တစ်ကိုယ်တော် အဆိုတော်ဖြစ်ဖြစ် အဖွဲ့လိုက်အဆိုတော်တွေပဲဖြစ်ဖြစ် သူတို့ရဲ့ အောင်မြင်မှုက ဘယ်လောက်ရှိနေပြီလဲဆိုတာကို နည်းလမ်းတွေအမျိုးမျိုးနဲ့ တိုင်းတာလို့ရနိုင်ပါတယ်။ ဥပမာအားဖြင့် သူတို့ရဲ့အယ်လ်ဘမ်တွေ ဒေါင်းလုဒ်လုပ်ကြတဲ့အကြိမ်ရေ၊ သီချင်း MTV တွေ ကြည့်ရှုနှုန်း အကြိမ်အရေအတွက်၊ သူတို့ရှိုးပွဲလက်မှတ်ရောင်းရတဲ့ပမာဏ၊ ဂရမ်မီဆုရတဲ့အကြိမ်ပေါင်း စသဖြင့် ပြန်စစ်ဆေးကြည့်လို့ရပါတယ်။
ဒီလိုမျိုးနည်းလမ်းတွေနဲ့ သူတို့အောင်မြင်မှုတွေကို ပြန်လည်သုံးသပ်တဲ့အခါမှာတော့ တေးဂီတနယ်ပယ်ထဲက တစ်ချို့သော နာမည်ကြီးလှတဲ့ အနုပညာရှင်တွေတောင်မှ ဂရမ်မီဆု မရဖူးခဲ့သေးတာကို သိရှိခဲ့ရပါတယ်။
အခုပြောပြပေးသွားမယ့် ဂရမ်မီဆုကို တစ်ခါမှ ဆွတ်ခူးမရရှိခဲ့ဖူးတဲ့ အနုပညာရှင်တွေက ဘယ်သူတွေလဲဆိုတာ ကြည့်ပြီးသွားရင် “သူတို့မရဖူးဘူးလား” ဆိုပြီးတော့ အလွန်ကိုမှ အံ့အားသင့်မိကြမယ်ဆိုတာ သေချာပါတယ်။
Katy Perry
“American Idol” အစီအစဥ်ရဲ့ အကဲဖြတ်တစ်ဦးအဖြစ်ပါဝင်နေတဲ့ Katy Perry ဟာဆိုရင်တော့ ၁၀ စုနှစ်ကျော် ၁၃ ကြိမ် ဆန်ကာတင်စာရင်းဝင်ခဲ့ဖူးပေမယ့် တစ်ခါမှတော့ မပိုင်ဆိုင်ဖူးသေးပါဘူး။
Sia
ဩစတြေးလျနိုင်ငံသားဖြစ်တဲ့ တေးရေးတေးဆို Sia ဟာဆိုရင်လည်း ၂၁ ရာစုရဲ့ ပေါ့ပ်တေးဂီတနယ်ပယ်ထဲက အလွှမ်းမိုးနိုင်ဆုံးသော အနုပညာရှင်တွေထဲက တစ်ဦးအပါအဝင်ဖြစ်ပါတယ်။ ဒါပေမယ့် ကံမကောင်းစွာနဲ့ပဲ ဂရမ်မီဆုကို ၉ ကြိမ်တိုင်တိုင် ဆန်ကာတင်စာရင်းဝင်ခဲ့ပေမယ့် တစ်ခါမှမရခဲ့ဖူးပါဘူး။
Nicki Minaj
ကိုယ်လုံးကိုယ်ပေါက်အမိုက်စားနဲ့ အလန်းစား Rap စာသားတွေပိုင်ရှင် Nicki Minaj ကလည်း ဂီတနယ်ပယ်မှာ မသိသူက မရှိသလောက်ကို ခပ်ရှားရှားပါပဲ။ ဒီလိုနာမည်ကြီးလှတဲ့ သူမလည်းပဲ ဂရမ်မီဆုအတွက် ၁၀ ကြိမ်တိုင်အောင် ဆန်ကာတင်စာရင်းဝင်ခဲ့ဖူးပေမယ့် ကံမကောင်းစွာနဲ့ လွဲချော်ခဲ့ရပါတယ်။
Jennifer Lopez
On The Floor, Let’s Get Loud, Ain’t Your Mama စတဲ့ သီချင်းတွေနဲ့ လူသိများကျော်ကြားလှတဲ့ ဂျေလိုဟာလည်းပဲ နောက်ထပ်မထင်ရတဲ့ အနုပညာရှင်တစ်ဦးပါ။ သူမလည်းပဲ ဆန်ကာတင်စာရင်း ၂ ခါ ဝင်ခဲ့ဖူးပေမယ့် အခုချိန်ထိ ဂရမ်မီဆု မရဖူးသေးပါဘူး။
Selena Gomez
ပရိတ်သတ်တွေ အံ့အားသင့်စေရမယ့် နောက်ဆုံးအဆိုတော်ကတော့ မိန်းကလေးအများစုအချစ်တော် ဆယ်လီနာပါပဲ။ ဘယ်သူမှ မထင်ထားကြဘူးမလား။ သူမကတော့ ၁ ကြိမ် ဆန်ကာတင်စာရင်းဝင်ခဲ့ပေမယ့် ကံမကောင်းစွာနဲ့ လက်လွှတ်ခဲ့ရပါတယ်။
