လူမှုကွန်ရက်တွေပေါ်မှာ လူငယ် Motivational Speaker တစ်ဦးဖြစ်တဲ့ Jay Shetty ကို အတော်များများ မြင်ဖူးကြမှာပါ။ Subscriber ၄ သန်းကျော် ရှိတဲ့ YouTube ချန်နယ်တစ်ခုကို တည်ထောင်ထားတဲ့ Jay Shetty အိန္ဒိယသွေးပါတဲ့ ဗြိတိန်လူမျိုးဖြစ်ပြီး Invisible World နာမည်နဲ့ Short Flimစီးရီးလေးတွေကို တင်ဆက်နေသူပါ။
၂၀၁၈ ရဲ့ လူကြည့်အများဆုံး Facebook ဗွီဒီယိုဖန်တီးသူထဲက တစ်ဦးဖြစ်ပြီး စိတ်ပိုင်းဆိုင်ရာ ကျန်းမာကြံ့ခိုင်ရေး ၊ အချစ်ရေးနဲ့ ဘဝအမြင်တွေကိုလည်း မျှဝေနေသူ ဖြစ်ပါတယ်။ Jay Shetty ပြောခဲ့တဲ့ ဘဝသင်ခန်းစာများအကြောင်းထဲမှာ စိတ်ဝင်စားစရာ သင်ခန်းစာလေးတွေ ရှိပါတယ်။
(၁) Comfort Zone က ထွက်တော့မယ်ဆိုရင်
Photo : Success Magazine
မလုပ်မရှုပ်မပြုတ်ဘဝကြီးထဲကနေ လစ်တော့မယ်။ အသစ်တွေ ဖန်တီးတော့မယ်လို့ တွေးရင် ကိုယ့်ကိုယ်ကို ကလေးပေါက်စအဆင့်ကနေ စဖို့ Jay Shetty က အကြံပေးပါတယ်။ “ပြိုင်ကားမောင်းနည်း သင်တော့မယ်ဆိုရင် ကျွန်တော်တော့ Formula 1 ကားမောင်းသမားတွေနဲ့ အရင်မပြိုင်ဘူး။ အခြေခံအတန်းကနေ သွားမှာပဲ” လို့ Shetty က ဆိုပါတယ်။ အသစ်တွေ နားလည်ဖို့အတွက် ကိုယ့်ရဲ့ လေ့လာမှုကို သိပ်ဆန္ဒမစောဖို့ လိုပါတယ်။ မဟုတ်ရင်တော့ တပ်လန်သွားမယ်လို့ ဆိုပါတယ်။
(၂) အရှိန်လျှော့ခြင်း
Photo : Lendio
မနားတမ်း လုပ်နေတာဟာ ဖန်တီးမှုအတွက် ပြဿနာ ဖြစ်နိုင်ပါတယ်။ “သင့်ကိုယ်သင် ပြန်အချိန်ပေးလိုက်တာဟာ ပိုပြီး ဖန်တီးမှုတွေ ဖြစ်လာစေပါတယ်။ ဖန်တီးမှု ပိုကောင်းလာသလို အကောင်းဆုံးလုပ်ရပ်တွေပါ လုပ်နိုင်မှာပါ။ တကယ်လို့ ကိုယ့်ကိုယ်ကို အလျင်သိပ်မလိုအောင် လျှော့ချခြင်း မလုပ်ဘူးဆိုရင် သင့်ခန္ဓာကိုဘ်နဲ့ စိတ်က တစ်နည်းနည်းနဲ့ အဲ့ဒီလို လုပ်အောင် တွန်းအားပေးသွားပါလိမ့်မယ်။”
(၃) အချိန်ရွှေ့ရတဲ့ အကြောင်းရင်းကို ရှာခြင်း
Photo : Sharewise
“ကိုယ့်ကိုယ်ကို မေးကြည့်ပါ။ ပျင်းစရာကောင်းလို့လား ၊ စိတ်ရှုပ်ရလို့လား ။ ခက်ခဲပင်ပန်းလို့လား ။ ဒွိဟဖြစ်နေလို့လား။ အစီအစဉ်တကျမဖြစ်လို့လား ရည်ရွယ်ချက်ပျောက်နေလို့လား။” အကြောင်းရင်းကို ဖော်ထုတ်နိုင်ခြင်းဟာ အချိန်ရွှေ့ရခြင်းရဲ့အားနည်းချက်ကို သိနိုင်မယ်လို့ Jay Shetty က ဆိုပါတယ်။
(၄) ပန်းတိုင်ထက် တိုးတက်မှုကို ဦးစားပေးပါ
“ပန်းတိုင်ကို ရောက်အောင် မောင်းနှင်မယ့် တိုးတက်ရေးကိစ္စတွေပေါ်မှာ အာရုံစိုက်သင့်တယ်” လို့ Jay Shetty က အကြံပေးပါတယ်။ ခြေတစ်လှမ်းဟာ ဘယ်လောက်ပဲ သေးသေး ပန်းတိုင်ဆီ သွားနေတာမျိုး ဖြစ်နေဖို့ လိုပါတယ်။ နေ့တိုင်း တစ်လှမ်းချင်း တိုးတက်နေရမှာ ဖြစ်ပြီး သုံးလလောက်ကြာရင် ကိုယ်ဘယ်လောက်တောင် ရောက်နေပြီလဲဆိုတာ ပြန်ကြည့်လိုက်ရင် အံ့ဩရမယ်လို့ ဆိုပါတယ်။
(၅) ဆုံးဖြတ်ချက်ချခြင်းများရဲ့ နောက်ကွယ်
Photo : Freepik
တစ်ခါတစ်လေမှာ ပစ္စည်းတစ်ခု ဝယ်မယ်လို့ စိတ်ကူးမရှိဘဲ ဆိုင်ထဲ ရောက်သွားချိန်မှာ တန်တယ်လို့ ဆုံးဖြတ်ပြီး ဝယ်လိုက်တာမျိုးတွေ ရှိတတ်ပါတယ်။ လူတွေဟာ တစ်ခုခုကို နှိုင်းယှဉ်ပြီး ဆုံးဖြတ်တတ်ပါတယ်။ “ကားတွေမှာ နာမည်တပ်မထားရင် ကားတွေရဲ့ တန်ဖိုးကို ကျွန်တော်တို့ သိမှာ မဟုတ်ဘူး”လို့ Shetty က ဆိုပါတယ်။ “ကျွန်တော်တို့ဟာ ကိုယ်လိုချင်တဲ့ အရာပေါ်ကြည့်ပြီး ဆုံးဖြတ်ချက်ချကြတာလား ဒါမှမဟုတ် ကိုယ့်အတွက် အရေးကြီးတယ်ဆိုပြီး တွေးပြီး ဆုံးဖြတ်သလား ဒါမှမဟုတ် တစ်ခြားအရာတွေနဲ့ နှိုင်းယှဉ်ကြည့်ရင် ဆွဲဆောင်မှု ရှိတယ်ဆိုတဲ့အပေါ် အခြေခံပြီး ဆုံးဖြတ်ကြတာလား” ဒါတွေကတော့ Jay Shetty ပြောဟောခဲ့သမျှထဲက စဉ်းစားစရာ ဘဝအတွက် သန်ခန်းစာတစ်ချို့အကြောင်းပဲ ဖြစ်ပါတယ်။
