ကြံ့ခိုင်သန်မာတဲ့ဘော်ဒီရဖို့ အားကစားလုပ်သူတွေအနေနဲ့ Workout နဲ့ အတူ အစားအသောက်ပိုင်းကိုလည်း အလေးထားဖို့ လိုပါလိမ့်မယ်။ အစာအာဟာရဟာ စွမ်းအင်ကိုမြင့်တင်ပေးပြီး အားကစားလုပ်ရာမှာ ပိုမိုထိရောက်မှုရှိစေမှာ ဖြစ်ပါတယ်။ ဒါကြောင့် ဒီတစ်ခေါက်မှာတော့ အားကစားလိုက်စားသူတို့ ပုံမှန်စားပေးသင့်တဲ့ အစားအစာတွေအကြောင်း ပြောပြပေးချင်ပါတယ်။
(၁) ရေဓာတ်ဖြည့်အစားအစာများ
အားကစားသမားတွေအနေနဲ့ အလိုအပ်ဆုံးက ရေဓာတ်ပါပဲ။ ခန္ဓာကိုယ်မှာ ရေဓာတ်ပြည့်ဝနေမယ်ဆိုရင် လန်းဆန်းတက်ကြွနေပြီး လေ့ကျင့်ခန်းလုပ်လို့ ပိုကောင်းစေမှာပါ။ ဒါကြောင့် နေစဉ်လိုအပ်တဲ့ ရေဓာတ်ပမာဏလုံလုံလောက်လောက်ရဖို့ ရေများများသောက်သင့်သလို ရေဓာတ်ဖြည့်အစားအစာတွေဖြစ်တဲ့ မုန်လာဥနီ၊ ဖရဲသီး၊ သခွားသီး၊ ဟင်းနုနွယ်ရွက်နဲ့ လက်ဆတ်တဲ့ အစိမ်းရောင် အသီးအနှံတွေ စားပေးသင့်ပါတယ်။
(၂) Oatmeal
အားကစားသမားများအတွက် အလွန်ကောင်းမွန်တဲ့ အစားအစာတစ်မျိုးပါ။ Oatmeal ဟာ ကာဗိုဟိုက်ဒရိတ်အရင်းအမြစ်တစ်ခုဖြစ်ပြီး အမျှင်ဓာတ်ကြွယ်ဝစွာပါဝင်တဲ့အတွက် အစားစားချင်စိတ်ကိုထိန်းပေးပြီး အဆီပိုတွေဖြစ်မလာအောင် ကာကွယ်ပေးပါတယ်။ နောက်ပြီး ၁၀၀ ရာခိုင်နှုန်း whole grain ဖြစ်တာကြောင့် သွေးတွင်း ကိုလက်စထရောနဲ့ အင်ဆူလင် ပမာဏကိုကျဆင်းစေပြီး နှလုံးရောဂါဖြစ်နိုင်ချေကိုလည်း လျှော့ချပေးပါတယ်။
(၃) ဆယ်လ်မွန်ငါး
Omega-3 fatty acids နဲ့ ပရိုတိန်းဓာတ် ကြွယ်ဝစွာပါဝင်တဲ့ ဆယ်လ်မွန်ငါးဟာ အားကစားလုပ်သူတွေအတွက် ပုံမှန်စားသင့်တဲ့ အစားအစာတစ်မျိုးပါ။ ပရိုတင်းဓာတ်က ကြွက်သားတည်ဆောက်ရာမှာ အလွန်အရေးပါပြီး ထို့နည်းတူ Omega-3 ဟာလည်း အားကစားလုပ်ခြင်းကြောင့် ဖြစ်ပေါ်တက်တဲ့ ကြွက်သား ရောင်ရမ်းနာကျင်ခြင်းတွေကို သက်သာစေပါတယ်။ သုတေသီတွေကတော့ အာကစားလုပ်သူတွေအနေနဲ့ တစ်ပတ်ကို ဆယ်လ်မွန်ငါး ၂၀၀ ဂရမ် ပုံမှန်စားပေးသင့်တယ်လို့ အကြံပြုထားပါတယ်။
(၄) နွားနို့
နွားနို့မှာ ကာဗိုဟိုက်ဒရိတ်နှင့် ပရိုတင်းဓာတ်များ ကြွယ်ဝစွာပါဝင်ပြီး ကြွက်သားပင်ပန်းခြင်းတွေကို ပြေလျော့သက်သာစေနိုင်ပါတယ်။ ခန္ဓာကိုယ်အတွက် လိုအပ်တဲ့ ဗီတာမင်ဓာတ်နှင့် အာဟာရဓာတ်တော်တော်များကိုလည်း ပေးစွမ်းပြီး ကြွက်သားများကြံ့ခိုင်သန်မာလာစေဖို့ အထောက်အကူဖြစ်စေတာကြောင့် ဘော်ဒီတည်ဆောက်နေသူတွေ မဖြစ်မနေသောက်ပေးသင့်တဲ့ အာဟာရဖြည့် ဖျော်ရည်တစ်မျိုးပဲ ဖြစ်ပါတယ်။
(၅) ချယ်ရီသီး
Antioxidant ဓာတ်ကြွယ်ဝတဲ့အစားအစာကို ပြောပါဆိုရင်တော့ ချယ်ရီသီးတွေက ထပ်ဆုံးက ပါဝင်ပါတယ်။ ချယ်ရီသီးဟာ အပြင်းအထန်လေ့ကျင့်ခန်းလုပ်ပြီးနောက်ဖြစ်တက်တဲ့ ကြွက်သား ရောင်ရမ်းမှုနာကျင်ခြင်းတွေကို သက်သာစေပါတယ်။ အားကစားလုပ်သူအများစုကတော့ ကြွက်သားများပျက်စီးမှုကို လျှော့ချရန်အတွက် ချယ်ရီသီးကို စားသုံးပေးကြသလို ဖျော်ရည်အနေနဲ့လည်း သောက်သုံးလေ့ရှိကြပါတယ်။
(၆) ငှက်ပျောသီး
ငှက်ပျောသီးဟာ ကယ်လိုပါဝင်မှုနည်းပြီး ခန္ဓာကိုယ်အတွက် မရှိမဖြစ်လိုအပ်တဲ့ ပိုတက်စီယမ်ဓာတ် ၊ အမျှင်ဓာတ် ၊ ဗီတာမင်ဓာတ် ၊ ပရိုတင်းဓာတ်နဲ့ ကျန်းမာရေးကိုအကျိုးပြုတဲ့အဆီဓာတ်တို့ ကြွယ်ဝစွာပါဝင်ပါတယ်။ အားကစားလုပ်သူတွေအနေနဲ့ ငှက်ပျောသီးပုံမှန်စားပေးမယ်ဆိုမယ်ဆိုရင် အမောခံနိုင်ပြီး အားကစားလုပ်ရာမှာပိုမိုထိရောက်မှုရှိစေမှာပါ။ ဒါအပြင် အားကစားလုပ်နေချိန် ကြွက်တက်ခြင်းကိုလည်း ကာကွယ်ပေးနိုင်ပါတယ်။
