လက်သည်းပုံဖော်ရတာကိုဝါသနာပါရင် ကိုယ်တိုင်လည်း လွယ်ကူတာလေးတွေကို အရင်ပုံဖော်ကြည့်သင့်ပါတယ်။ ဒါကြောင့် လွယ်လွယ်ကူကူ သွားကြားထိုးတံကိုသုံးပြီး ကိုယ်တိုင်ပုံဖော်လို့ရအောင် ချစ်စရာကောင်းတဲ့ Fall Edition လက်သည်းဒီဇိုင်း ပုံဖော်နည်းကို အဆင့်ဆင့်ဖော်ပြပေးလိုက်ပါတယ်။

လက်ညှိုးကိုပုံဖော်ဖို့အတွက် ပန်းရောင်လေးအရင်ဆိုးပါမယ်။ ပြီးရင်တော့ မိတ်ကပ်ရောင်လို အရောင်နုလေးကို သွားကြားထိုးတံနဲ့ယူပြီး ပုံမှာပြထားတဲ့အတိုင်း အတွန့်လေးလုပ်ပေးရပါမယ်။ ပြီးရင်တော့ ဘေးဘက်မှာ အစက်လေးတွေ ချပေးလိုက်ရုံပါပဲ။

လက်ခလယ်ကိုပုံဖော်ဖို့အတွက် အဖြူရောင် (သို့) နို့နှစ်ရောင်ဘက်သွားတဲ့ အရောင်လေးကို အရင်ဆိုးပေးပါ။ ပြီးရင်တော့ အဝါရောင်လက်သည်းနီကို သွားကြားထိုးတံနဲ့ယူပြီး အဖူးပုံစံလေးလုပ်ပေးပါ။ ပြီးရင် အဖြူစက်လေး ၂ စက်လောက် ချပါ။ အစိမ်းရောင်လက်သည်းနီကို သွားကြားထိုးတံနဲ့ယူပြီး ဘေးဘက်နှစ်ဖက်မှာ ပုံမှာပြထားတဲ့အတိုင်း လုပ်ပေးပါ။

လက်သန်းကြွယ်ကိုပုံဖော်ဖို့လည်း အဖြူရောင် (သို့) နို့နှစ်ရောင်ဘက်သွားတဲ့ အရောင်လေးကို အရင်ဆိုးပေးပါ။ အနီရောင်လက်သည်းနီကို အစက်နှစ်စက်စီ ပူးပြီးချပေးပါ။ ထောင့်နှစ်နေရာမှာတော့ တစ်စက်စီပဲချပေးပါ။ ခဲရောင် (သို့) အညိုရောင်ကို သွားကြားထိုးတံနဲ့ယူပြီး အညှာပုံစံလေးဆွဲပေးပါ။ ပြီးရင် အစိမ်းရောင်နဲ့လည်း ထပ်ဆွဲပေးပါ။

လက်သန်းကိုပုံဖော်ဖို့ အဝါရောင်လေးအရင်ဆိုးပါမယ်။ အဖြူရောင်လက်သည်းနီကို သွားကြားထိုးတံနဲ့ယူပြီး အစက်လေးတွေကပ်ချပေးပါ။ ပန်းပွင့်ပုံလေးပေါ်အောင်ချရပါမယ်။ အလယ်ခေါင်မှာမှ အမဲရောင်လက်သည်းနီနဲ့ အစက်လေးတစ်စက်ချလိုက်ရုံပါပဲ။ ပန်းပွင့်ထိပ်နားမှာ အချောင်းလေး ၂ ခု ဆွဲပေးပါ။

လက်မကိုပုံဖော်ဖို့ အဖြူရောင် (သို့) နို့နှစ်ရောင်ဘက်သွားတဲ့ အရောင်လေးကို အရင်ဆိုးပေးပါ။ တစ်ခြမ်းကို ပန်းရောင်လေးထပ်ဆိုးပါမယ်။ အကွေးလေးဖြစ်အောင် သေချာဆိုးပေးပါ။ ပြီးရင်တော့ အဲ့ဒီအကွေးလေးအတိုင်း အလယ်ကို လက်သည်းနီအညိုရောင် (သို့) အမဲရောင်နဲ့ အစက်လေးတွေချပေးပါ။

လက် ၅ ချောင်းလုံးပုံဖော်ပြီးရင်တော့ အပေါ်ကနေ top coat ထပ်ဆိုးပေးလိုက်ရုံပါပဲ။ ဒါဆိုရင်တော့ ချစ်စရာကောင်းတဲ့ Fall Edition လက်သည်းဒီဇိုင်းလေးကို ရရှိသွားပြီပဲဖြစ်ပါတယ်။