မင်္ဂလာပါ ပျိုမေတို့ရေ။ Dry ဖြစ်တဲ့ ဆံသားကိုပြုပြင်ဖို့ဆိုရင် Chemical မပါတဲ့ သဘာဝပစ္စည်းတွေကို သုံးပေးတာ အကောင်းဆုံးပါပဲ။ Hair Gel ကိုတော့ တစ်နည်းအားဖြင့် ဆံသားပုံသွင်းတဲ့ ပစ္စည်းအဖြစ် သိကြမှာပါ။ ဒါပေမယ့် Gel ကို သဘာဝပစ္စည်းတွေနဲ့ ကိုယ်တိုင်လုပ်ပြီး သုံးပေးတာကလည်း ဆံသားကို ပုံသွင်းပေးရုံတင်မက အစိုဓာတ်ဖြည့်ပြီး နူးညံ့ပျော့ပြောင်းလာစေပါတယ်။ ဒါကြောင့်မို့ ဒီတစ်ခေါက်မှာ ဆံသားဖွာပြီး ကြမ်းတမ်းနေတဲ့သူတွေ ကိုယ်တိုင် DIY ဖန်တီးပြီး အသုံးပြုနိုင်မယ့် Hair Gel ပြုလုပ်နည်းအချို့ကို ဖော်ပြပေးလိုက်ပါတယ်။ သင်က Dry Hair ရှိတဲ့သူဆိုရင် စက်အပူတွေသုံးမယ့်အစား ဒီလို Hair Gel လေးတွေသုံးရင်း ဆံသားကိုပုံကျအောင် ပြုပြင်ကြည့်လိုက်ပါနော်-
Aloe Vera Hair Gel
ဒီနည်းအတွက်ပါဝင်ပစ္စည်းတွေက ရှားစောင်း Gel ၊ ရေအနည်းငယ်နဲ့ သံပယိုရည်တို့ပါ။ အရောအနှောမရှိတဲ့ သဘာဝရှားစောင်း Gel ကို ရေတစ်ဖန်ခွက်၊ သံပယိုရည်အနည်းငယ်တို့နဲ့ရောကာ အပူပေးပါ။ ၅ မိနစ်မှ ၁၀ မိနစ်ကြား ဆူလာတဲ့အထိ အပူပေးပြီး အရည်နည်းနည်းပျစ်လာတဲ့အခါ ပြန်အအေးခံပေးရပါမယ်။ အေးသွားတဲ့အခါ သင့်ဆံသားက လိုတဲ့နေရာတွေမှာလိမ်းရင်း ဖွာမနေအောင် ပုံသွင်းလို့ရပါပြီ။
Flaxseed Hair Gel
ဒီနည်းအတွက်က Flaxseed တစ်ခွက်စာ၊ ရေတစ်ခွက်တို့လိုအပ်ပါတယ်။ ပန်းကန်ခွက်ထဲမှာ Flaxseed ပမာဏတစ်ခုထည့်ပြီး တစ်ညစိမ်ထားလိုက်ပါ။ မနက်ရောက်တဲ့အခါ ရေနဲ့အပူပေးရပါမယ်။ ခပ်ချွဲချွဲ Gel ပုံစံ ရတဲ့အထိ မိနစ်၃၀လောက် အပူပေးပါမယ်။ ရသွားပြီဆိုရင် အစိတွေဖယ်ပြီး အရည်ကို ခေါင်းမှာလိမ်းကာ ဆံပင်အဖြောင့်၊ အကောက်လိပ်တွေအတွက် လိုသလိုလက်နဲ့ပုံသွင်းပေးနိုင်ပါတယ်။ Flaxseed မှာ အိုမီဂါအက်စစ်ပါတာမို့ ဆံသားအတွက်အစိုဓာတ်ပေးပြီး ခြောက်သွေ့တာတွေသက်သာစေမှာပါ။
Shea Butter Hair Gel
Shea Butter ကလည်း ဆံသားမွှေးညှင်းပေါက်အတွင်းပိုင်းတွေအထိ အစိုဓာတ်ပေးနိုင်တာမို့ သူ့ကို တစ်ဇွန်းစာယူကာ ရှားစောင်းတစ်ဇွန်းနဲ့ရောပြီး နှံ့သွားအောင်မွှေပေးပါ။ ရလာတဲ့အရည်ကို ဆံသားမှာ Gel အဖြစ်လိမ်းနိုင်ပါတယ်။
Chia စေ့ ၊ ကြက်ဆူဆီ၊ Vitamin E နဲ့ လာဗင်ဒါဆီ Hair Gel
ဒီနည်းအတွက် Chia စေ့ တစ်ခွက်စာ၊ ရေလေးခွက်စာ၊ ကြက်ဆူဆီ နှစ်ဇွန်း၊ Vitamin E အစက်အနည်းငယ်နဲ့ လာဗင်ဒါဆီအနည်းငယ်တို့လိုအပ်ပါတယ်။ Chia စေ့နဲ့ရေရောပြီး တစ်ညစိမ်ထားပါနော်။ မနက်ပိုင်းမှာ ၁၀ မိနစ်မှ ၁၅ မိနစ်ကြား အပူပေးပြီး အစေ့တွေညက်သွားအောင် မွှေထားရပါမယ်။ Vitamin E ၊ လာဗင်ဒါဆီနဲ့ ကြက်ဆူဆီတို့ကိုပါ ဆယ်စက်ခန့်ဆီယူပြီး ရောထည့်လိုက်ပါ။ ပြီးနောက်အအေးခံကာ ခွက်အသန့်တစ်ခုထဲ ထည့်ထားလိုက်ရုံပါပဲ။ လိုအပ်တဲ့အခါ ဆံသားမှာလိမ်းပေးတာက ဆံသားကိုပျော့ပြောင်းစေတဲ့အပြင် ဆံပင်အရှည်မြန်စေဖို့ပါ ထောက်ပံ့ပေးမှာပါ။
Photo Source: Pinterest
By MyStyle Myanmar
