ဒူးနာတာက အသက်ကြီးတဲ့အခါမှာ အဖြစ်များပေမယ့် အသက်ငယ်ငယ်ရွယ်ရွယ်နဲ့လည်း အခန့်မသင့်ရင် ဖြစ်တာပါပဲ။ ဘယ်လိုကြောင့်ပဲဖြစ်ဖြစ် ဒူးနာတဲ့ဝေဒနာကို ခံစားနေရတဲ့သူတွေအတွက် ဒူးနာတာသက်သာစေဖို့ အိမ်မှာပဲ အေးအေးဆေးဆေး လုပ်လို့ရမယ့် လေ့ကျင့်ခန်းတွေကို ဖော်ပြပေးလိုက်ပါတယ်။
လေ့ကျင့်ခန်း ၁
ပုံမှာလုပ်ပြထားတဲ့အတိုင်း ခြေထောက်တစ်ဖက်ကို အရှေ့ဆန့်ထားပြီး နောက်ခြေထောက်တစ်ဖက်ကို ကွေးထားပြီး အရှေ့ကိုကုန်းပါ။ ပြီးရင် ခါးပြန်မတ်ပြီး အဲ့အတိုင်းထပ်လုပ်ပါ။ ခြေထောက်ကို ဘယ်ညာတစ်လှည့်စီပြောင်းပြီး လုပ်ပေးရမှာ ဖြစ်ပါတယ်။ တစ်ဖက်ကို အနည်းဆုံး ၁၀ ကြိမ်စီ လုပ်ပေးပါ။
လေ့ကျင့်ခန်း ၂
ထိုင်ခုံမှာခါးကိုမတ်ပြီးထိုင်ပါ။ ပြီးရင် ခြေထောက်တစ်ဖက်ကို အရှေ့ကိုဆန့်ထုတ်လိုက်၊ ဖြေးဖြေးချင်းစီပြန်ချလိုက်နဲ့ လုပ်ပေးရမှာ ဖြစ်ပါတယ်။ ဒါလည်း ဘယ်ညာတစ်လှည့်စီ တစ်ဖက်ကို အနည်းဆုံး ၁၀ ကြိမ်စီ လုပ်ပေးပါ။
လေ့ကျင့်ခန်း ၃
ကြမ်းမှာမှောက်နေပြီး ခြေထောက်တစ်ဖက်ကို ပုံမှာလုပ်ပြထားသလို ဖြေးဖြေးချင်းစီ ကွေးရမှာပါ။ ပြီးရင် ဖြေးဖြေးချင်းစီပြန်ချပါ။ အဲ့အတိုင်း ဘယ်ညာတစ်လှည့်စီ တစ်ဖက်ကို အနည်းဆုံး ၁၀ ကြိမ်စီ လုပ်ပေးရင် ရပါပြီ။
လေ့ကျင့်ခန်း ၄
ခြေထောက်တစ်ဖက်က ဒူးထောင်ထားပြီး နောက်ခြေထောက်တစ်ဖက်ကို ဖြေးဖြေးချင်းစီ အပေါ်မြှောက်လိုက်၊ အောက်ပြန်ချလိုက် လုပ်ပေးရမှာပါ။ ဒါလည်း ဘယ်ညာတစ်လှည့်စီ တစ်ဖက်ကို အနည်းဆုံး ၁၀ ကြိမ်စီ လုပ်ပေးပါ။
လေ့ကျင့်ခန်း ၅
နံရံမှာလက်ဖဝါးကပ်ထားပြီး ခြေထောက်တစ်ဖက်ကို ဒူးကွေးပါ။ နောက်ခြေထောက်တစ်ဖက်ကို အနောက်ဆန့်ထားပြီး ခြေထောက်ကို ကွေးလိုက်ပြန်ဆန့်လိုက်ပုံစံမျိုး လုပ်ပေးရမှာပါ။ ဘယ်ညာတစ်လှည့်စီ တစ်ဖက်ကို စက္ကန့် ၃၀ စီလုပ်ပေးပါ။
လေ့ကျင့်ခန်း ၆
မတ်တပ်ရပ်ပြီး ခြေထောက်တစ်ဖက်ကို လက်နဲ့ကိုင်ကာ အနောက်ကိုကွေးပေးပါ။ ပြီးရင် ပြန်ဆန့်ပါ။ အဲ့အတိုင်း ဘယ်ညာတစ်လှည့်စီ တစ်ဖက်ကို ၁၀ ကြိမ်၊ ၁၅ ကြိမ်စီ လုပ်ပေးရင် ရပါပြီ။
