နှစ်ဆယ်ကျော်အရွယ်မှာ သင်က ဘယ်လိုလူမျိုးလဲ၊ ဘယ်လို ဖက်ရှင် စတိုင်လ်မျိုးတွေနဲ့ လိုက်ဖက်သလဲ စတာတွေကို စတင်ကာစူးစမ်းရှာဖွေနေရတဲ့ အရွယ်ဖြစ်ပါတယ်။ သို့သော် အသက် ၃၀ အရွယ်သို့ ချဉ်းနင်းဝင်ရောက်လာပြီဆိုတာနဲ့ ထိုစူးစမ်းမှုခရီးစဉ်ကို ရပ်တန့်လိုက်ရတော့မှာဖြစ်ပါတယ်။ အသက် ၃၀ ကျော်အထိ ဖက်ရှင်ကျနေ ချင်သေးတယ်ဆိုရင်တော့ မဖြစ်မနေ သိထားသင့်တဲ့ အချက်တွေ ရှိပါတယ်။
အရည်အသွေးကောင်းတဲ့ပစ္စည်းများကို ဝယ်ပါ
အသက် ၃၀ အရွယ်ရောက်ပြီဆိုတာနဲ့ ကိုယ့်ရဲ့အဝတ်ဘီဒိုဟာ အရည်အသွေးကောင်းတဲ့ပစ္စည်းများနဲ့ ပြည့်နှက်နေရမှာဖြစ်ပါတယ်။ အရေအတွက်များနေစရာမလိုပါဘူး။ ဘာ့ကြောင့်လဲဆိုတော့ ထိုအရွယ်က လုပ်ငန်းများလည်း အတည်တကျဖြစ်နေချိန်ဖြစ်ပြီး ပွဲတက်အခမ်းအနားများကို ဖိတ်ကြားခံရတဲ့အခါ အရည်အသွေးကောင်းတဲ့ အဝတ်အထည်များဖြင့် ပွဲတက်ရမှာဖြစ်ပါတယ်။
ဖက်ရှင်အသစ်များ တီထွင်ခြင်းကို ရပ်တန့်လိုက်ပါ
အသက် ၃၀ အရွယ်ဟာ တည်တည်ငြိမ်ငြိမ်နေရမယ့် အရွယ်ဖြစ်နေပါပြီ။ ဆယ်ကျော်သက်အရွယ်၊ ၂၀ ကျော် အရွယ်တွေလို ဘယ်လိုစတိုင်လ်ပဲ ဝတ်ဝတ် ငယ်ဂုဏ်နဲ့ တင့်တယ်နေမှာမဟုတ်တော့ပါဘူး။ ဒါ့ကြောင့် ၃၀ အရွယ်မှာ ကိုယ်နဲ့ အလိုက်ဖက်ဆုံးဖက်ရှင်တစ်ခုကို ရွေးချယ်လိုက်ပါ။ ထိုဖက်ရှင်နဲ့ လိုက်ဖက်အောင် ဆင်မြန်းဝတ်ဆင်ဖို့လိုအပ်ပါတယ်။
ခန္ဓာကိုယ်မှာ အဆီပိုတွေမရှိအောင် ထိန်းပါ
အများစုက အသက် ၃၀ ကျော်လာရင် ဗိုက်ခေါက်တွေ ထွက်လာကြပါတယ်။ ဒါဟာ လေ့ကျင့်ခန်းမလုပ်ဘဲ ကွန်ပျူတာရှေ့မှာသာ အထိုင်များရခြင်းကြောင့်ဖြစ်ပါတယ်။ အသက် ၃၀ ကျော်တာတောင်မှ စတိုင်လ်ကျချင်နေသေးတယ်ဆိုရင် မိမိခန္ဓာကိုယ်မှာ အဆီပိုတွေမရှိအောင် လေ့ကျင့်ခန်းလိုက်စားဖို့လိုပါလိမ့်မယ်။
ဆံပင်စတိုင်လ်ကိုလည်း ဂရုစိုက်ပါ
ကိုယ်သည် အသက် ၃၀ အရွယ် ရောက်လာပြီဖြစ်တဲ့အတွက်ကြောင့် ဆံပင်စတိုင်လ်ကိုလည်း ဆယ်ကျော်သက်တုန်းက ညှပ်သလိုမျိုး လိုက်ညှပ်လို့မရတော့ပါဘူး။ ကိုယ့်အသက်အရွယ်နဲ့လိုက်ဖက်ပြီး လူကြီးလူကောင်းဆန်စေမယ့် ဆံပင်စတိုင်လ်မျိုးကို ရွေးချယ်ပုံသွင်းပေးဖို့လိုအပ်ပါတယ်။ ဆံပင်ညှပ်ဆိုင်သို့ မကြာခဏ မဟုတ်ရင်တောင် ၃ လ တစ်ကြိမ်လောက် သွားရောက်ကာ ဆံပင်စတိုင်လ် ပြောင်းလဲသင့်ပါတယ်။
