ရှားစောင်းလက်ပတ်အနှစ်ကို ဇွန်းနဲ့ခြစ်ယူပြီး မျက်နှာအနှံလိမ်းပေးပါ။ မိနစ်(၂၀) ခန့်အကြာမှာတော့ ရေအေးနဲ့ မျက်နှာသစ်ပေးနိုင်ပါတယ်။
