ဒီနေ့လိုမျိုး ၂၁ ရာစုခေတ်ထဲမှာ Social Media ဆိုတာက တစိတ်တပိုင်းအနေနဲ့ ပါဝင်လာခဲ့ပြီး မသုံးတဲ့လူရယ်လို့လည်း ရှားမှရှားပါပဲနော်။ အနုပညာရှင်တွေဆိုရင် သူတို့ရဲ့ တစ်နေ့တာလှုပ်ရှားမှုတွေကို ပရိတ်သတ်တွေကို အသိပေးဖို့အတွက်ဖြစ်စေ၊ ပရိတ်သတ်တွေနဲ့ အဆက်အသွယ်မပြတ်စေဖို့ဖြစ်စေ Social Media ကို ပိုလို့တောင်မှ အသုံးပြုကြရပါတယ်။

ဒါပေမယ့် အခုလိုမျိုး လူအများစုအတွက် မသုံးရမနေနိုင်ဖြစ်စေတဲ့ Social Media ကို သူတို့ဘဝထဲ အဝင်မခံတဲ့ အနုပညာရှင်တွေလည်း ရှိနေပါသေးတယ်။ ဘယ်အနုပညာရှင်တွေကတော့ Social Media ရဲ့ ဆွဲဆောင်မှုကို လွန်ဆန်နိုင်သလဲဆိုတာ အခုပဲ ကြည့်လိုက်ရအောင်နော်။

1. Daniel Radcliffe

ဟယ်ရီပေါ်တာစတား Daniel Radcliffe ကတော့ သူနဲ့ပတ်သက်တဲ့ အွန်လိုင်းပေါ်က သတင်းတွေ၊ ကွန်မန့်တွေကို ဖတ်တာက ဘာကောင်းကျိုးမှမရှိတာမို့ မဖတ်ဘူးလို့ အင်တာဗျူးတစ်ခုမှာ ဖြေခဲ့ဖူးပါတယ်။ တစ်ခဏလောက် တွစ်တာအကောင့်ဖွင့်ဖို့ စဥ်းစားခဲ့ဖူးပေမယ့်လည်း နောက်ဆက်တွဲဖြစ်လာမယ့် ဆိုးကျိုးတွေကို တွေးမိပြီး မဖွင့်ဖြစ်ခဲ့ဖူးလို့ ပြောပါတယ်။

2. Emma Stone

LaLaLand မင်းသမီးချော Emma Stone ဟာဆိုရင်လည်း အခုချိန်ထိတော့ Social Media ကို အသုံးမပြုသေးပါဘူး။ Social Media ပေါ်မှာ ဖြစ်နေသမျှ သူနဲ့ပတ်သက်တဲ့ သတင်းတွေ၊ အတင်းအဖျင်းတွေကို လိုက်ပြီးဖြေရှင်းပြောဆိုဖို့အတွက် အချိန်လည်းမရှိသလို မလိုအပ်ဘူးလို့လည်း ထင်တယ်ဆိုပြီး ပြောခဲ့ဖူးပါတယ်။

3. Robert Pattinson

Twilight မင်းသား Robert Pattinson ကလည်း ၂၀၁၇ ခုနှစ်တုန်းက အင်တာဗျူးတစ်ခုမှာ တွစ်တာအကောင့်ဖွင့်ဖို့ စဥ်းစားခဲ့ဖူးပေမယ့် တကယ်တမ်း မဖွင့်ဖြစ်ခဲ့ဘူးလို့ ဆိုပါတယ်။ ဒါပေမယ့် အခုနှစ်တွေ တော်တော်ကြာပြီးနောက်မှာတော့ တွစ်တာကို သဘောကျလာပြီးတော့ သူ့အတွက် တရားဝင်အကောင့်မဖွင့်ပေမယ့်လည်း တခြားတစ်ခုနဲ့ အသုံးပြုဖြစ်တယ်လို့ ပြောပြခဲ့ပါတယ်။

4. Kristen Stewart

မင်းသမီး Kristen Stewart ကတော့ သူမဘဝအတွက် Social Media ကို မလိုအပ်ဘူးလို့ ပြောခဲ့ဖူးပါတယ်။ Social Media ကို အသုံးပြုပြီး အွန်လိုင်းပေါ်ကနေ ပြောဆိုဆက်ဆံခြင်းက ကောင်းကျိုးလည်းဖြစ်စေနိုင်သလို မထင်မှတ်လိုက်ဘဲနဲ့ လုံးဝဆိုးကျိုးလည်း ဖြစ်သွားစေနိုင်ပါတယ်။

5. Saoirse Ronan

Social Media ကို အသုံးပြုမယ်ဆိုရင် အချိန်တွေလည်း အများကြီးပေးရပြီး Update ဖြစ်ဖို့အတွက် တင်ပေးနေရလို့ စိတ်ဖိစီးစရာကောင်းတယ်လို့ မင်းသမီး Saoirse Ronan က ဆိုပါတယ်။

6. Emily Blunt

မင်းသမီး Emily Blunt ကတော့ သူမရဲ့နေ့စဥ်ဘဝနဲ့ပတ်သက်ပြီး Social Media ပေါ်မှာ အရမ်းဖော်ပြလွန်းမယ်ဆိုရင် သူမရဲ့အလုပ်ကိုပါ ထိခိုက်လာနိုင်ပြီး သူမရဲ့ အကျင့်စရိုက်နဲ့လည်း မအပ်စပ်တာမို့ အသုံးမပြုဘူးလို့ ပြောပါတယ်။

7. Sandra Bullock

မင်းသမီးကြီး Sandra Bullock ကတော့ Social Media ပေါ်က သူမနဲ့ပတ်သက်တဲ့ ကွန်မန့်တွေကို ဖတ်ပြီး စိတ်ထဲမှာ စနိုးစနောင့်ဖြစ်နေရင် စိတ်ကျန်းမာရေးကို ထိခိုက်လာနိုင်လို့ Social Media ကို ဝေးဝေးရှောင်တယ်လို့ ဖြေဖူးပါတယ်။ သို့သော်လည်း သူမရဲ့ သားသမီးတွေကိုတော့ အသုံးမပြုရဘူးဆိုပြီး မတားဆီးထားပါဘူး။

8. Daniel Craig

ဂျိန်းစ်ဘွန်းမင်းသားကြီး Daniel Craig ကတော့ အနုပညာရှင်ဖြစ်ချိန်မှာ အနုပညာရှင်ဖြစ်နေပြီး ကျန်တဲ့အချိန်တွေကိုတော့ သူ့ရဲ့မိသားစုနဲ့ သာသာယာယာ အေးအေးဆေးဆေး ဖြတ်သန်းချင်တဲ့အတွက် Social Media မသုံးပါဘူး။

9. Cate Blanchett

အော်စကာဆုရှင် Cate Blanchett ကတော့ Social Media ဟာ တစ်ယောက်နဲ့တစ်ယောက် ဆက်သွယ်ပြောဆိုဖို့အတွက် ကောင်းမွန်တဲ့နည်းလမ်းတစ်ခုဆိုပေမယ့်လည်း လိုတာထက် ပိုပြီးသုံးမိမယ်ဆိုရင်တော့ ကိုယ့်ဘဝကို ဖုံးလွှမ်းသွားနိုင်လို့ ဘာအကောင့်မှမဖွင့်ဘူးလို့ ပြောပါတယ်။

10. George Clooney

မင်းသားကြီး George Clooney ကတော့ ဘယ်လောက်ပဲ အနုပညာရှင်ဖြစ်စေကာမူ သူဘာလုပ်တယ်၊ ဘယ်လိုနေတယ်၊ ဘယ်လိုတွေးတယ် စသဖြင့်ကို Social Media ပေါ်မှာ အမြဲတမ်း တင်ပေးနေစရာမလိုဘူးလို့ ထင်ပါတယ်။