ဘာအတွက်ပဲ ဝယ်ဝယ် အဝတ်အစားဝယ်မယ်ဆိုရင် ကိုယ်ပေးတာနဲ့ တန်တဲ့ ဖက်ရှင်ဖြစ်ဖို့ အရေးကြီးပါတယ်။ အဝတ်အစား အရွေးမှန်တာဟာ ဝတ်လိုက်တိုင်း စိတ်လည်း ချမ်းသာသလို ဖက်ရှင်မိလို့ ကိုယ့်ကိုယ်ကိုယ်ပါ စိတ်ချယုံကြည်မှုမြင့်လာနိုင်ပါတယ်။
ဒါကြောင့်ပဲ အဝတ်အစား အဝယ်မမှားဖို့ Personal Stylist တွေ အကြံပြုကြတဲ့ အချက်လေးတွေ ဖော်ပြပေးလိုက်ပါတယ်။
(၁) အစီအစဉ်နဲ့ ဝယ်ပါ
အဝတ်အစားဝယ်မယ်ဆို အစောကတည်းက ကြိုပြီး စဉ်းစားထားတာ ကောင်းတယ်။ မဝယ်ခင် ကိုယ့်ဗီရိုကို အရင်ဖွင့် ၊ ဘာဝယ်ဖို့ လိုတာလဲ ကြည့်ပါ။ ဘာအတွက် ဝယ်မှာလဲ။ ဘာအမျိုးအစားမျိုး ဝယ်မှာလဲ။ ဘာကြောင့် ဝယ်မှာလဲ။ ဒါကြောင့် အဝတ်အစားသစ် မဝယ်ခင် ဗီရိုကို အရင်ဖွင့်ကြည့်ဖို့ လိုမယ်လို့ ပြောချင်ပါတယ်။
(၂) ကိုယ့်ဆိုဒ်နဲ့ပဲ တိုင်းဝယ်ပါ
ဈေးသက်သာလို့ ဆိုပြီး ကိုယ်နဲ့ ဆိုဒ်မတော်တာ မဝယ်မိပါစေနဲ့။ ဖက်ရှင်စတိုင်အတွက် နံပါတ်တစ် စည်းမျဉ်းက အဝတ်အစားတွေ ကိုယ်နဲ့ အံကျဖြစ်တာ ရွေးပါ ဆိုတာပါပဲ။ Fit မဟုတ်တဲ့ ဖက်ရှင်တွေ ဝယ်မိပြီးမှ ဆိုင်ပြန်အပ်ပြီး ဆိုဒ်သီတာက ပုံစံပျက်သလို ဝတ်ရတာလည်း အဆင်ပြေဖို့ မလွယ်ပါဘူး။
(၃) ရာသီဥတုလည်း ခေါင်းထဲထည့်ပါ
အဝတ်အစား ဝယ်ရင် ရာသီနဲ့ချိန်ညှိပြီး ဝယ်ဖို့လည်း မမေ့သင့်ပါဘူး။ T-Shirt ဝယ်တာတောင် နွေရာသီမှာ ဝတ်ဖို့ ဝယ်တဲ့ T-Shirt ဟာ ဆောင်းရာသီထက် ပိုပြီး ချည်သားပါးဖို့ လိုပါတယ်။ ဆောင်းတွင်းဝတ်ဖို့ ဝယ်တဲ့ Chino Pant ဟာ နွေရာသီမှာ ဝတ်ဖို့ ဝယ်တဲ့အထည်ထက် ချည်သားပဲထူဖို့ လိုသလိုမျိုး ဖြစ်ပါတယ်။
ရာသီချိန်ညှိပြီး အဝတ်အစား ဝယ်တာ ၊ ကိုယ့်အဝတ်အစားရဲ့ အသုံးချမှုတန်ဖိုးကို ကြည့်ဝယ်တာဟာ တကယ်လည်း အသုံးတည့်သလို စိတ်တိုင်းလည်း ပိုကျနိုင်ပါတယ်။
