ဆံသားခြောက်တဲ့ မိန်းကလေးတွေအတွက် ပေါင်းဆေးကောင်းကောင်းလိုအပ်ပါတယ်။ ဆံသားမခြောက်ပေမယ့်လည်း ဆံကေသာ နူးညံ့ပျော့ပျောင်းစေဖို့ ဆံပင်ပေါင်းဆေးကို အသုံးပြုဖို့လိုပါတယ်။ ပေါင်းဆေးမသုံးဘူးဆိုရင်တော့ ဆံကေသာကြမ်းတမ်းစေနိုင်ပါတယ်။ ဈေးကွက်ထဲမှာ အလွယ်တကူ ဝယ်ယူလို့ရတဲ့ ပေါင်းဆေးတွေကို ခေါင်းလျှော်ပြီးတိုင်း ဆံပင်အဖျားလေးတွေကို ပေါင်းတင်ပေးပါ။ သဘာဝနည်းလမ်းနဲ့ တစ်ပတ်ကို ၁ ကြိမ်လောက် (သို့) ၂ ပတ်ကို ၁ ကြိမ်လောက် ပေါင်းတင်ချင်ရင်တော့ အခုဖော်ပြမယ့် နည်းလမ်းတွေနဲ့ ပေါင်းတင်လိုက်ပါနော်။
နည်းလမ်း ၁
ပါဝင်ပစ္စည်း
အုန်းဆီ စားပွဲတင်ဇွန်း ၁ ဇွန်း
ပျားရည် စားပွဲတင်ဇွန်း ၁ ဇွန်း
သံပယိုရည် စားပွဲတင်ဇွန်း ၁ ဇွန်း
နှင်းဆီရည် လက်ဖက်ရည်ဇွန်း ၁ ဇွန်း
ဒိန် (Curd) စားပွဲတင်ဇွန်း ၁ ဇွန်း (မထည့်ချင်လည်းရပါတယ်။)
ပြုလုပ်နည်း
အရင်ဆုံး ခွက်တစ်လုံးထဲမှာ ပါဝင်ပစ္စည်းတွေ အားလုံးထည့်လိုက်ပါ။ ပြီးရင် သေချာမွေပေးပြီး သင့်ဆံကေသာ ဦးရေပြားကို နှံ့စပ်အောင်လိမ်းလိုက်ပါ။ အဲဒီနောက် ၁၀ မိနစ် ၁၅ မိနစ်လောက်ထားပြီး ခေါင်းလျှော်ရည်နဲ့ လျှော်ချလိုက်ပါ။
နည်းလမ်း ၂
ပါဝင်ပစ္စည်း
ကြက်ဥ အနှစ် ၂ လုံး
ပြုလုပ်နည်း
ကြက်ဥကို ခွဲလိုက်ပြီး အနှစ်ပဲယူပါ။ ပြီးရင် သေချာလေး ခလောက်လိုက်ပြီး ဆံပင်အရင်းကနေ အဖျားထိ လိမ်းပေးပါ။ အဲဒီနောက် မိနစ် ၂၀ လောက်ထားပြီး ခေါင်းလျှော်ရည်နဲ့ သေချာလေးလျှော်ချပေးလိုက်ပါ။
