စစ်တမ်းတွေအရတော့ အောင်မြင်ပြီးကြွယ်ဝချမ်းသာတဲ့ သူတွေဟာ ကောင်းမွန်တဲ့ နေ့စဉ်အလေ့အထတွေကို ထိန်းသိမ်းထားတယ်လို့ သိရပါတယ်။ ဒီအလေ့အကျင်တွေကပဲ သူတို့အောင်မြင်မှုဆီရောက်အောင် တွန်းပို့ပေးခဲ့တာပါ။ ဒီတစ်ခေါက်မှာတော့ လူတိုင်းလိုက်လံကျင့်သုံးနိုင်မယ့် ကိုယ်ထူကိုယ်ထ အောင်မြင်ချမ်းသာလာတဲ့ ရာနဲ့ချီသော သန်းကြွယ်သူဌေးတွေရဲ့ နေ့စဉ်ဘဝထဲက အလေ့အထတွေအကြောင်း တင်ဆက်ပေးချင်ပါတယ်။
(၁) အိပ်ရာစောစော ထလေ့ရှိကြတယ်
အောင်မြင်သူအများစုဟာ အိပ်ချိန်နည်းပါးကြသူတွေလို့ ထင်ကောင်းထင်နိုင်ပါတယ်။ တကယ်တော့ မှားပါတယ်။ သူတို့ဟာ ညဘက်အိပ်ရာစောစောဝင်လေ့ရှိပြီး မနက်ဘက်မှာ အိပ်ရာကနေ စောစောထကာ တစ်နေ့တာအတွက် အရေးကြီးဆုံးသောအရာတွေ လုပ်ဆောင်နိုင်ဖို့ ပြင်ဆင်မှုတွေ ပြုလုပ်ကြတာပဲ ဖြစ်ပါတယ်။
(၂) စာများများဖတ်ကြတယ်
အောင်မြင်သူတွေဟာ ကိုယ့်ကိုယ်ကို တိုးတက်မှုရှာဖွေတဲ့အနေနဲ့ ဗဟုသုတများစွာရစေမယ့် စာပေတွေကို များများဖတ်လေ့ရှိကြပါတယ်။ စာဖတ်ခြင်းအလေ့အထဟာ အနားယူ အပန်းဖြေမှုတစ်ခုထက်ပိုပြီး ကိုယ့်ရဲ့အသက်မွေးဝမ်းကြောင်းနဲ့ ပရော်ဖက်ရှင်နယ် Life ကို မြင့်တင်ပေးနိုင်တယ်ဆိုတာ လက်ခံထားကြပါတယ်။ ဒါကြောင့်အောင်မြင်သူတွေဟာ တစ်ရက်ကိုအနည်းဆုံး နာရီဝက် စာဖတ်ဖို့အချိန်ပေးကြပါသတဲ့။
(၃) လေ့ကျင့်ခန်းလုပ်တယ်
ခန္ဓာကိုယ်ကျန်းမာကြံ့ခိုင်ခြင်းကလည်း ဘဝမှာအရေးကြီးဆုံးအရာတွေထဲက တစ်ခုပဲ မဟုတ်လား။ အောင်မြင်သူအများစုဟာ စိတ်ရောကိုယ်ပါတက်ကြွလန်းဆန်းပြီး နေ့စဉ်လုပ်ငန်းဆောင်တွေကို အတက်ကြွဆုံး လုပ်ဆောင်နိုင်ဖို့ရာ နေ့စဉ်ပုံမှန်လေ့ကျင့်ခန်းလုပ်ဆောင်လေ့ရှိကြပါတယ်။
(၄) စိတ်ခွန်အားဖြစ်သူတွေနဲ့ အချိန်ကုန်ဆုံးတယ်
ပေါင်းသင်းဆက်ဆံမှု အနုပညာဆိုတာကလည်း အောင်မြင်မှုရဲ့ အခြေခံ လိုအပ်ချက်ဖြစ်ပါတယ်။ ကိုယ့်ပတ်ဝန်းကျင်မှာ မိတ်ဆွေကောင်းတွေရှိသလို အဆိပ်လို ကပ်ပါးကောင်တွေလည်းအများကြီး ရှိနိုင်ပါတယ်။ အောင်မြင်သူအများစုကတော့ ကိုယ့်ရဲ့တန်ဖိုးရှိလှတဲ့အချိန်တွေကို ကိုယ့်အတွက် စိတ်ခွန်အားဖြစ်စေမယ့် သူတွေ ၊ လေးစားစံထားရတဲ့ ပုဂ္ဂိုလ်တွေနဲ့ အချိန်ကုန်ဆုံးလေ့ရှိကြပါတယ်။
