တောင်ကိုရီးယားက အနုပညာရှင်လောကဟာ တော်ရုံတန်ရုံနဲ့ ဝင်တိုးလို့ရတဲ့ နေရာတစ်ခုမဟုတ်ပါဘူး။ တချို့တွေဆိုရင် အနုပညာရှင်ဖြစ်လာဖို့အတွက် ငယ်ငယ်လေးကတည်းက ကြိုးစားလေ့ကျင့်နေကြရတာပါ။ သရုပ်ဆောင်ဖြစ်ဖြစ် သီချင်းအဆိုပိုင်းပဲဖြစ်ဖြစ် တောင်ကိုရီးယားမှာ အနုပညာရှင်ဖြစ်လာဖို့ တော်တော်လေးကို အားစိုက်ထုတ်ကြိုးစားရပါတယ်။
ဒါပေမယ့် တချို့အနုပညာရှင်တွေကျတော့လည်း သူတို့ ဒီလောကထဲကို မထင်မှတ်ပဲ ရောက်ရှိလာခဲ့ကြတာပါ။ အနုပညာရှင်ဖြစ်မလာခင် အားကစားသမားတွေအဖြစ် လုပ်ကိုင်နေသူတွေလည်း အများကြီးရှိပါတယ်။
ဒါဆိုရင် ဘယ်အနုပညာရှင်ကတော့ ကိုယ်ကျွမ်းကျင်တဲ့ အားကစားအလုပ်ကို စွန့်လွှတ်ပြီးတော့ အနုပညာလောကထဲ ဝင်ရောက်ခဲ့ကြသလဲဆိုတာ အခုပဲ ကြည့်လိုက်ရအောင်နော်။
ENHYPEN’s Sunghoon
ENHYPEN အဖွဲ့ဝင် Sunghoon ဟာ အိုင်ဒေါလ်ဖြစ်မလာခင် ၂၀၁၀ ခုနှစ်ကတည်းက ၂၀၂၀ လောက်အထိကို ရေခဲပြင်စကိတ်စီး အားကစားသမားတစ်ယောက်အဖြစ် လုပ်ကိုင်ခဲ့တာပါ။ ၂၀၁၅ ခုနှစ်မှာ Asian Figure Skating Trophy ပြိုင်ပွဲမှာ ရွှေတံဆိပ်ရရှိခဲ့ပြီး ၂၀၁၆ နဲ့ ၂၀၁၇ တို့မှာလည်း ငွေတံဆိပ်အသီးသီး ရရှိခဲ့ပါတယ်။
ဒါ့အပြင် တခြားပြိုင်ပွဲတွေမှာလည်း ဆုတံဆိပ်တွေ ဆွတ်ခူးရရှိခဲ့ပြီး တက်လမ်းအများကြီးရှိတဲ့ Sunghoon ဟာ ၂၀၂၀ မှာတော့ ENHYPEN အဖွဲ့ဝင်ဖြစ်လာခဲ့ပါတယ်။ ရေခဲပြင်စကိတ်လောက ကနေ အနားယူခဲ့ပြီး အခုဆိုရင်တော့ နိုင်ငံတကာစင်မြင့်ထက်မှာ တောက်ပနေတဲ့ ကြယ်ပွင့်ဖြစ်နေပါပြီ။
Choi Hyun Wook
မင်းသား Choi Hyun Wook ကတော့ မကြာသေးခင်က ထွက်ရှိပြီးခဲ့တဲ့ Twinkling Watermelon ဇာတ်ကားနဲ့ တော်တော်လေး လူသိများခဲ့ပါတယ်။ သူဟာဆိုရင် အနုပညာလောကထဲရောက်မလာခင် ဘေ့စ်ဘောကစားသမားတစ်ယောက် ဖြစ်ခဲ့တာပါ။ အထက်တန်းကျောင်းကတည်းက ကစားလာခဲ့တာဖြစ်ပြီး 47th Presidential Junior High School Baseball Tournament ပြိုင်ပွဲမှာ ဆုရရှိခဲ့ဖူးပါတယ်။
၁၀ နှစ်ကျော်ကြာ ဘေ့စ်ဘောကစားခဲ့ပေမယ့်လည်း တံတောင်ဆစ်မှာ ဒဏ်ရာရရှိခဲ့တဲ့အတွက် ဆက်ပြီးမဆော့ကစားနိုင်တော့ပါဘူး။ အဲ့ကနေမှ ဘေ့စ်ဘောကို အနားယူလိုက်ရပြီး ၂၀၁၉ ခုနှစ်မှာ မင်းသားဖြစ်လာခဲ့ပါတယ်။
Nam Joo Hyuk
မင်းသား Nam Joo Hyuk က သရုပ်ဆောင်လုပ်လာတာကြာလို့ သူလည်း အားကစားသမားတစ်ယောက်ဖြစ်ခဲ့ဖူးတယ်ဆိုတာ ယုံနိုင်စရာတောင်မရှိပါဘူး။ ဒါပေမယ့်လည်း သူ့ရဲ့ ငယ်ငယ်တုန်းက အိပ်မက်က Professional ဘတ်စကက်ဘော ကစားသမားတစ်ယောက်ဖြစ်ချင်ခဲ့တာပါ။
အလယ်တန်း တတိယနှစ်မှာ သူ့အရပ်ကြောင့် ဘတ်စကက်ဘောအသင်းဝင်ဖြစ်လာခဲ့ပါတယ်။ ဒါပေမယ့် ကံမကောင်းစွာနဲ့ ဒဏ်ရာတွေရခဲ့ပြီး ခွဲစိတ်မှုနှစ်ခါလုပ်ပြီးနောက်မှာတော့ သူ့ရဲ့ ဘတ်စကက်ဘောကစားသမား အိပ်မက်ကို စွန့်လွှတ်ဖို့ဖြစ်လာပါတယ်။
ဆိုးလ်မြို့ကို ရောက်ရှိလာပြီး မော်ဒယ်လ်ပြိုင်ပွဲမှာ အနိုင်ရရှိခဲ့ပြီးနောက် သူ့ဘဝတစ်ဆစ်ချိုး ပြောင်းလဲခဲ့ပါတယ်။ မော်ဒယ်အဖြစ်လုပ်ကိုင်ရင်းကမှ သရုပ်ဆောင်လမ်းကြောင်းကို ကူးပြောင်းလာခဲ့တာပါ။
RIIZE’s Anton
RIIZE အဖွဲ့ဝင် Anton ကတော့ RIIZE အဖွဲ့နဲ့ ၂၀၂၃ ခုနှစ်ကမှ Debut လုပ်ထားလို့ သိပ်ပြီးမကြာသေးဘူးဆိုပေမယ့်လည်း ပျိုမေတို့ရဲ့အသည်းကို ဆွဲလှုပ်ထားနိုင်ပါပြီ။ သူကတော့ အိုင်ဒေါလ်ဖြစ်မလာခင် ရေကူးသမားတစ်ယောက်ပါ။
အသက်ငါးနှစ်အရွယ်တည်းက ရေကူးလာခဲ့တာဖြစ်ပြီးတော့ ဆုတွေလည်း အများကြီးရရှိထားသူပါ။ ဒါပေမယ့် ကိုဗစ်ကာလမှာ ရေကူးကန်တွေပိတ်လိုက်ရချိန်မှာ Anton တစ်ယောက် ဂီတဖက်ကို အာရုံပြောင်းခဲ့ပြီး ကိုရီးယားကို ပြန်လာခဲ့ပါတယ်။
ထိုကနေမှ SM Entertainment ရဲ့ Audition ဝင်ဖြေပြီး အခုဆိုရင် RIIZE အဖွဲ့ဝင်ဖြစ်နေပါပြီ။
Ahn Bo Hyun
ပျိုတိုင်းကြိုက်တဲ့ နှင်းဆီခိုင် မင်းသားဖြစ်မလာခင် Ahn Bo Hyun ဟာ လက်ဝှေ့သမားတစ်ယောက်ပါ။ လက်ဝှေ့ကို အလယ်တန်းတည်းက ကစားလာခဲ့တာဖြစ်ပြီးတော့ အထက်တန်းကျောင်း တတိယနှစ်အထိ လုပ်ကိုင်ခဲ့တာပါ။
နိုင်ငံပြိုင်ပွဲမှာတောင်မှ ရွှေတံဆိပ်ဆုရရှိခဲ့ဖူးပေမယ့်လည်း လက်ဝှေ့ကြောင့် ဒဏ်ရာမကြာခဏရရှိတဲ့အခါ မိဘတွေကို စိတ်ပူစရာဖြစ်စေတဲ့အတွက် လက်ဝှေ့ကိုအနားယူခဲ့ပြီး မော်ဒယ်လ်နဲ့ သရုပ်ဆောင်ပိုင်းကို ကူးခဲ့တာဖြစ်ပါတယ်။
