ယောကျာ်းလေးဆန်တဲ့ မိန်းကလေးတွေမှာ ရှပ်အင်္ကျီ Flannel Shirt တစ်ထည်တော့ အနည်းဆုံး ပိုင်ဆိုင်ထားတတ်ကြပါတယ်။ ဒါမှမဟုတ် သင့်ကောင်လေးဝတ်နေကျ အကွက်အပွတွေကလည်း သင့်ရဲ့ ဖက်ရှင်ကို ပိုလှဖို့ ကူညီနိုင်ပါသေးတယ်။ ဒီ ရှပ်အင်္ကျီအပွတွေက ဝတ်ဆင်သူကို ခပ်မိုက်မိုက်နဲ့ ယောကျာ်းဆန်ဆန် ဖက်ရှင် Vibe ကို ပိုင်ဆိုင်စေပါတယ်။ ဒီ Flannel Shirt ကို ပုံစံတစ်မျိုးတည်း ထားဝတ်နေရင် သင့်အတွက် ငြီးငွေ့ဖို့ ကောင်းမှာပါ။

ဒီတော့ အင်္ကျီအကွက် အပွ တစ်ထည်တည်း ပိုင်ဆိုင်ရုံနဲ့ ခပ်မိုက်မိုက် ဖက်ရှင်အမျိုးမျိုးကို ဝတ်ဆင်နိုင်ဖို့ ဘယ်လိုလုပ်နိုင်လဲ ကြည့်လိုက်ရအောင်နော်-

၁။ အထဲက Tank Top နဲ့

သင့်အင်္ကျီအထဲက အဖြူရောင် ခါးတိုနဲ့ အပြင်ထပ် Flannel Shirt ကို ထပ်လိုက်တာက သင့်ဖက်ရှင်ကို ပြီးပြည့်စုံစေပါတယ်။ အောက်က ဘောင်းဘီအပွနဲ့ဆိုရင် သင့်ကို ပိုလန်းနေစေမှာပါ။ အဖြူရောင်အပြင် အနက်ရောင် ခါးတိုတွေကလည်း အဆင်ပြေပါတယ်။

၂။ အထဲက Hoodie နဲ့

ဒီဖက်ရှင်က ဆောင်းရာသီနဲ့ လိုက်ဖက်ပါတယ်။ အထဲက Hoodie အပွ ခံပြီး အပြင်က Flannel Shirt ထပ်လိုက်တာပါ။ ဒီစတိုင်က သင့်ကို လုံလုံခြုံခြုံနဲ့ အထာကျစေပါတယ်။

၃။ လည်ပင်းအပိတ်နဲ့

သင်က ဂျစ်ကန်ကန်စတိုင်မဟုတ်ဘဲ တည်တည်ငြိမ်ငြိမ် စတိုင်လေး ပိုင်ဆိုင်ချင်ရင်တော့ လည်ပင်းအပိတ်အင်္ကျီနဲ့ Flannel Shirt ကို တွဲဖက်ဝတ်ဆင်နိုင်ပါတယ်။

၄။ Tennis Skirt နဲ့

သင်က လူငယ်ဆန်ဆန်လေး ပေါ့ပေါ့ပါးပါး လန်းချင်တယ်ဆိုရင် Flannel Shirt နဲ့ အတူ Tennis Skirt အကားလေးကို ဝတ်ဆင်နိုင်ပါတယ်။ Tennis Skirt အပြင် ရိုးရိုးစကပ်ကိုလည်း တွဲဖက်ဝတ်ဆင်နိုင်ပါတယ်။

၅။ အထဲထည့်ဝတ်တာ

ဒါကတော့ မိန်းကလေးအများစု ဝတ်တဲ့ ပုံစံဖြစ်ပါတယ်။ Flannel အပွကို စကပ်ထဲ ထည့်ဝတ်တာ၊ ဘောင်းဘီရှည်ထဲ ထည့်ဝတ်တာတွေ လုပ်နိုင်ပါတယ်။

Photo Source: Pinterest

By MyStyle Myanmar