အသားအရေအမျိုးအစားအလိုက် သင်နဲ့လိုက်ဖက်တဲ့ Foundation ကိုဘယ်လိုရွေးချယ်မလဲ။ ဒါက စိန်ခေါ်မှုတစ်ခုလိုပါပဲ။ Foundation တစ်ခု ရွေးတဲ့အချိန် အရောင်နံပါတ်တွေ အရောင်တွေ အမျိုးအစားအများကြီးရှိပါတယ်။ မိတ်ကပ်တွေကလည်း Brand တွေအများကြီးဆိုတော့ ရွေးရအခက်သား။ ပြစ်မျိုးမဲ့မထင် ချောမွတ်ပြီး မိတ်ကပ်သိပ်သိပ်လေးလိုချင်တာကတော့ အားလုံးရဲ့ အိပ်မက်ပဲမဟုတ်လား။

မှားရွေးမိပြန်ရင်လည်း မိတ်ကပ်ဖိုးနဲ့တင် လွယ်တာမဟုတ်ဘူးနော်။ မကြိုက်လို့ လွှင့်ပစ်ဖို့ကလည်းအခက်သားလေ။ ဒါကြောင့် ကိုယ်နဲ့ လိုက်ဖက်တာ ဘယ်လို Foundation အမျိုးအစားလဲသိထားရင်တော့ အကောင်းဆုံးပါပဲ။ ပျိုမေတို့အတွက် မှန်ကန်တဲ့ Foundation ကို ဘယ်လိုရွေးချယ်မလဲဆိုတာ MyStyle Myanmar ကနေ တင်ပြလိုက်ပါတယ်။

၁။ သင့်အသားအရေဘယ်အမျိုးအစားထဲပါဝင်လဲ သိထားပါ

အသားအရေအမျိုးအစားသိထားတာက မှန်ကန်တဲ့ Foundation ရွေးချယ်တဲ့နေရာမှာ အခရာတစ်ခုပါပဲ။

-အဆီပြန်တဲ့အသားအရေ

သင်က အဆီပြန်တဲ့အသားအရေကိုပိုင်ဆိုင်သူဆိုရင်တော့ အဆီမပါတဲ့ Oil-free မိတ်ကပ်အရည်ကိုဝယ်သင့်ပါတယ်။ ဒီအရည်ထဲမှာ အဆီကို စုပ်ယူတဲ့ ပေါင်ဒါပါဝင်ပြီးတော့ ချောမွတ်တဲ့ Matte ပုံစံမျိုး ရစေပါတယ်။ Mineral Foundation ကလည်း အဆီပြန်တဲ့အသားအရေအတွက် သင့်တော်ပါတယ်။ ဘာလို့လဲဆိုတော့ ခြောက်သွေ့တဲ့အမှုန်တွေက စွတ်စိုမှုကို စုတ်ယူပြီး တောက်ပစေလို့ပါ။

ခြောက်သွေ့တဲ့အသားအရေ

သင့်အသားအရေက ခြောက်သွေ့တဲ့အထဲပါရင်တော့ရေဓာတ်ဖြည့်ပေးတဲ့ Hydration Powder Foundation၊ Liquid ဒါမှမဟုတ် Stick Foundation ကိုသုံးပေးပါ။ ဒီ Foundation တွေက အနှစ်များတဲ့ Creamy ပုံစံမို့ အရေပြားကို အစိုဓာတ်ပေးပြီး Coverage ဖုံးကွယ်ပေးတာ ကောင်းမွန်ပါတယ်။

ပေါင်းစပ်အသားအရေ

သင်ဟာ အသားအရေတစ်ကွက် အဆီပြန်လိုက် တစ်ချို့နေရာမှာ ခြောက်သွေ့လိုက်ဆိုရင်တော့ပေါင်းစပ်အသားအရေပိုင်ရှင်ပါ။ ဒီလိုအသားအရေပိုင်ရှင်တွေက Foundation ရွေးရတာခက်ခဲပါတယ်။ ပေါင်းစပ်ဖော်မြူလာ Matching Formula ဆိုပြီးပါဝင်တဲ့ Foundation မျိုးကိုရွေးချယ်ပြီး အဆီများလွန်းတဲ့ Foundation မျိုးကိုတော့ ရှောင်ရပါမယ်။ Maybelline Fit Me Matte and Poreless Foundation က ပေါင်းစပ်အသားအရေပိုင်ရှင်တွေနဲ့သင့်တော်ပါတယ်။

အထိအခိုက်လွယ်တဲ့ အသားအရေ

သင့်အသားအရေက ဒီထဲပါနေရင်တော့ အထူးရှောင်ရမှာက သင့်အရေပြားကို ယားယံစေတဲ့ အယ်လ်ကိုဟောနဲ့ အနံ့ပါဝင်တဲ့ Foundation တွေပါ။ Mineral Oil၊ Talc ဆိုပြီး မိတ်ကပ်ပါဝင်ပစ္စည်းထဲမှာ ပါရင်တော့ လုံးဝရှောင်ရပါမယ်။ သင့်မိတ်ကပ်ထဲမှာ ဒီနာမည်တွေပါလား စစ်ကြည့်ပါဦးနော်။

၂။ ကိုယ့်အသားအရေနဲ့ လိုက်တဲ့အရောင်ကို ရွေးတတ်ပါစေ

ကိုယ်နဲ့လိုက်ဖက်တဲ့ မိတ်ကပ်အရောင်ကို ဘယ်လိုရွေးမလဲ။ သင့်အသားအရေပေါ်မှာ Foundation စမ်းဖို့အကောင်းဆုံးနေရာကတော့ လည်ပင်း ဒါမှမဟုတ် မေးရိုးဆက်ပါပဲ။ သင်နဲ့လိုက်ဖက်တဲ့အရောင်က သင့်အသားအရေနဲ့ တစ်ထပ်တည်းဖြစ်သွားမှာပါ။ ကိုယ့်အသားအရေထက် ပိုဖြူနေတာမျိုး ဒါမှမဟုတ် ပိုညိုသွားတာမျိုးဖြစ်နေရင် သင့်အရောင်မဟုတ်ပါဘူး။ နွေရာသီ ဆောင်းရာသီလိုရာသီတွေမှာ မိတ်ကပ်အရောင်နှစ်မျိုးရောစပ်လိမ်းနိုင်ပါတယ်။ သင့်ရဲ့ အသားအရေအရောင်က တစ်နှစ်လုံးမှာ အပြောင်းအလဲရှိနိုင်လို့ပါ။

တကယ်လို့ ကိုယ်က ရွေးချယ်ရာမှာ ဇဝေဇဝါဖြစ်နေရင် အနည်းငယ်ညိုတာမျိုးကိုရွေးလိုက်ပါ။ ပိုဖြူတဲ့ အရောင်က သဘာဝမကျဘဲ ဖြူထွက်သွားတတ်လို့ပါ။

၃။ သင့်အသားအရေအရောင်ကို သိပါစေ

မျက်နှာပြောင်ဘာမှမလိမ်းထားတဲ့အချိန်မှာကိုယ့်အသားအရေကို ကြည့်လိုက်ပါ။ အဝါရောင်သန်းတယ်ဆိုရင်တော့ သင်က Warm လို့ခေါ်တဲ့ အသားအရေအမျိုးအစားပါ။ ပန်းရောင်သန်းနေတယ်ဆိုရင်တော့ သင်က Cool အရောင်အမျိုးအစားပါ။ ဒီနှစ်ရောင်ပေါင်းစပ်ထားရင်တော့ သင်ဟာ ကြားနေ Neutral အရောင်ပါ။ နောက်တစ်နည်းက သင့်သွေးကြောအရောင်ကို ကြည့်ဖို့ပါ။ သင့်လက်ဖျံသွေးကြောအရောင်ကို နေရောင်အောက်မှာ ကြည့်လိုက်ပါ။ ခရမ်းရောင်ဒါမှမဟုတ် အပြာရောင်သန်းနေရင် သင်က Cool အရောင်ပါ။ အစိမ်းရောင်ဆိုရင်တော့ Warm-toned ပါ။ ဒီတော့ Foundation ဘယ်လိုရွေးမလဲ။ Foundation တွေမှာ Warm-toned Cool-toned ဆိုပြီး ရေးထားတတ်ပါတယ်။

၄။ ကိုယ့်ရဲ့ Finish ကိုသိပါ

ဒါကဘာကိုဆိုလိုတာလဲဆိုတော့ ကိုယ့်ရဲ့ မိတ်ကပ်ကနောက်ဆုံးမှာ ဘယ်လိုပုံစံမျိုးပေါ်ချင်တာလဲဆိုတာ ရွေးချယ်ရတာပါ။ Matte ပုံစံ မိတ်ကပ်သိပ်သိပ်လေးသွားချင်တာလား။ ဒါမှမဟုတ် တောက်ပပြီးတော့ အသားအရေကို လင်းသွားချင်တာလား။ Foundation တွေမှာ ဘာ Finish Foundation ဆိုပြီးရေးထားတတ်ပါတယ်။ အဆီပြန်တဲ့အသားအရေ ပေါင်းစပ်အသားအရေပိုင်ရှင်တွေက Matte Finish Foundation ဘက်သွားသင့်ပါတယ်။

၅။ မဝယ်ခင်စမ်းလိမ်းကြည့်ပါ

Source: Wise Bread

အလှပြင်ပစ္စည်းရောင်းတဲ့ဆိုင်ကို ဘယ် တံဆိပ်က ဘယ်သူညွှန်လိုက်လို့ဆိုပြီး တန်းမဝယ်လိုက်ပါနဲ့။ သူနဲ့အဆင်ပြေပေမယ့် ကိုယ်နဲ့ပြေချင်မှပြေမှာပါ။ ကိုယ်ကိုယ်တိုင် စမ်းသပ်ကြည့်မှ ကိုယ်နဲ့လိုက်မလိုက်သိနိုင်ပါတယ်။ တချို့ ဆိုင်ဝန်ထမ်းတွေက စိတ်မရှည်ပါဘူး။ ဒီတော့ ကိုယ့်ကို စိတ်ရှည်ပြီး သေသေချာချာရှင်းပြနိုင်တဲ့ ဆိုင်ကနေ ဝယ်ရင် ပိုအဆင်ပြေပါတယ်နော်။ ဒီလိုစမ်းတဲ့နေရာမှာလည်း လက်မှာစမ်းတာက မှားယွင်းတဲ့ စမ်းသပ်ချက်တစ်မျိုးပါ။ မေးရိုးအဆက်မှာ စမ်းလိမ်းပါ။ သင့်လက်နဲ့ သင့်မျက်နှာက အသားအရောင်မတူနိုင်ပါဘူး။

၆။ မိတ်ကပ်ကျွမ်းကျင်ပညာရှင်နဲ့ တိုင်ပင်ပါ

Source: Lionesse Beauty Bar

သင်က အချိန်ပေးနိုင်ပြီး ငွေအကုန်အကျခံနိုင်ရင်တော့ မိတ်ကပ်ကျွမ်းကျင်နဲ့ တိုင်ပင်ဝယ်တာအကောင်းဆုံးပါပဲ။ မိတ်ကပ်တွေကို အွန်လိုင်းက ဝယ်တာကလည်း သင့်အတွက် လိုက်ဖက်တဲ့ Foundation ရွေးချယ်တဲ့ စိန်ခေါ်ပွဲကြီးမှာ ကျရှုံးမှုတစ်မျိုးပါ။

မိတ်ကပ်မလိမ်းခင် မျက်နှာအစိုဓာတ်ထိန်းပေးမယ့် Moisture Cream လိမ်းဖို့တော့ မမေ့ပါနဲ့နော်။ မျက်နှာကို လင်းပြီး တောက်ပစေချင်ရင်တော့ မိတ်ကပ်မလိမ်းခင် Setting Spray ကို မိတ်ကပ်လိမ်းမယ့် ဖော့ပေါ်ဖြန်းပေးပါ။

ပျိုမေတွေအားလုံး ကိုယ်နဲ့လိုက်ဖက်တဲ့ Foundation ကိုရွေးချယ်ပြီး အလှဆုံးမိန်းကလေးတွေဖြစ်ကြပါစေနော်။

Source: Stylecraze.com