အားလုံးပဲ မင်္ဂလာပါ။ ဆံပင်ကျွတ်ရခြင်းအကြောင်းအမျိုးမျိုးရှိပါတယ်။ စိတ်ဖိစီးမှုများတာ၊ တားဆေး၊ ဟော်မုန်းအပြောင်းအလဲ၊ ဆံပင်အလှကုန်ပစ္စည်း စတဲ့ အကြောင်းအမျိုးမျိုး ပါဝင်နေပါတယ်။ သင်က ခေါင်းလျှော်လိုက်တိုင်း ဆံပင်ခဏခဏ ကျွတ်တယ်ဆိုရင်တော့ ဆံပင်ကျွတ်သက်သာအောင် ဒီလိုထိန်းသိမ်းနိုင်ပါတယ်။

၁။ ရှန်ပူ

ခေါင်းခဏခဏ လျှော်တာကလည်း ဆံပင်ကျွတ်ရခြင်းအကြောင်းအရင်းဖြစ်ပါတယ်။ ရှန်ပူထဲမှာ ပါဝင်တဲ့ Sulfate, Paraben နဲ့ Silicone စတဲ့ပစ္စည်းတွေကြောင့် ဆံပင်ကျွတ်နိုင်ပါတယ်။ ကိုယ့်ဆံပင်အမျိုးအစားအလိုက် သင့်လျော်တဲ့ ခေါင်းလျှော်ရည်ကို ရွေးချယ်သင့်ပါတယ်။

၂။ ဆံပင်ပျော့ဆေး

မှန်ကန်ပြီး အရည်အသွေးကောင်းတဲ့ ဆံပင်ပျော့ဆေးက ဆံပင်ကျွတ်တာ သက်သာစေပါတယ်။

၃။ အစားအစာနဲ့လေ့ကျင့်ခန်း

ကိုယ့်ခန္ဓာကိုယ်အတွက် အစာစားရသလို ဆံပင်အတွက်လည်း လိုအပ်တဲ့ အာဟာရကို စားသုံးသင့်ပါတယ်။ ပရိုတင်းနဲ့ သံဓာတ်ပါဝင်မှုများတဲ့ အစားအသောက်တွေကို ရွေးချယ်စားသုံးရပါမယ်။ အစားအစာ မျှတမှုနဲ့အတူ လေ့ကျင့်ခန်းလည်းလုပ်ရပါမယ်။ ယောဂကျင့်တာ၊ တရားထိုင်တာ စတဲ့ လုပ်ငန်းတွေကလည်း ဆံပင်ကျွတ်သက်သာစေပါတယ်။


၄။ ဓာတုပစ္စည်းတွေနဲ့ ထိတွေ့မှု

Hair Dryer နဲ့ ဆံပင်ခြောက်သွေ့အောင်လုပ်တာကလည်း ဆံပင်ကျွတ်စေပါတယ်။ ဆံပင်ဖြောင့်တဲ့ အပူချောင်းတွေကြောင့်လည်း ဆံပင်ကျွတ်နိုင်ပါတယ်။ Hair Dryer မဖြစ်မနေသုံးရမယ်ဆိုရင်လည်း အပူ Setting ကို လျှော့သုံးသင့်ပါတယ်။ ဓာတုပစ္စည်းတွေနဲ့ ဆံပင်ထိန်းသိမ်းတာကလည်း ဆံပင်ကျွတ်စေတဲ့အကြောင်းအရင်းတစ်ခုပါ။


၅။ အဆီဓာတ်

ဆံပင်ကို သံလွင်ဆီ၊ အုန်းဆီစတဲ့ အဆီတစ်မျိုးနဲဲ့ တစ်ပတ်တစ်ခါတလောက် နှိပ်နယ်ပေးသင့်ပါတယ်။ ပြီးနောက် Shower Cap နဲ့အုပ်ထားပေးရပါမယ်။ နှစ်နာရီကြာပြီးနောက် ခေါင်းလျှော်လို့ရပါပြီ။

၆။ ကြက်ဥ Mask


ကြက်ဥမှာ ဆံပင်ရှည်အောင် ကူညီပေးတဲ့ Sulphur, Phosphorous, Selenium, Iodine, Zinc နဲ့ Protein ဓာတ်တွေပါဝင်ပါတယ်။ ဒီ Mask အတွက် လိုအပ်တဲ့ပစ္စည်းတွေကတော့-

  • ကြက်ဥအကာနဲ့ သံလွင်ဆီတစ်ဇွန်း၊ ပျားရည်တစ်ဇွန်းလျောပေးရပါမယ်။
  • သေချာမွှေပြီးနောက် ဒီအရောကို ဆံသား အစအဆုံးလိမ်းပေးရပါမယ်။
  • မိနစ် နှစ်ဆယ်ကြာပြီးနောက် ရှန်ပူအပျော့စားနဲ့ ခေါင်းလျျော်ပေးရပါမယ်။

၇။ Green Tea

Green Tea မှာ ဆံပင်ရှည်ဖို့နဲ့ ဆံပင်ကျွတ်တာကာကွယ်ဖို့ အက်တီအောက်ဆီးဒင့်ဓာတ်တွေပါဝင်ပါတယ်။

  • ကိုယ့်ဆံပင် အရှည်အလိုက် Green Tea အိတ် နှစ်အိတ်-သုံးအိတ်လောက်ကို ရေနွေးစိမ်ပေးရပါမယ်။
  • အေးတဲ့အချိန်မှာ သင့်ဦးရေပြားကနေ စပြီး လောင်းချပေးရပါမယ်။ ပြီးနောက် နှိပ်နယ်ပေးရပါမယ်။
  • တစ်နာရီကြာပြီးနောက် ရေအေးနဲ့ ဆေးချပေးရပါမယ်။

၈။ ဒိန်ချဉ်နဲ့ ပျားရည်

  • ဒိန်ချဉ်နှစ်ဇွန်းနဲ့ ပျားရည်တစ်ဇွန်း၊ သံပယိုရည် တစ်ဇွန်းကို ခွက်တစ်ခွက်ထဲ လျောပေးရပါမယ်။
  • ခြောက်သွေ့တဲ့ဘရပ်ရှ်ကိုသုံးပြီး ဒီအရောကို ဆံသားအရင်းကနေ စပြီး ဖြီးပေးရပါမယ်။
  • ဒါကို မိနစ် ၃၀ ထားပြီး ရေဆေးချပေးရပါမယ်။
  • ဒီအနှစ်ကို တစ်ပတ်တစ်ခါ သုံးပေးသင့်ပါတယ်။

၉။ ရှားစောင်းလတ်ပတ်

ရှားစောင်းလတ်ပတ်က ဆံပင်ကျွတ်တာအတွက် အထူးသင့်လျော်ပါတယ်။ ဗောက်သက်သာစေပါတယ်။

  • ရှားစောင်းလတ်ပတ်ဂျယ်ကို ထုတ်ယူပြီး ဆံပင်နဲ့ ဦးရေပြားကို လိမ်းပေးရပါမယ်။ ပြီးနောက် ၄၅ မိနစ်ထားပေးရပါမယ်။
  • ရေနဲ့ဆေးချပေးရပါမယ်။ ဒါကို တစ်ပတ်မှာ သုံးကြိမ်ကနေ လေးကြိမ် ပြုလုပ်နိုင်ပါတယ်။

၁၀။ ကြက်သွန်နီရည်

  • ကြက်သွန်နီရည်ရဖို့ ကြက်သွန်နီကို ကျိတ်ပေးရပါမယ်။ ပြီးနောက် အရည်ညှစ်ပေးရပါမယ်။
  • ဝါဂွမ်းလုံးကို ကြက်သွန်နီရည်ထဲနှစ်ပြီးနောက် ဦးရေပြားပေါ်လိမ်းပေးရပါမယ်။
  • မိနစ် ၂၀ ကနေ ၃၀ ထားပြီး ခေါင်းလျှော်ပေးရပါမယ်။
  • တစ်ပတ်မှာ တစ်ကြိမ်ပြုလုပ်နိုင်ပါတယ်။

Photo Source: Pinterest

By MyStyle Myanmar