ကေဒရာမာ ဇာတ်လမ်းတွေထဲမှာ ဗီလိန်တွေရဲ့ ပိပိရိရီ အကွက်ချမှုတွေ ပါဝင်နေသလို ဇာတ်လိုက် သရုပ်ဆောင်သူတွေရဲ့ ဘဝကို အရှုံးမပေးဘဲ ကိုယ်ယုံကြည်ရာအတွက် တစ်စိုက်မတ်မတ် လုပ်တတ်တဲ့ ဇာတ်ကွက်မျိုးကို သင်ကြည့်ဖူးမှာပါ။ အခုနောက်ပိုင်း ကေဒရာမာ ဇာတ်လမ်းတွေထဲမှာ အမျိုးသမီးတွေရဲ့ ကိုယ်လုပ်ချင်တာကို ရအောင် လုပ်ရဲတာ၊ ဦးဆောင်ရဲတာ၊ ကိုယ့်ကိုယ်ကိုယ် ယုံကြည်မှုရှိတာ စတဲ့ အရာတွေပါ ထည့်သွင်းရိုက်ကူးလာကြပါတယ်။အခုဖော်ပြမယ့် ဇာတ်လမ်းတွေကတော့ ထက်မြက်တဲ့ မိန်းကလေးတွေ နားလည်လွယ်ပြီး အတုယူနိုင်မယ့် အမျိုးသမီးတွေရဲ့ အရေးပါပုံ အခန်းကဏ္ဍကို အသားပေး ရိုက်ကူးထားတဲ့ ဇာတ်လမ်းတွေ ဖြစ်ပါတယ်။
တစ်ခါတလေ စိတ်ခွန်အားတက်စေမယ့် ဗီဒီယိုတွေ ကြည့်နိုင်သလို ဒီလို ဇာတ်ကားတွေထဲက အတုယူတာက သင့်ခေါင်းထဲ တစ်သက်လုံး မမေ့ဘဲ စွဲသွားစေပါတယ်။ ဒီတော့ ဘယ်ဇာတ်လမ်းတွေ ပါဝင်မလဲ ကြည့်လိုက်ရအောင်-
၁။ Hospital Playlist ထဲက Chae Song Hwa
ယောက်ျားလေးချည်းပဲ အုပ်စုထဲက တစ်ဦးတည်းသော အမျိုးသမီး ဇာတ်ကောင် Chae Song Hwa က ရည်မှန်းချက်ကြီးသူ၊ လက်မထပ်ဘဲ သူငယ်ချင်းတွေနဲ့ပဲ နေနိုင်သူ၊ အချစ်ကို မရူးသွပ်ဘဲ ဘဝကို ကောင်းကောင်းဖြတ်သန်းနိုင်ကြောင်း ညွှန်ပြနေသူတစ်ဦး ဖြစ်ပါတယ်။
၂။ Search: WWW
အမျိုးသမီး တစ်ဦးရဲ့ သာမန်စံသတ်မှတ်ချက်တွေအတိုင်း ဘဝကို မဖြတ်သန်းဘဲ ကိုယ့်ဘဝကို ကိုယ်တိုင် တည်ဆောက်ပုံဖော်နိုင်ကြောင်း သက်သေပြနေတဲ့ အမျိုးသမီး ၃ ဦးကို တွေ့မြင်ရမှာပါ။
၃။ Her Private Life ထဲက Sung Deok Mi
Deok Mi က Fan Girl တစ်ယောက်ဟာ အလုပ်ကြိုးစားပြီး ရင့်ကျက်သူ ထက်မြက်သူတစ်ယောက်ဖြစ်နိုင်ကြောင်း ဇာတ်ကားထဲ သက်သေပြထားပါတယ်။
၄။ Fight For My Way ထဲက Choi Ae Ra
သူမ ယုံကြည်ရာ အိပ်မက်အတွက် ဘယ်သူတွေက တားနေပါစေ မရပ်ဘဲ ရှေ့ဆက်လျှောက်တဲ့ ရည်မှန်းချက်ကြီးသူ Choi Ae Ra ကို Fight for My Way ဇာတ်လမ်းထဲမှာ မြင်ရမှာပါ။
၅။ Descendants of The Sun ထဲက Kang Mo Yeon
အလုပ်ကြိုးစားတဲ့ နှလုံးအထူးကု ဆရာဝန် Kang Mo Yeon ကို ဒီဇာတ်လမ်းကြည့်ဖူးသူတိုင်း ရင်းနှီးကြမှာပါ။ Personal Life မှာ ဘယ်လောက်ပဲ ပြဿနာများပါစေ ကိုယ့်အလုပ်ကို ပရော်ဖက်ရှင်နယ် ဆန်ဆန် လုပ်တတ်တဲ့ Kang Mo Yeon က မချီးကျူးဘဲ မနေနိုင်အောင်ပါပဲ။ လှလည်း လှသလို ဦးနှောက်လည်း သုံးတတ်တဲ့ အမျိုးသမီး ဇာတ်ကောင်လို့ ပြောနိုင်ပါတယ်။
၆။ Vagabond ထဲက Go Hae Ri
အားလုံး ယုံကြည်ရပြီး ကိုယ့်ကိုယ်ကိုယ် ကာကွယ်နိုင်တဲ့ အမျိုးသမီး Go Hae Ri က ဒီဇာတ်လမ်းထဲ Spy တစ်ယောက်ပါ။ ကျွမ်းကျင်တဲ့ အလုပ်လုပ်ပုံနဲ့အတူ အမျိုးသမီးတွေက အမျိုးသားတွေနဲ့ ရင်ဘောင်တန်းနိုင်ကြောင်း ပြသနေတဲ့ ဇာတ်လမ်း ဖြစ်ပါတယ်။
သင်ကြည့်ဖူးတဲ့ ထက်မြက်တဲ့ အမျိူးသမီးတွေ ပါဝင်တဲ့ ကိုးရီးယားဇာတ်လမ်းတွေ ရှိလား ပြောပြခဲ့ပါဦး။
Photo Source: Pinterest
By MyStyle Myanmar
