ပရော်ဖက်ရှင်နယ်ဆန်စွာ ဝတ်စားဆင်ယင်ခြင်းဆိုတာ ဘာကိုပြောတာလဲ မေးစရာရှိပါတယ်။ လုပ်ငန်းခွင်ဝင်သူတွေအဖို့ သာမာန် Graphic Tees ၊ Skinny Jeans ဖက်ရှင်မျိုးနဲ့ ရုံးတက်လို့ အဆင်မပြေနိုင်ပါဘူး။

လုပ်ငန်းခွင်နဲ့ အံ့ဝင်ဂွင်ကျဖြစ်မယ့် Formal ကျတဲ့ ဝတ်စုံတွေ ၊ အသုံးအဆောင် ပစ္စည်းတွေနဲ့ သပ်သပ်ရပ်ရပ် စမတ်ကျကျ ဝတ်ဆင်တာမျိုးကို ပရော်ဖက်ရှင်နယ်ဆန်ဆန် ဝတ်ဆင်ခြင်းလို့ ရည်ညွှန်းတာဖြစ်ပါတယ်။

လုပ်ငန်းခွင်မှာ ပရော်ဖက်ရှင်နယ်ဆန်စွာ ဝတ်စားဆင်ယင်ခြင်းက လူတစ်ယောက်ရဲ့ ကိုယ်ရည်ကိုယ်သွေးနဲ့ လုပ်ငန်းစွမ်းဆောင်ရည်အပေါ် များစွာအကျိုးသက်ရောက်မှုရှိစေပါတယ်။

ဒါကြောင့် ဒီတစ်ခေါက်မှာ လုပ်ငန်းခွင် ဝင်သူတွေအနေနဲ့ အလုပ်မှာ ဘာကြောင့် ပရော်ဖက်ရှင်နယ်ဆန်ဆန် ဝတ်စားဆင်ယင်ဖို့ လိုအပ်သလဲဆိုတာ ပြောပြပေးချင်ပါတယ်။

(၁) First Impression ကောင်းစေတယ်

ဖက်ရှင်အသွင်အပြင်ဆိုတာ လူတစ်ယောက်နဲ့တစ်ယောက် စတင်တွေ့ဆုံချိန်မှာ ပထမဆုံးသတိထားမိစေတဲ့အရာ ဖြစ်ပါတယ်။ သင့်ရဲ့ ဝတ်ပုံစားပုံက သင့်ရဲ့ ကိုယ်ရည်ကိုယ်သွေးအကြောင်း ပြောပြနေသလို လူတွေသင့်အပေါ်မြင်တဲ့ အမြင်ကိုလည်း များစွာပြောင်းလဲနိုင်စွမ်းရှိပါတယ်။ ဒါကြောင့်လည်း လုပ်ငန်းခွင်မှာ သပ်သပ်ရပ်ရပ်နဲ့ ပရော်ဖက်ရှင်နယ်ဆန်စွာ ဝတ်စားတက်ဖို့က အရေးကြီးတာပါ။

(၂) ယုံကြည်မှု တိုးစေတယ်

ရိုးရိုးလေးပဲ တွေးကြည့်ရအောင်ပါ။ အဝတ်အစားသပ်သပ်ရပ်ရပ်နဲ့ ကောင်းမွန်စွာဝတ်စားထားချိန်မှာ ကိုယ့်ကိုယ်ကို ယုံကြည်မှုပိုရှိတယ်လို့ ခံစားရစေတယ် မဟုတ်လား။ ဒီလိုပါပဲ အလုပ်ခွင်မှာ ပရော်ဖက်ရှင်ကျကျဝတ်စားထားမယ်ဆိုရင် စိန်ခေါ်မှုအသစ်တွေ ရယူဖို့ ၊ လူသစ်တွေနဲ့ တွေ့ဆုံဖို့နဲ့ သင့်လုပ်ငန်းခွင် တိုးတက်အောင်မြင်ရေးအတွက် ခွန်အားနဲ့ ယုံကြည်မှုတွေများစွာ ရရှိခံစားရစေမှာ ဖြစ်ပါတယ်။

(၃) လူတွေရဲ့ ယုံကြည်လေးစားမှု ပိုရစေတယ်

သပ်သပ်ရပ်ရပ်နဲ့ စမတ်ကျကျ ဝတ်ဆင်ထားခြင်းဟာ ကိုယ့်ကိုယ်ကို ယုံကြည်မှုတိုးစေရုံသာမက လုပ်ဖော်ကိုင်ဖက်တွေ ၊ ဖောက်သည်တွေရဲ့ ယုံကြည်လေးစားမှုကိုလည်း ရရှိခံစားရစေမှာ ဖြစ်ပါတယ်။ သင့်ရဲ့ ဝတ်စားဆင်ယင်မှုဟာ သင့်ကို ပရော်ဖက်ရှင်နယ် ပိုဆန်သွားစေပြီး ကိုယ်နဲ့အတူတူ အလုပ်တွဲလုပ်နေရသူတွေရဲ့ အမြင်မှာ ယုံကြည်လေးစားထိုက်သူ တစ်ယောက်ဖြစ်နေစေမှာပါ။

(၄) စိတ်ဓာတ်တက်ကြွစေတယ်

အလုပ်ခွင်မှာ ပရော်ဖက်ရှင်ဆန်ဆန် ဝတ်စားဆင်ယင်ခြင်းက သင့်ကို စိတ်ဓာတ်ပိုမိုတက်ကြွစေပြီး လုပ်ငန်းစွမ်းဆောင်ရည် မြှင့်တင်ပေးနိုင်ပါတယ်။ အဝတ်အစားပေါ်လိုက်ပြီး လူတွေရဲ့ စိတ်ဟာ ပြောင်းလဲတက်တာကြောင့် ကောင်းမွန်သပ်ရပ်စွာ ဝတ်စားထားမယ်ဆိုရင် အလုပ်လုပ်ရာမှာ ပိုမိုတက်ကြွမှုရှိစေပြီး အလုပ်ပြီးမြောက်အောင်မြင်ဖို့ များစွာအထောက်အကူဖြစ်စေမှာပါ။