အခုခေတ်မှာ အသားအရေ၊ အလှအပအတွက် အထောက်အကူဖြစ်စေမယ့် အလှကုန်ပစ္စည်းတွေအများအပြားက ဈေးကွက်ထဲမှာ ပျံ့နှံ့နေပါတယ်။ တစ်ချို့ပစ္စည်းတွေကျတော့လည်း တံဆိပ်ကောင်းလို့ ဈေးတအားကြီးလွန်းပြီး တချို့တွေကျတော့လည်း ဈေးသိပ်မများပေမယ့် အသုံးဝင်တာတွေလည်းရှိပါတယ်။
ဒါပေမယ့် ဒီလိုပစ္စည်းတွေကို ထုတ်လုပ်ရာမှာ သဘာဝပါဝင်ပစ္စည်းတွေကို မသုံးဘဲနဲ့ ထုတ်လုပ်လို့မရပါဘူးနော်။ သဘာဝပါဝင်ပစ္စည်းတွေအပြင် ဓာတုပစ္စည်းတွေပါ ပေါင်းစပ်ထုတ်လုပ်ထားတဲ့ အလှကုန်ပစ္စည်းတွေကို သိပ်ပြီးမယုံကြည်ချင်ဘူး၊ အမြဲတမ်းအားမကိုးချင်ဘူးဆိုရင် သဘာဝ ပါဝင်ပစ္စည်းစစ်စစ်တွေကိုသာ အသုံးပြုပြီးတော့ ကိုယ့်ဘာသာ အိမ်မှာပဲပေါင်းတင်ကြည့်လိုက်ရအောင်ပါ။
နနွင်း Face Mask
Antioxidants တွေကြွယ်ဝစွာပါဝင်တာကြောင့် ဝက်ခြံထွက်လွယ်တဲ့၊ ခြောက်သွေ့တဲ့၊ အရေးအကြောင်းတွေရှိတဲ့ အသားအရေပိုင်ရှင်များနှင့် မျက်ကွင်းညိုတာတွေကို ပျောက်ကင်းလိုသူများ အသုံးပြုပေးနိုင်ပါတယ်။
နနွင်း လက်ဖက်ရည်ဇွန်း ၁/၂, ပျားရည် လက်ဖက်ရည်ဇွန်း ၁/၂, ဒိန်ချဥ် စားပွဲတင်ဇွန်း ၁ ဇွန်းမှ ၂ ဇွန်းတို့ကို အားလုံးပေါင်းစပ်ပြီးတော့ မျက်နှာမှာသုတ်လိမ်းပေးပါ။ ၁၅ မိနစ်လောက်ထားပြီးနောက် မျက်နှာသစ်ပေးနိုင်ပါတယ်။
Brightening Mask
ပျားရည် လက်ဖက်ရည်ဇွန်း ၁ ဇွန်း၊ ထောပတ်သီး ၁ လုံး၊ ဒိန်ချဥ် စားပွဲတင်ဇွန်း ၁ ဇွန်းတို့ကို သေချာနှံ့အောင်ရောစပ်ပြီး မျက်နှာပေါင်းတင်ပေးနိုင်ပါတယ်။ ဒီပေါင်းတင်နည်းလေးက အသားအရေဝင်းလက်တောက်ပချင်သူတွေ အသုံးပြုနိုင်ပါတယ်။
Blueberry Mask
ဘလူးဘယ်ရီသီးတွေမှာ အားပြင်းတဲ့ Antioxidants တွေပါဝင်တာကြောင့် အသားအရေကိုဆိုးကျိုးဖြစ်စေတဲ့ Radicals တွေရန်မှ ကာကွယ်ပေးပါတယ်။
ဘလူးဘယ်ရီသီး ခွက်တစ်ခွက်ရဲ့ သုံးပုံတစ်ပုံ၊ ဒိန်ချဥ် စားပွဲတင်ဇွန်း ၂ ဇွန်း၊ ဆန်မှုန့် စားပွဲတင်ဇွန်း ၁ ဇွန်း၊ ပျားရည် လက်ဖက်ရည်ဇွန်း ၁ ဇွန်းတို့ကို ရောစပ်ကာ မျက်နှာပေါ်မှာ မိနစ် ၂၀ လောက်ထားပေးပါ။ ပြီးရင် ရေနွေးနွေးလေးနဲ့ မျက်နှာသစ်ပေးလိုက်ပါ။
