ခြောက်သွေ့တဲ့နှုတ်ခမ်းပေါ်ကို နှုတ်ခမ်းနီဆိုးရတာက သင့်နှုတ်ခမ်းသားကိုပိုပြီး ကြည့်ရဆိုးစေပါတယ်။ နှုတ်ခမ်းက ကိုယ်ခန္ဓာရဲ့ အခြားအစိတ်အပိုင်းတွေထက် အဆီနဲ့အစိုဓာတ်ပါဝင်မှုလည်းနည်းတာကြောင့် ဆောင်းတွင်းလိုအေးတဲ့ရာသီနဲ့ ရေဓာတ်ခန်းခြောက်တဲ့အချိန်တွေမှာ အလွယ်တကူ နှုတ်ခမ်းကွဲအက်တတ်ပါတယ်။ ဒါတွေကိုဖြေရှင်းဖို့အတွက် နှုတ်ခမ်းအဆီ Lip Balm ပုံမှန်အသုံးပြုခြင်း၊ Scrub သုံးပြီး ဆဲလ်သေတွေဖယ်ရှားခြင်းနဲ့ အစိုဓာတ်ရအောင်ရေများများသောက်ခြင်းတွေ ပြုလုပ်ဖို့လိုပါတယ်။ အခုဖော်ပြပေးမယ့် အိမ်မှာကိုယ်တိုင်လုပ်နိုင်တဲ့ DIY Lip Scrub နည်းက ပါဝင်ပစ္စည်းအနည်းငယ်နဲ့ လုပ်ရလွယ်တဲ့အပြင် နှုတ်ခမ်းအတွင်းသွေးလည်ပတ်မှုကောင်းစေပြီး စိုစိုပြေပြေနဲ့ သဘာဝအတိုင်း နှုတ်ခမ်းသားခပ်ဖူးဖူးလေးရရှိဖို့ ကူညီပေးပါလိမ့်မယ်။

လိုအပ်တဲ့ပစ္စည်းတွေကတော့-

• သဘာဝအုန်းဆီ (၁) ဇွန်း

• ရိုးရိုးသကြား စားပွဲတင်ဇွန်း (၁) ဇွန်း


• သကြားအညို စားပွဲတင်ဇွန်း (၁) ဇွန်း

• ပျားရည် (၁) ဇွန်း

ဒါတွေအားလုံးကို ခွက်တစ်ခွက်ထဲထည့်ပြီး သမအောင်ရောစပ်ပေးရပါမယ်။ ရောစပ်ထားပြီးသားအရည်ကို ရေခဲသေတ္တာထဲမှာ တစ်နာရီကြာထားပေးပါ။ ပြီးနောက်မှာတော့ နှုတ်ခမ်းသားပေါ်မှာ သင့်လက်ဖျားနဲ့ တစ်မိနစ်ခန့် စက်ဝိုင်းပုံနှိပ်နယ်ပြီးပွတ်လိမ်းပေးရပါမယ်။

Sensitive နှုတ်ခမ်းသားရှိသူတွေအနေနဲ့ သကြားအညိုအစားရိုးရိုးသကြားကိုပဲအသုံးပြုပေးရပါမယ်။ ရိုးရိုးသကြားက အသားစပ်ခြင်း၊ နီမြန်းခြင်းတွေအလွယ်တကူမဖြစ်အောင်ထိန်းပေးနိုင်ပါတယ်။ နှုတ်ခမ်းအရမ်းခြောက်တဲ့သူတွေကတော့ အုန်းဆီ (၂) ဇွန်း နီးပါးထည့်ပေးဖို့လိုပါတယ်။

Photo Source: The List

နှုတ်ခမ်းသားနေလောင်ထားတဲ့သူတွေက Lip Scrub ကို အသားထဲစိမ့်ဝင်အောင် အရင်လိမ်းပြီး စက္ကန့်အနည်းငယ်ကြာမှ ပွတ်တိုက်ပေးရပါမယ်။ နှုတ်ခမ်းခပ်ပါးပါးကိုပိုင်ဆိုင်ထားသူတွေအနေနဲ့ကတော့ Scrub ကိုတစ်မိနစ်ထက်ပိုပြီးပွတ်တိုက်ပေးရပါမယ်။ ဒါက သင့်နှုတ်ခမ်းပါးကို စိုပြေပြီး ပုံမှန်ထက်ပြည့်ပြည့်ဖူးဖူးလေး ဖြစ်လာစေဖို့ကူညီပေးပါလိမ့်မယ်။

Photo Source: Pinterest

By MyStyleMyanmar