ဆံပင်အဖျားနှစ်ခွဖြစ်ပြီးဖွာနေတာကို သက်သာစေမယ့် သဘာဝနည်းလမ်း ၄ မျိူး

ဆံပင်အဖျားနှစ်ခွဖြစ်ပြီး ဖွာနေတာတွေကို ဒီတိုင်းထားမယ်ဆိုရင် ဆံပင်အရှည်နှေးပြီး ဆံပင်ပိုပျက်စီးလာမှာပါ။ ဒါကြောင့် ဆံပင်အဖျားနှစ်ခွဖြစ်ပြီး ဖွာနေတာကို သက်သာအောင် လုပ်ပေးနိုင်မယ့် သဘာဝနည်းလမ်း ၄ မျိုးကို မျှဝေပေးလိုက်ပါတယ်။

ပျားရည်နဲ့သံလွင်ဆီ

ပထမနည်းလမ်းကတော့ ပျားရည်နဲ့ သံလွင်ဆီကိုသုံးပြီး လုပ်ရမှာဖြစ်ပါတယ်။ လုပ်ရမယ့်ပုံစံကတော့ သံလွင်ဆီ – လက်ဖက်ရည်ဇွန်း ၂ ဇွန်းနဲ့ ပျားရည် – လက်ဖက်ရည်ဇွန်း ၁ ဇွန်းကို ရောမွှေပြီး Hair Moisturizer တစ်ခုခုကို စားပွဲတင်ဇွန်း ၂ ဇွန်းစာထည့်ပြီး မွှေလိုက်ပါ။ ပြီးရင်တော့ ဆံပင်အဖျားတွေကို သေချာလိမ်းပေးပြီး မိနစ် ၂၀ ထားပါ။ ပြီးမှ ခေါင်းလျှော်လိုက်ရုံပါပဲ။ ဒီနည်းလမ်းကို လုပ်မယ်ဆိုရင် တစ်ပတ်တစ်ကြိမ် ပုံမှန်လုပ်ပေးပါ။

အုန်းဆီ

အုန်းဆီနဲ့လုပ်ရမယ့် နည်းလမ်းကတော့ အရိုးရှင်းဆုံးပါပဲ။ ဆံပင်အဖျားတွေကို အုန်းဆီရွှဲနေအောင်လိမ်းပြီး မိနစ် ၃၀ ထားပါ။ အချိန်ပြည့်ရင် ပုံမှန်အတိုင်း ခေါင်းလျှော်လိုက်ရုံပါပဲ။ ဒီနည်းလမ်းကို လုပ်မယ်ဆိုရင်တော့ တစ်ပတ်ကို ၂ ကြိမ် ပုံမှန်လုပ်ပေးပါ။

ငှက်ပျောနဲ့ဒိန်ချဉ်

ငှက်ပျောသီးတစ်လုံးကို ကျေညက်အောင်ချေပြီး ဒိန်ချဉ် – စားပွဲတင်ဇွန်း ၂ ဇွန်းနဲ့ ရောမွှေပါ။ ပြီးရင် Rose Water – လက်ဖက်ရည်ဇွန်း ၂ ဇွန်းလောက် ထပ်ထည့်ပြီး မွှေပေးပါ။ Rose Water မရှိရင်တော့ မထည့်လည်းရပါတယ်။ မွှေပြီးရင် ဆံပင်အဖျားမှာ ထူထူလေးလိမ်းပြီး ၁ နာရီထားပါ။ အချိန်ပြည့်မှ ခေါင်းလျှော်ပေးပါ။ ဒီနည်းလမ်းကို လုပ်မယ်ဆိုရင်တော့ တစ်ပတ်တစ်ကြိမ် လုပ်ပေးရင် ရပါပြီ။

ထောပတ်သီးနဲ့ကြက်ဥ

ထောပတ်သီးတစ်လုံးနဲ့ ကြက်ဥတစ်လုံးကို ရောထည့်ပြီး မွှေပေးပါ။ အားလုံးကြေညက်ပြီး သမအောင်မွှေပြီးသွားရင် သံလွင်ဆီ – လက်ဖက်ရည်ဇွန်း ၂ ဇွန်းထည့်ပြီး ထပ်မွှေပါ။ ပြီးရင်တော့ ဆံပင်အနှံ့လိမ်းပြီး အဖျားတွေကိုတော့ များများလိမ်းပါ။ မိနစ် ၃၀ ထားပြီးမှ ခေါင်းလျှော်ပေးပါ။ ဒီနည်းလမ်းကိုလုပ်မယ်ဆိုရင်လည်း တစ်ပတ်တစ်ကြိမ် ပုံမှန်လုပ်ပေးပါ။