မင်္ဂလာပါ ပျိုမေတို့ရေ။ အားတဲ့အချိန် TV ထိုင်ကြည့်ရင်း အဆီကျလေ့ကျင့်ခန်းတွေလည်း လုပ်နိုင်မယ်ဆိုရင် စိတ်ဝင်စားကြလား။ ဒီတစ်ခေါက်မှာ အဆီတော့ကျချင်ပေမယ့် ပင်ပန်းတဲ့လေ့ကျင့်ခန်းတွေလုပ်ဖို့ ပျင်းတယ်ဆိုတဲ့သူတွေအတွက် တစ်ချက်ခုတ်နှစ်ချက်ပြတ်သလို TV ကြည့်ရင်း အလွယ်လုပ်လို့ရမယ့် လေ့ကျင့်ခန်းတွေကို ဖော်ပြပေးလိုက်ပါတယ်။ ထိုင်ခုံပေါ်က ထစရာမလိုဘဲ အဆီလောင်ကျွမ်းစေမှာဖြစ်သလို တစ်နေ့ကို ၁၀ မိနစ်လောက်ပဲ အချိန်ပေးရုံပဲမို့ တော်တော်များများအတွက် အဆင်ပြေမှာပါ။ ဒီတော့ လေ့ကျင့်ခန်းအသေးစိတ်ကို ဆက်ကြည့်လိုက်ရအောင်။
လေ့ကျင့်ခန်း ၁
ဆိုဖာပေါ် ဘေးတစ်စောင်းလေးလှဲပြီး အောက်ခြေထောက်ကိုကွေးကာ နောက်တစ်ချောင်းကို ဖြေးဖြေးချင်း အပေါ်တင်လိုက် ပြန်ချလိုက် လုပ်ပေးရမှာဖြစ်ပါတယ်။ ခြေထောက်တွေကို ဘယ်၊ ညာပြောင်းပြီး စက္ကန့် ၄၀ စီလုပ်ပေးပါ။
လေ့ကျင့်ခန်း ၂
ဘေးစောင်းလှဲလျက် အနေအထားနဲ့ပဲ ဒူးနှစ်ဖက်ကိုကွေးပြီး ခြေထောက်စိထားပါ။ ခြေဖနောင့်အချင်းချင်း ထိထားပြီး ဒူးနှစ်ဖက်ကို ခွဲလိုက် ပြန်စိလိုက်လုပ်ပေးရမှာဖြစ်ပါတယ်။ သူ့ကိုလည်း ခြေထောက် ဘယ်နဲ့ညာပြောင်းပြီး စက္ကန့် ၄၀ စီလုပ်ပေးဖို့လိုပါတယ်။
လေ့ကျင့်ခန်း ၃
ဆိုဖာမှာ လှဲအိပ်ပြီး ဒူးထောက်ကာ ကျောရိုးတစ်လျှောက်ဆန့်ထားပြီး ခန္ဓာကိုယ်အောက်ပိုင်းကို မ တင်လိုက် ပြန်ချလိုက်လုပ်ပေးပါ။ တတ်နိုင်သလောက် ခပ်မြင့်မြင့်လေး မ တင်ပေးဖို့လိုပါတယ်။ သူ့ကိုလည်း အတင်အချ စက္ကန့် ၄၀ လုပ်ပေးပါ။
လေ့ကျင့်ခန်း ၄
အရှေ့ကလေ့ကျင့်ခန်းပုံစံကိုမှ ဒူးတစ်ချောင်းပဲအားပြုထားပြီး ကျန်တဲ့ခြေထောက်တစ်ဖက်ကို မြှောက်ကာ ခန္ဓာကိုယ် မ လိုက် ပြန်ချလိုက်လုပ်ပေးရမှာဖြစ်ပါတယ်။ ဘယ်ခြေထောက်၊ ညာခြေထောက် တစ်လှည့်စီ စက္ကန့် ၄၀ စာလုပ်ပေးပါ။
လေ့ကျင့်ခန်း ၅
ပုံထဲကလို လှဲလျက်နဲ့ ခြေထောက်နှစ်ချောင်းလုံးကို လေပေါ်မြှောက်လိုက် ပြန်ချလိုက်လုပ်ပေးပါ။ ခပ်မြှင့်မြှင့်လေးမြှောက်ပေးရင်ပိုကောင်းပါတယ်။ ခြေထောက်မြှောက်နေတုန်း ခန္ဓာကိုယ်အပေါ်ပိုင်းအရမ်းမယိမ်းအောင် ဝမ်းဗိုက်ကြွက်သားတွေ တင်းထားပေးပါ။ ကိုယ်တတ်နိုင်သလောက် စက္ကန့် ၄၀ မှ တစ်မိနစ်အထိလုပ်နိုင်ပါတယ်။
လေ့ကျင့်ခန်း ၆
TV ကြည့်ရင်း လက်မောင်းအဆီပါကျစေမယ့် လေ့ကျင့်ခန်းဖြစ်ပါတယ်။ ဆိုဖာပေါ်ထိုင်ကာ လက်တွေကို ကားထားပြီး တောင်ပံခတ်သလို အပေါ်အောက်ပျံနေတဲ့ပုံစံလုပ်ပေးပါ။ သူ့ကိုလည်း စက္ကန့် ၄၀ လောက်အထိရအောင် လုပ်ပေးနိုင်ရင်ပိုကောင်းပါတယ်။
လေ့ကျင့်ခန်း ၇
စက်ရုပ်လက်လို တံတောင်ကိုကွေးထားပြီး အပေါ်အောက် လှုပ်ရှားပေးရမှာပါ။ အပေါ်အောက်လှည့်နေရင်း လက်ပြင်နဲ့ ပုခုံးကြောကို မကုန်းမိအောင် ခပ်တန်းတန်းထားပေးပါ။ သူ့ကိုလည်း စက္ကန့် ၄၀ ပြည့်တဲ့အထိ တတ်နိုင်သလောက် ပြုလုပ်ပေးဖို့လိုပါတယ်။
Source: Youtube
