အိန္ဒိယ မင်းသမီးလေး Janhvi Kapoor ကိုတော့ “Mili” ဇာတ်လမ်းနဲ့ ပရိတ်သတ် အများစု ရင်းနှီးကြမှာပါ။ Mili ဇာတ်လမ်းထဲမှာ Janhvi Kapoor က Mili ဇာတ်ကောင်နာမည်နဲ့ သရုပ်ဆောင်ထားပြီး အအေးခန်းထဲမှာ ၅ နာရီကျော်ကြာ ပိတ်မိနေခဲ့ကာ ထွက်နိုင်အောင် ကြိုးစားခဲ့တဲ့ Nurse မ လေးအနေနဲ့ သရုပ်ဆောင်ထားပါတယ်။ သူမရဲ့ အလှကိုတော့ ဒီဇာတ်လမ်းကို ကြည့်ဖူးတဲ့ ပရိတ်သတ်တွေ သတိထားမိမှာပါ။ Janhvi Kapoor ရဲ့ ထူးခြားတဲ့ အလှတစ်ခုကတော့ ချောမွတ်တဲ့ အသားအရေနဲ့ မျက်နှာလေးပါ။
ဖော်ပြပါ အကြောင်းအရာထဲမှာ မင်းသမီး Janhvi Kapoor လုပ်လေ့ရှိတဲ့ ပေါင်းတင်နည်း တစ်ခုကို ပြောပြထားပါတယ်။
သူမ လုပ်တဲ့ နည်းလမ်းက ပါဝင်ပစ္စည်းနည်းပြီး လွယ်ကူတာကြောင့် စာဖတ်သူတို့ပါ လိုက်လုပ်နိုင်ပါတယ်။ ဒါ့အပြင် ဒီပေါင်းတင်နည်းကို တစ်ကြိမ်လုပ်ပေးရုံနဲ့ သိသာတဲ့ ရလဒ်ကို ရနိုင်ပါတယ်။ ဒီတော့ မင်းသမီး Janhvi Kapoor ရဲ့ ပေါင်းတင်နည်းလမ်းကို ကြည့်လိုက်ရအောင်-
အဆီထုတ် ဒိန်ချဉ်တစ်ဇွန်း
ခွက်တစ်ခွက်ထဲကို အဆီထုတ် ဒိန်ချဉ်တစ်ဇွန်း ထည့်ပေးရပါမယ်။ ဒိန်ချဉ်က အသားအရေကို အစိုဓာတ်ပေးပြီး တင်းရင်းစေပါတယ်။ ချွေးပေါက်ကျဉ်းစေပြီး ညိုမည်းတာတွေကို ဖယ်ရှားပေးနိုင်ပါတယ်။
ပျားရည် တစ်ဇွန်း
ဒိန်ချဉ်ထည့်ပြီးနောက် ပျားရည်ကို ဆတူ တစ်ဇွန်းထည့်ပေးရပါမယ်။ ပျားရည်ကတော့ အသားအရေကို အစိုဓာတ်ပေးနိုင်တဲ့ အရည်တစ်မျိုးပါ။ အသားအရေကို ငယ်ရွယ်နုပျိုစေဖို့လည်း ပျားရည်က ကူညီပေးပါတယ်။
ရောမွှေပေးပါ
ဒိန်ချဉ်နဲ့ ပျားရည်နှစ်မျိုးကို ထည့်ပြီးနောက် ဇွန်းနဲ့ ရောမွှေပေးရပါမယ်။
ငှက်ပျောသီး တစ်လုံး
ငှက်ပျောသီး တစ်လုံး ဒါမှမဟုတ် တစ်ဝက်ကို ဒီ ဒိန်ချဉ်ပျားရည်ခွက်ထဲ ထည့်ကာ ရောကျိတ်ပေးရပါမယ်။ ငှက်ပျောသီးကတော့ အသားအရေကို ရေဓာတ်ဖြည့်ပေးပြီး ရှင်းလင်းကြည်လင်စေပါတယ်။
ဒီပါဝင်ပစ္စည်း သုံးမျိုးကို ရောမွှေကာ သင့်မျက်နှာပေါ် လိမ်းပေးရပါမယ်။ မျက်နှာမှာ လိမ်းပြီးနောက် ၁၅ မိနစ်ကနေ မိနစ် ၂၀ ထားပေးရပါမယ်။ ပြီးရင်တော့ ရေဆေးချနိုင်ပါပြီ။
Photo Source: Pinterest
By MyStyle Myanmar
