လက်မောင်းတွေ တွဲကျခြင်း၊ ပုခုံးနဲ့ ရင်အုပ်ကြွက်သားတွေ လျော့တိလျော့ရဲဖြစ်ခြင်းမှ ကာကွယ်ချင်တယ်ဆိုရင် လေ့ကျင့်ခန်းမှန်မှန်ပြုလုပ်ပေးရပါမယ်။ အခုဖော်ပြပေးမယ့်လေ့ကျင့်ခန်းတွေကို တစ်ပတ်ကို အနည်းဆုံး ၂ ကြိမ်ခန့် ပြုလုပ်ပေးမယ်ဆိုရင် ရက်သတ္တပတ် ၄ ပတ်ကြာတဲ့အခါ ကြွက်သားများကျစ်လျစ်တောင့်တင်းတဲ့ခန္ဓာကိုယ်ကို ပိုင်ဆိုင်နိုင်မှာပါ။
လေ့ကျင့်ခန်းမစခင်မှာ သွေးပူလေ့ကျင့်ခန်းပြုလုပ်ပေးဖို့လည်း မမေ့ပါနဲ့။ ဒီလေ့ကျင့်ခန်းတွေ ပြုလုပ်ဖို့အတွက် အလေးတုံး ၂ တုံးလောက်တော့ လိုအပ်ပါတယ်။ အလေးတုံးမရှိပါက ရေသန့်ဘူးထဲ ရေထည့်ပြီး လေ့ကျင့်နိုင်ပါသေးတယ်။
လက်ဝှေ့ထိုးခြင်း
ပုံစံ အေ အနေအထားအတိုင်း အသင့်ပြင်ထားပါ။ ပုံစံ ဘီ ပြောင်းတဲ့အခါ ညာခြေနောက်ဆုတ်ပြီး ညာလက်ကို အရှေ့ဆန့်တန်းပါ။ ဆန့်တန်းထားတဲ့လက်က ပုခုံးနဲ့ တစ်ဖြောင့်တန်းဖြစ်နေရပါမယ်။ ၁၅ ကြိမ် ပြုလုပ်ပြီးတဲ့အခါ ဘက်ပြောင်းလုပ်ပေးလိုက်ပါ။ ဘယ်ညာကို တစ်ကြော့လို့ သတ်မှတ်ပါ။ ၃ ကြော့ (သို့) ၄ ကြော့ ပြုလုပ်ပါ။
အလေးတုံး ဆွဲမခြင်း
ပုခုံးအကျယ်အတိုင်း ခြေထောက်နှစ်ဖက်ကို ခွဲထားပါ။ လက်နှစ်ဖက်က အလေးတုံး ကိုင်ထားပါ။ ထို့နောက် လက်မောင်းအား အသုံးပြုပြီး အလေးတုံးကို ဆွဲမပါ။ တစ်စက္ကန့်၊ ၂ စက္ကန့်လောက် တောင့်ထားပြီးမှ မူလအနေအထားအတိုင်း ပြန်ချလိုက်ပါ။ ၁၅ ကြိမ် ၃ ကြော့ (သို့) ၄ ကြော့ ပြုလုပ်ပါ။ လက်နှစ်ဖက်ကို တစ်ပြိုင်တည်းပြုလုပ်လို့ရသလို တစ်ဖက်ချင်းစီပြုလုပ်လို့လည်း ရပါတယ်။
ခုံတန်းလျားမှာ လှဲလျောင်းကာ အလေးတုံးမပါ။
ခုံတန်းလျားပေါ်မှာ လှဲလျောင်းနေပါ။ ခြေထောက်နှစ်ဖက်ကို ပုခုံးအကျယ်ထက် ပိုချဲထားပါ။ ဒူးခေါင်းက ၉၀ ဒီဂရီတည့်မတ်နေရပါမယ်။ အလေးတုံးကိုင်ထားတဲ့လက်က တံတောင်ဆစ် ကွေးထားပါ။ ၉၀ ဒီဂရီရှိရပါမယ်။ ပြီးမှ လက်မောင်းကို ဆန့်တန်းလိုက်ပါ။ နှစ်စက္ကန့်လောက် တောင့်ထားပြီးမှ လက်မောင်းပြန်ချပါ။
အလေးတုံး ဘေးသို့ ဆွဲမခြင်း
ပုခုံးအကျယ်အတိုင်း ခြေထောက်ချဲထားပါ။ ဒူးခေါင်းအနည်းငယ်ကွေးထားပါ။ တင်ပါးနောက်ပစ်ထားပါ။ အလေးတုံးနှစ်ခုကို ခန္ဓာကိုယ်အရှေ့ဘက်ထားပြီး ကိုင်ထားပါ။ ထို့နောက် ဘေးဘက်သို့ ဆွဲမလိုက်ရပါမယ်။ မူလအနေအထားအတိုင်း ပြန်ချလိုက်၊ ဆွဲမလိုက် ပြုလုပ်ပါ။ ၁၅ ကြိမ် ၃ ကြော့ပြုလုပ်ရပါမယ်။
မတ်တပ်ရပ်ပြီး အလေးတုံးမခြင်း
ခြေထောက်နှစ်ဖက် ချဲထားပါ။ ခါးကို မတ်မတ်ထားပါ။ လက်ဖဝါးကို အတွင်းဘက်သို့မျက်နှာမူပြီး အလေးတုံးနှစ်ဖက် ကိုင်ထားပါ။ ထို့နောက် အလေးတုံးကို ရင်ဘတ်ဆီသို့ ဆွဲမလိုက်ပါ။ လက်မောင်းနဲ့ ပုခုံးက တစ်ဖြောင့်တည်းဖြစ်နေရပါမယ်။ မူလအနေအထားအတိုင်း ပြန်သွားပါ။
အလေးတုံးကိုင် ခါးလှည့် လေ့ကျင့်ခန်း
ဒူးအနည်းငယ်ကွေးပြီး ထိုင်နေပါ။ အလေးတုံး ကို ဗိုက်အရှေ့ တည့်တည့်မှာ ကိုင်ထားပါ။ ထို့နောက် ဘယ်ညာ တစ်လှည့်ချင်းစီ ဖြည်းဖြည်းလေးလှည့်ပေးပါ။ မိမိကြိုက်နှစ်သက်ရာ အလေးတုံးပုံစံကို အသုံးပြုနိုင်ပါတယ်။ အလေးတုံး မကိုင်ချင်လည်း အလွတ်လှည့်လို့ရပါတယ်။
Source: Brightside.me
