စတုရန်းပုံ သို့မဟုတ် တြိဂံပုံခေါက်ထားတဲ့ ပဝါကို Bandana လို့ခေါ်ပြီးတော့ ခေါင်းစည်း/လည်စည်းပဝါအဖြစ် အသုံးပြုကြပြီး ဖက်ရှင်ကို စတိုင်ပိုကျအောင်ဖြည့်စွက်ပေးနိုင်တဲ့ စွယ်စုံရ Timeless ဖက်ရှင် အသုံးအဆောင်ပစ္စည်းတစ်ခုအဖြစ် နာမည်ကြီးပါတယ်။
အရောင်အသွေးစုံ ဒီဇိုင်းမျိုးစုံရှိပြီးတော့ လူငယ်ဆန်ပြီး အထာကျစေဖို့ Bandana တွေကို ဘယ်လိုဝတ်ဆင်နိုင်မလဲဆိုတာ လေ့လာကြည့်ရအောင်ပါ။
(၁) လည်စည်းစတိုင်
အရိုးရှင်းဆုံးနဲ့ အဝတ်အများဆုံး နည်းလမ်းတစ်ခု ဖြစ်ပါတယ်။ လူတိုင်းနဲ့ လိုက်ဖက်မှုရှိပြီး Casual ရော Smart Casual အနေနဲ့ပါ ဝတ်လို့ရပါတယ်။ ဆိုဒ်အရမ်းမကြီးတဲ့ Bandana ကို ရွေးချယ်ဖို့တော့ လိုပါတယ်။ Bandana ကို အထုံးတစ်ချက်ချည်ပြီး လည်တိုင်ရဲ့ အရှေ့ မှာချထားတဲ့ ပုံစံမျိုးဝတ်လို့ ရပါတယ်။
လည်စည်းအနေနဲ့ ဝတ်မယ်ဆို အရောင်ရင့်ရင့် Bandana တွေကို ရွေးချယ်နိုင်ပြီး ကိုယ့်ရဲ့ Outfits ကအရောင်ပါတဲ့ ဝတ်စုံမျိုး ဖြစ်နေမယ်ဆိုရင်တော့ အရောင်ခပ်နုနု Bandana တွေနဲ့ တွဲဖက်ဝတ်ဆင်နိုင်ပါတယ်။
(၂) ခေါင်းစည်းစတိုင်
လူငယ်ဆန်ပြီး Rockstar တစ်ယောက်လို အသွင်ပြင်မျိုးကြိုက်တဲ့သူတို့အတွက်တော့ ခေါင်းစည်းပုံစံ ဝတ်ဆင်လို့ ရပါတယ်။ ဒီပုံက အဆို တော်ဆယ်လီတွေ အဝတ်များတဲ့ စတိုင်တစ်ခုလည်း ဖြစ်ပါတယ်။ အနက်ရောင် Bandana ကို ခေါင်းစည်းအနေနဲ့ အများဆုံးဝတ်ကြပေမယ့် တခြား ကာလာတွေလည်း ဝတ်လို့အဆင်ပြေပါတယ်။
အမိုက်စား Streetwear ဝတ်စုံတွေနဲ့ တွဲဝတ်လိုက်မယ်ဆိုရင်တော့ လူငယ်ဆန်ပြီး ပေါ့ပေါ့ပါးပါးနဲ့ လုံးဝစတိုင်ကျစေမှာပဲ ဖြစ်ပါတယ်။
(၃) လက်ပတ်စတိုင်
Bandana ကို ရိုးရိုးရှင်းရှင်းနဲ့ စတိုင်ကျအောင်ဝတ်လို့ရမယ့် နောက်တစ်နည်းက လက်ကောက်ဝတ်မှာချည်ပြီး ဝတ်တဲ့ပုံစံပါ။ စတိုင်ကျပြီး ပေါ့ပေါ့ပါးပါး ဝတ်ချင်တဲ့သူတို့အတွက် ဒီနည်းလေးက အသင့်တော်ဆုံး ဖြစ်ပါတယ်။ လက်ပတ်အနေနဲ့ ဝတ်မယ်ဆို အဖြူ/အနက် Paisley ဒီဇိုင်းနဲ့ Classic Bandana တွေကပိုပြီး လိုက်ဖက်မှုရှိပါတယ်။
Bandana ကို လက်ကောက်ဝတ်မှာ တစ်ချက်ချည်ပြီး တွဲလောင်းချထားတဲ့ ပုံစံမျိုးဝတ်နိုင်သလို သေသေသပ်သပ်ခေါက်ပြီး လက်ပတ်ပုံစံလည်း ဝတ်လို့ရပါတယ်။
(၄) ဘောင်းဘီအိတ်ကပ်စတိုင်
Bandana တွေက စွယ်စုံရ ဖက်ရှင် Accessories တစ်ခုလို့ ပြောခဲ့သလိုပါပဲ ခေါင်းစည်း ၊ လည်စည်း ၊ လက်ပတ်အနေနဲ့ မဝတ်ချင်သူတွေအတွက် ဘောင်းဘီအိတ်ကပ်ထဲမှာထည့်ဝတ်တဲ့ အိတ်ဆောင်စတိုင်မျိုးလည်း ဝတ်လို့ရပါတယ်။ အချိန်တိုင်း လူငယ်ဆန်ဆန်နဲ့ အထာကျတဲ့ ဖက်ရှင်စတိုင်မျိုး ရစေမှာပါ။
ဘောင်းဘီအိတ်ကပ်ထဲ ထည့်ဝတ်မယ်ဆိုရင်တော့ ပေါ်လွင်မှုရှိစေဖို့ အရောင်ခပ်တောက်တောက် Bandana တွေကို ရွေးချယ်ဖို့ အကြံပြုချင်ပါတယ်။ အိတ်ဆောင်အနေနဲ့ မဝတ်မီ သပ်သပ်ရပ်ရပ် စတိုင်ကျနေစေဖို့ Bandana ကို သေချာမီးပူတိုက်ပြီးမှဝတ်ဖို့လည်း မှာချင်ပါတယ်။
