ကိုယ်ပိုင်စီးပွားရေးတစ်ခု ထောင်တော့မယ်ဆိုရင် ကိုယ်နဲ့အတူ ငွေအား ၊ လူအား တာဝန်ယူပါဝင်ပေးမယ့် Partner ကောင်းကောင်းရှာဖို့ ပြောချင်ပါတယ်။
များသောအားဖြင့် လုပ်ငန်းအကျိုးတူပေါင်း လုပ်ဖို့ သူငယ်ချင်းတွေပဲ စုလုပ်ကြတာ များပါတယ်။ ဒါကြောင့် သင့်အနေနဲ့ သူငယ်ချင်းနဲ့ လုပ်ငန်းတစ်ခု အတူလုပ်မယ်ဆိုရင် ဒီအချက် ၄ ချက်ကို ဥပဒေ ၄ ရပ်လို သဘောထားပြီး စည်းကမ်းချထားဖို့ လိုပါလိမ့်မယ်။
(၁) ပွင့်လင်းမြင်သာမှု
Transparency ဆိုတာ ဒီနေ့ခေတ်က လူပြောအများဆုံး စကားတစ်လုံးဖြစ်ပါတယ်။ စီးပွားရေးလောကမှာတင် မဟုတ်ဘဲ နိုင်ငံရေး ၊ လူမှုရေး ၊ စီမံခန့်ခွဲမှုရေး စတဲ့ နယ်ပယ်စုံမှာပါ လူသုံးများပါတယ်။ အလုပ်လုပ်တော့မယ်ဆိုရင် အစကတည်းက ရှင်းရှင်းလင်းလင်းရှိထားဖို့ လိုပါတယ်။
အကြောင်းသိ သူငယ်ချင်းတွေပဲ ဆိုပြီး စည်းစနစ်မရှိ ၊ စာရင်းဇယားမရှိ ၊ တိကျတဲ့ သဘောတူညီချက် မရှိဘဲ လုပ်ငန်းတစ်ခု လုပ်မယ်ဆိုရင် လုပ်ငန်းပြိုလဲဖို့ ရာခိုင်နှုန်းများပါတယ်။ အလုပ်နဲ့အတူ မိတ်ဆွေတွေရဲ့ ဆက်ဆံရေးပါ ပျက်စီးသွားနိုင်ပါတယ်။ ဒါကြောင့် သူငယ်ချင်းနဲ့ အလုပ်အတူလုပ်ရင်လည်း Transparency ထားဖို့ ပြောချင်ပါတယ်။
(၂) ယုံကြည်မှု
ငွေကြေးကိစ္စမျိုးဆိုတာ စိတ်ဖြောင့်ဖြောင့်နဲ့ ယုံကြည်နိုင်မှ လုပ်နိုင်ကိုင်နိုင်တဲ့ အလုပ်မျိုးပါ။ လုပ်ငန်းအတူ လုပ်မယ်ဆိုရင် ကိုယ်ယုံကြည်ရတဲ့လူ ဟုတ်ရဲ့လား။ ကိုယ့်ကိုရော ယုံကြည်မှုရှိရဲ့လားဆိုတာ မဖြစ်မနေမေးရမယ့် မေးခွန်းတချို့ပါပဲ။ စီးပွားရေးလောကမှာ နာမည်ပျက်မရှိတဲ့လူ ၊ ဂုဏ်သိက္ခာရှိပြီး ကတိတည်ကြည်တဲ့လူဖြစ်တယ်ဆိုတာ ဆုတံဆိပ်ချီးမြှင့်ခံရသလိုပါပဲ။
ကိုယ်တိုင်လည်း ယုံကြည်ထိုက်သူဖြစ်အောင် ရိုးသားပြီး ကိုယ်ကျင့်တရားကို အလေးထားဖို့ လိုပါတယ်။ ဒါကတော့ စီးပွားရေးလောကမှ မဟုတ်ပါဘူး။ ဘယ်နေရာရောက်ရောက် နာမည်ကောင်းတစ်လုံးရှိသူအဖို့ ဒုက္ခကြာကြာမရောက်ဘူးဆိုတာ မှတ်ထားစေချင်ပါတယ်။
(၃) အပြန်အလှန်အကျိုးရှိမှု
လုပ်ငန်းအတူလုပ်မယ်ဆိုရင် “သင့်ပါတနာ ပျော်ရဲ့လား” ဆိုတဲ့ မေးခွန်းကို မေးပါ။ စီးပွားရေးလောကမှာ ကိုယ့်မိတ်ဖက်အဆင်မပြေရင် ကိုယ်လည်း အဆင်မပေဘူးဆိုတာ နားလည်ထားဖို့ လိုပါတယ်။ ကိုယ်တစ်ယောက်ပဲ အကျိုးရှိပြီး သူ့အကျိုးထိခိုက်တာမျိုး ရှောင်ပါ။ အလားတူပဲ။ ကိုယ့်အကျိုးတော့ ထိခိုက်နေပြီး ကိုယ့်ပါတနာက အကျိုးခံစားနေရရင်လည်း အဆင်မပြေပါဘူး။
ဒါကြောင့် နှစ်ဦးနှစ်ခွ အကျိုးရှိတဲ့ Win-Win Situation ကို သွားဖို့ ပြောကြတာပါ။ အလုပ်အတူလုပ်မယ်ဆိုရင် အစကတည်းက နှစ်ဖက်အကျိုးရှိအောင် စဉ်းစားစီမံထားသင့်ပါတယ်။
(၄) အမြင်တူမှု
Partnership ဖြစ်မှုဆိုတာ တစ်ယောက်ကိုတစ်ယောက် ယုံကြည်ရုံ ၊ နှစ်ဖက် အကျိုးရှိရုံနဲ့လည်း မလုံလောက်ပါဘူး။ အောင်မြင်တဲ့ မိတ်ဖက်ပြုမှုဆိုတာ ရှေ့လျှောက်အနာဂါတ်မျှော်မှန်းချက်တွေ တူမျှဖို့လည်း လိုပါတယ်။ ရေရှည်သွားမယ့် စီးပွားရေးတစ်ခုမှာ အနာဂါတ်အတွက် တူမျှတဲ့ အမြော်အမြင်တွေ မရှိရင် ၊ ရည်မှန်းချက်ပန်းတိုင် မတူရင် ဘယ်လိုမှ တာရှည်ခံမှာ မဟုတ်ပါဘူး။
အမြင်ဖလှယ်မှု ၊ အမြင်တူမှုနဲ့ အိပ်မက်ချင်းတူညီမှုတွေကပဲ ရေရှည်တည်တံ့ပြီး အောင်မြင်တဲ့စီးပွားရေးတစ်ခုကို ဖော်ဆောင်နိုင်မှာ ဖြစ်ပါတယ်။
